പാറഖനനത്തിനുശേഷം പാറമടകൾ സുരക്ഷാമാനദണ്ഡങ്ങൾ പാലിക്കാതെ ഉപേക്ഷിക്കുന്നത് അപകടഭീഷണിഉയർത്തുന്നു

To advertise here,

പട്ടാമ്പി : പാറഖനനത്തിനുശേഷം സുരക്ഷാമാനദണ്ഡങ്ങൾ പാലിക്കാതെ ഉപേക്ഷിക്കുന്ന പാറമടകൾ അപകടക്കയങ്ങളാകുന്നു. നിയമപ്രകാരം ഖനനം കഴിഞ്ഞ പാറമടകൾ സുരക്ഷിതമായി മൂടുകയോ ജലാശയങ്ങളായി നിലനിർത്തുകയോ വേണം. ഈ മാർഗങ്ങളും ഫലപ്രദമായി നടപ്പാവുന്നില്ല.

തിരുമിറ്റക്കോട് അകിലാണത്ത് ഉപേക്ഷിക്കപ്പെട്ട ക്വാറി മൂടുന്ന ജോലിയിലേർപ്പെടുമ്പാഴാണ് ഒരു കുടുംബത്തിന് അവരുടെ അത്താണി നഷ്ടമായത്. ചാത്തനൂർ ചാലാച്ചി വീട്ടിൽ കുഞ്ഞറമുവിന്റെ മകൻ അബു താഹിറാണ്, ഓടിച്ചിരുന്ന ലോറി ക്വാറിയിലെ വെള്ളക്കെട്ടിലേക്കു മറിഞ്ഞ് മരിച്ചത്.

2017-ൽ തൃത്താല മേഴത്തൂരിൽ ഉപേക്ഷിക്കപ്പെട്ട ക്വാറിയിൽ കുളിക്കാനെത്തിയ തമിഴ്‌നാട് സ്വദേശികളായ രണ്ടു കുട്ടികൾ മരിച്ചിരുന്നു. ദേശീയപാതയ്ക്കായി തൃത്താല മേഖലയിൽനിന്നാണ് വലിയ അളവിൽ മണ്ണ് കൊണ്ടുപോയിരുന്നത്.

ഉപയോഗശൂന്യമാവുന്ന പാറമടകളിൽ മഴക്കാലമായാൽ രൂക്ഷമായ വെള്ളക്കെട്ടും രൂപപ്പെടും.

അപകടക്കുഴിയറിയാതെ കുട്ടികളും യുവാക്കളും ഇവിടെയിറങ്ങി അപകടത്തിൽപ്പെടുന്ന സംഭവങ്ങളും ഒട്ടേറെയാണ്. തൃത്താല മേഖലയിൽ ഒട്ടേറെ കുന്നുകളുണ്ട്.

ഇവിടെയൊക്കെ മണ്ണെടുപ്പും നടക്കുന്നുണ്ട്. ഏറെ പാറമടകളുമുണ്ട്.

ഈ മേഖലകളിൽ പാറ പൊട്ടിച്ച ശേഷവും മണ്ണെടുത്ത ശേഷവും സുരക്ഷിതമാർഗങ്ങളൊരുക്കാത്ത നിലയിലാണ്.

മഴക്കാലത്ത് ഉയർന്ന പ്രദേശങ്ങളിലെ ക്വാറികളിലെ വെള്ളം താഴേക്ക് ഒലിച്ചെത്തുന്നതും പ്രശ്നമാണ്. പാറമടകൾ മണ്ണിട്ടുമൂടുമ്പോൾ ആവശ്യത്തിന് സുരക്ഷാസംവിധാനം ഒരുക്കാത്തതും പ്രശ്നമാണ്.

ശരിയായി സംരക്ഷിച്ച് വേലികെട്ടിത്തിരിച്ചാൽ ഇവയെ അതതു പ്രദേശങ്ങളിലെ കുടിവെള്ളക്ഷാമം പരിഹരിക്കാനുള്ള വൻകിട മഴവെള്ളസംഭരണികളാക്കി മാറ്റാവുന്നതാണെന്ന് വിദഗ്ധർ പറയുന്നു.