‘ഖുർആൻ: അനുഭവം, അനുഭൂതി, അന്വേഷണം’; ചർച്ചാസദസ്സ് സംഘടിപ്പിച്ചു

മനാമ: ‘ജീവിതവിജയത്തിന് ഖുർആൻ’ എന്ന പ്രമേയത്തിൽ ഫ്രൻഡ്‌സ് സ്റ്റഡി സർക്കിൾ നടത്തിവരുന്ന കാമ്പെയ്‌നിന്റെ ഭാഗമായി ‘ഖുർആൻ: അനുഭവം, അനുഭൂതി, അന്വേഷണം’ എന്ന വിഷയത്തിൽ ചർച്ചാസദസ്സ് സംഘടിപ്പിച്ചു.

സിഞ്ചിലെ ഫ്രൻഡ്‌സ് ഹാളിൽ നടന്ന പരിപാടിയിൽ ജമാൽ നദ്‌വി വിഷയാവതരണം നടത്തി. മനുഷ്യന്റെ അസ്തിത്വപരമായ ചോദ്യങ്ങൾക്ക് ഖുർആൻ കൃത്യമായ ഉത്തരം നൽകുന്നുവെന്നും മനുഷ്യന്റെ വിമോചനത്തെയും ആത്മാവിനെയും അഭിസംബോധന ചെയ്യുന്നുവെന്നും അദ്ദേഹം പറഞ്ഞു. ചരിത്രത്തിൽ വിവിധ സമൂഹങ്ങളിൽ വന്ന പ്രവാചകന്മാരുടെയും വേദങ്ങളുടെയും തുടർച്ചയും അന്തിമരൂപവുമാണ് ഖുർആനെന്നും അദ്ദേഹം വ്യക്തമാക്കി.

തുടർന്ന് നടന്ന തുറന്ന ചർച്ചയിൽ എഴുത്തുകാരി ഷബിനി വാസുദേവ്, ബിജു മലയി, ദിലീഷ്‌കുമാർ, യൂനുസ് സലീം എന്നിവർ പങ്കെടുത്തു. സിറാജ് പള്ളിക്കര മോഡറേറ്ററായിരുന്നു.

ഖുർആൻ വായനയിലെ വ്യക്തിപരമായ അനുഭവങ്ങൾ, അതിന്റെ ആശയലോകവും മനുഷ്യജീവിതത്തിലുള്ള സ്വാധീനവും, ഖുർആനിക സന്ദേശങ്ങളെ വിവിധ കാഴ്ചപ്പാടുകളിൽ വായിക്കുന്നതും ചർച്ചാവിഷയമായി. പങ്കെടുത്തവർ തങ്ങളുടെ അനുഭവങ്ങളും നിരീക്ഷണങ്ങളും കാഴ്ചപ്പാടുകളും പങ്കുവെച്ചു.

സാമൂഹിക പ്രവർത്തകരായ സുബൈർ എം.എം., ബിനു കുന്നന്താനം, എബ്രഹാം ജോൺ, അബ്ദുൽ റഹ്‌മാൻ അസീൽ, റഫീഖ് അബ്ദുല്ല, മനോജ് വടകര, ബദ്‌റുദ്ദീൻ പൂവാർ, യോഗാനന്ദ്, നദീറ ടീച്ചർ, അഷ്‌റഫ് തുടങ്ങിയവരുടെ ഇടപെടലുകളും ശ്രദ്ധേയമായി. യൂനുസ് സലീം ചർച്ചകൾ സമാഹരിച്ച് സംസാരിച്ചു.