റിയാദ്: സൗദി അറേബ്യൻ തലസ്ഥാനമായ റിയാദിന് വടക്ക് ഭാഗത്തേക്ക് ഹൂതികൾ വിക്ഷേപിച്ച ബാലിസ്റ്റിക് മിസൈൽ സൗദി വ്യോമ പ്രതിരോധ സേന തകർത്തതായി യെമന്റെ പരമാധികാരം സംരക്ഷിക്കുന്നതിനുള്ള സഖ്യസേന അറിയിച്ചു. ബുധനാഴ്ച പുലർച്ചെയാണ് സഖ്യസേനയുടെ വക്താവ് മേജർ ജനറൽ തുർക്കി അൽ- മാലികി ഇക്കാര്യം അറിയിച്ചത്. യെമൻ തലസ്ഥാനമായ സനായുടെ ആകാശപരിധിയിൽനിന്ന് മിസൈൽ വിക്ഷേപിക്കാനുള്ള പ്ലാറ്റ്ഫോം സഖ്യസേനയുടെ രഹസ്യാന്വേഷണ സംവിധാനത്തിന്റെ നിരീക്ഷണത്തിലായിരുന്നുവെന്നും അത് തകർക്കാനുള്ള നടപടികൾ സ്വീകരിച്ചുവരികയാണെന്നും അൽ- മാലികി എക്സിലൂടെ അറിയിച്ചു. അതേസമയം, ഹൂതി സായുധസംഘം ഏദൻ അന്താരാഷ്ട്ര വിമാനത്താവളത്തിന് നേരെ രണ്ട് ബാലിസ്റ്റിക് മിസൈലുകൾ വിക്ഷേപിച്ചതായി യെമൻ സർക്കാർ അറിയിച്ചു.

To advertise here,

കഴിഞ്ഞ തിങ്കളാഴ്ച രാത്രി നജ്‌റാൻ, ജിസാൻ വിമാനത്താവളങ്ങൾ ലക്ഷ്യമിട്ട് നടത്തിയ ആക്രമണങ്ങളിൽ മൂന്ന് പേർക്ക് പരിക്കേറ്റിരുന്നു. ഖമീസ് മുഷൈത്തിലേക്ക് നേരത്തെ വിക്ഷേപിച്ച മിസൈലും സൗദി സേന തകർത്തിരുന്നു. ചെങ്കടൽ വഴിയുള്ള തന്ത്രപ്രധാനമായ ബാബ് അൽ മന്ദബ് കടലിടുക്കിന്റെ നിയന്ത്രണം ലക്ഷ്യമിട്ട് ഹൂതി വിഭാഗവും സഖ്യസേനയും തമ്മിലുള്ള ഏറ്റുമുട്ടൽ തുടരുകയാണ്. ചെങ്കടൽ പാതയിലൂടെ സൗദി കപ്പലുകൾക്ക് നേരെയും ആക്രമണം നടത്തുമെന്ന് ഹൂതികൾ ഭീഷണി മുഴക്കിയിട്ടുണ്ട്.

സമാധാനത്തിനുപകരം സൈനിക സംഘർഷം ശക്തമാക്കുന്നതിനാണ് ഹൂതികൾ ശ്രമിക്കുന്നതെന്ന് ചൊവ്വാഴ്ച ചേർന്ന സൗദി മന്ത്രിസഭാ യോഗത്തിൽ മന്ത്രിമാർ കുറ്റപ്പെടുത്തി. യെമൻ പ്രസിഡൻഷ്യൽ ലീഡർഷിപ്പ് കൗൺസിലിനും അന്താരാഷ്ട്ര അംഗീകാരമുള്ള സർക്കാരിനും സൗദി അറേബ്യ പിന്തുണ പ്രഖ്യാപിച്ചു. രാജ്യത്തെ ഭരണസ്ഥാപനങ്ങൾ പുനഃസ്ഥാപിക്കുന്നതിനുള്ള ശ്രമങ്ങൾക്കും സൗദി പിന്തുണ അറിയിച്ചു.

അതേസമയം, ചൊവ്വാഴ്ച സാദ പ്രവിശ്യയിലെ ഒരു മലനിരയ്ക്കുള്ളിൽ സൂക്ഷിച്ചിരുന്ന 20 ബാലിസ്റ്റിക് മിസൈലുകൾ അടങ്ങിയ ആയുധ ഡിപ്പോ സഖ്യസേന തകർത്തു. ഹൂതികൾക്കെതിരായ 'ഡോൺ ഓഫ് യെമൻ' എന്ന പ്രത്യാക്രമണ സൈനിക നടപടി ശക്തമായി തുടരുന്നതിനിടെയാണ് നടപടി.

ബാബ് അൽ മന്ദബ് കടലിടുക്കിനൊപ്പം തന്ത്രപ്രധാനമായ തീരനഗരമായ മൊഖയും യെമൻ സർക്കാർ സേന പിടിച്ചെടുത്തതായി റിപ്പോർട്ടുണ്ട്. അന്താരാഷ്ട്ര കപ്പൽ ഗതാഗതത്തിന് നിർണായകമായ ജലപാതയുടെ നിയന്ത്രണം സ്വന്തമാക്കാനുള്ള ഹൂതികളുടെ ലക്ഷ്യത്തിന് കനത്ത തിരിച്ചടിയായാണ് നീക്കം.

2014-ലാണ് ഹൂതികൾ യെമൻ തലസ്ഥാനമായ സനാ പിടിച്ചെടുത്തത്. അതിനുശേഷം രാജ്യത്തിന്റെ വലിയൊരു ഭാഗം അവരുടെ നിയന്ത്രണത്തിലാണ്.

സൗദി അറേബ്യയിലെ ജനവാസ മേഖലകളെ ലക്ഷ്യമിട്ട് ആക്രമണം നടത്തിയതിന് ഹൂതികൾക്കെതിരെ നേരത്തെയും ശക്തമായ വിമർശനം ഉയർന്നിരുന്നു. ഇസ്ലാമിലെ വിശുദ്ധ നഗരമായ മക്കയ്ക്ക് സമീപം ഹൂതികൾ വിക്ഷേപിച്ച ഡ്രോൺ വെടിവെച്ചിട്ട സംഭവവും വ്യാപകമായ പ്രതിഷേധത്തിന് ഇടയാക്കിയിരുന്നു.