അടൂർ : കനാൽ റോഡുകൾ കാടുമൂടിയതോടെ യാത്ര ദുഷ്കരമാകുന്നു. മരങ്ങളും ചെറുചെടികളും പുല്ലുകളും വളർന്നുപടർന്ന് റോഡിലേക്ക് ചാഞ്ഞും ഒടിഞ്ഞുവീണും കിടക്കുകയാണ്. കനാൽ റോഡുകൾ ഉണ്ടെന്നുപോലും തിരിച്ചറിയാൻ കഴിയാത്തവിധമാണ് അടൂർ മേഖലയിലെ മിക്ക റോഡുകളുടെയും അവസ്ഥ.കാടുപിടിച്ച കനാൽ ഭാഗങ്ങളിൽ അറവുമാലിന്യം ഉൾപ്പെടെയുള്ളവ നിക്ഷേപിക്കുന്നതും പതിവായതോടെ പ്രദേശങ്ങളിൽ ദുർഗന്ധവും രൂക്ഷമാണ്. കാടുകൾ റോഡിലേക്ക് പടരുന്നത് യാത്രക്കാർക്ക് തടസ്സമാകുന്നതിനൊപ്പം അപകടസാധ്യതയും വർധിപ്പിക്കുന്നു. കാൽനടയാത്രക്കാർക്കും വാഹനയാത്രക്കാർക്കും ഒരുപോലെ ദുരിതമാകുകയാണ് ഈ സ്ഥിതി.മുമ്പ് തൊഴിലുറപ്പ് പദ്ധതിയിലൂടെ കാട് വെട്ടിത്തെളിക്കുന്ന ജോലികൾ നടത്തിയിരുന്നു. എന്നാൽ, ആവർത്തനസ്വഭാവമുള്ള പ്രവൃത്തികൾക്ക് നിലവിലെ മാനദണ്ഡങ്ങളിൽ നിയന്ത്രണമുള്ളതിനാൽ ഇത്തരം ജോലികൾക്ക് അനുമതി ലഭിക്കുന്നില്ലെന്നാണ് അധികൃതരുടെ വിശദീകരണം. ഇതോടെ കനാൽ റോഡുകളിലെ കാടുകൾ നീക്കം ചെയ്യാനാകാത്ത സ്ഥിതിയാണ്.റോഡുകളിലെ കാട് വെട്ടിത്തെളിച്ച് ഗതാഗതം സുഗമമാക്കുന്നതിനും മാലിന്യനിക്ഷേപം തടയുന്നതിനും അടിയന്തര നടപടി വേണമെന്നാണ് നാട്ടുകാരുടെ ആവശ്യം. തൊഴിലുറപ്പ് പദ്ധതിയുടെ മാനദണ്ഡങ്ങളിൽ ആവശ്യമായ മാറ്റം വരുത്തി കാട് വെട്ടിത്തെളിക്കുന്ന ജോലികൾക്ക് അനുമതി നൽകണമെന്നും അവർ ആവശ്യപ്പെടുന്നു.

To advertise here,