മനാമ: ബഹ്റൈനിലുടനീളമുള്ള സാംസ്‌കാരിക, പൈതൃക കേന്ദ്രങ്ങളിലേക്കുള്ള പ്രവേശനം മെച്ചപ്പെടുത്തുന്ന സുസ്ഥിര മൊബിലിറ്റി പരിഹാരങ്ങൾ വികസിപ്പിക്കുന്നതിനായി ബഹ്റൈൻ അതോറിറ്റി ഫോർ കൾച്ചർ ആൻഡ് ആന്റിക്വിറ്റീസുമായി (ബി.എ.സി.എ) മന്ത്രാലയം ഏകോപിപ്പിക്കുന്നുണ്ടെന്ന് ഗതാഗത- ടെലികമ്മ്യൂണിക്കേഷൻ മന്ത്രി ഡോ. ഷെയ്ഖ് അബ്ദുള്ള ബിൻ അഹമ്മദ് അൽ ഖലീഫ. പൊതുഗതാഗത ശൃംഖലയുമായി സാംസ്‌കാരിക കേന്ദ്രങ്ങളെ ബന്ധിപ്പിക്കുന്നതിനുള്ള ഓപ്ഷനുകൾ വിലയിരുത്തൽ, സുസ്ഥിര സാംസ്‌കാരിക പാതകൾ വികസിപ്പിക്കൽ, പൗരന്മാർക്കും താമസക്കാർക്കും സന്ദർശകർക്കും പ്രവേശനക്ഷമത മെച്ചപ്പെടുത്തുന്നതിന് സാംസ്‌കാരിക സീസണുകളിലും പരിപാടികളിലും ഗതാഗത സേവനങ്ങൾ ഏകോപിപ്പിക്കൽ എന്നിവ ഏകോപനത്തിൽ ഉൾപ്പെടുന്നു.

To advertise here,

ദേശീയ വികസന മുൻഗണനകളെ പിന്തുണയ്ക്കുന്നതിലും ദേശീയ സ്വത്വത്തിന്റെ അവിഭാജ്യ ഘടകമായി സാംസ്‌കാരിക, പൈതൃക ലക്ഷ്യസ്ഥാനങ്ങളെ പ്രോത്സാഹിപ്പിക്കുന്നതിലും സർക്കാർ സ്ഥാപനങ്ങൾ തമ്മിലുള്ള സഹകരണത്തിന്റെ പ്രാധാന്യം മന്ത്രി എടുത്തുപറഞ്ഞു. സാംസ്‌കാരിക, ഗതാഗത ആസൂത്രണത്തെ പിന്തുണയ്ക്കുന്നതിനും സാംസ്‌കാരിക സൈറ്റുകളിലേക്കും പരിപാടികളിലേക്കും പ്രവേശനം മെച്ചപ്പെടുത്തുന്നതിനും ഏകോപനം സഹായിക്കുമെന്ന് ബി.എ.സി.എ. പ്രസിഡന്റ് ഷെയ്ഖ് ഖലീഫ ബിൻ അഹമ്മദ് അൽ ഖലീഫ പറഞ്ഞു.

പൈതൃക കേന്ദ്രങ്ങളുടെ ചരിത്രപരവും വാസ്തുവിദ്യാപരവുമായ സ്വഭാവം സംരക്ഷിക്കുന്നതിനൊപ്പം സന്ദർശക അനുഭവങ്ങൾ മെച്ചപ്പെടുത്തുന്നതിനായി സാംസ്‌കാരിക ലക്ഷ്യസ്ഥാന മാനേജ്മെന്റിനെ ഗതാഗത പരിഹാരങ്ങളുമായി സംയോജിപ്പിച്ച് സംയുക്ത പദ്ധതികളും സംരംഭങ്ങളും തിരിച്ചറിയുന്നതിന് ഇരു സ്ഥാപനങ്ങളും ഏകോപനം തുടരുമെന്ന് അദ്ദേഹം കൂട്ടിച്ചേർത്തു.