വാഷിങ്ടൺ: ഇറാനുമായുള്ള യുദ്ധം ആറ് മാസം തികയാൻ ദിവസങ്ങൾ മാത്രം ബാക്കിനിൽക്കെ, ഇറാനെ ആഗോളതലത്തിൽ പൂർണ്ണമായി ഒറ്റപ്പെടുത്താൻ ലക്ഷ്യമിട്ടുള്ള കടുത്ത സാമ്പത്തിക ഉപരോധങ്ങളുമായി ഡൊണാൾഡ് ട്രംപ് ഭരണകൂടം. 'സാമ്പത്തിക ഡി-ഡേ' (economic D-Day) എന്ന് വിശേഷിപ്പിക്കപ്പെടുന്ന ഈ പുതിയ നീക്കത്തിലൂടെ ഇറാനുമായി ബിസിനസ്സ് ബന്ധങ്ങൾ തുടരുന്ന രാജ്യങ്ങളെയും സംഘടനകളെയും ലക്ഷ്യമിട്ട് സാമ്പത്തിക ഉപരോധങ്ങൾ വിപുലീകരിക്കാൻ യുഎസ് തീരുമാനിച്ചു. ഇറാനുമായുള്ള സാമ്പത്തിക ഇടപാടുകൾ നിർത്തലാക്കാൻ ലോകരാജ്യങ്ങൾക്ക് യുഎസ് കൃത്യമായ സമയപരിധി നിശ്ചയിച്ചിട്ടുണ്ടെന്നും അല്ലാത്തപക്ഷം ആഗോള ഡോളർ വിനിമയ സംവിധാനത്തിൽ നിന്ന് ഇവരെ പുറത്താക്കുമെന്നും യുഎസ് ട്രഷറി സെക്രട്ടറി സ്കോട്ട് ബെസെന്റ് മുന്നറിയിപ്പ് നൽകി.

To advertise here,

ഇറാൻ ഭരണകൂടത്തിന്റെ സാമ്പത്തിക സ്രോതസ്സുകൾ പൂർണ്ണമായും ഇല്ലാതാക്കുകയാണ് തങ്ങളുടെ ലക്ഷ്യമെന്ന് സ്കോട്ട് ബെസെന്റ് വാർത്താ സമ്മേളനത്തിൽ വ്യക്തമാക്കി. ഇറാൻ എണ്ണക്കടത്തിനും ഉപരോധങ്ങൾ മറികടക്കാനുമായി ഉപയോഗിക്കുന്ന ഓരോ സാമ്പത്തിക ശൃംഖലയെയും ഇടനിലക്കാരെയും തങ്ങൾ കൃത്യമായി നിരീക്ഷിച്ചിട്ടുണ്ടെന്ന് അദ്ദേഹം പറഞ്ഞു. ഇതിനോടകം തന്നെ ഇറാന്റെ ആണവ, മിസൈൽ, സൈബർ, എണ്ണ വിതരണ ശൃംഖലകളുമായി ബന്ധപ്പെട്ട് പ്രവർത്തിക്കുന്ന അറുപതോളം വ്യക്തികൾ, സ്ഥാപനങ്ങൾ, കപ്പലുകൾ എന്നിവയ്ക്ക് നേരെ യുഎസ് ട്രഷറി ഉപരോധം പ്രഖ്യാപിച്ചുകഴിഞ്ഞു. ഇറാനെ സഹായിക്കുന്ന ഇത്തരം സാമ്പത്തിക ഇടപാടുകൾ അവസാനിപ്പിക്കാൻ ലോകരാജ്യങ്ങൾക്ക് യുഎസ് കൃത്യമായ സമയപരിധി നൽകിയിട്ടുണ്ട്. ഈ കർശന നിർദ്ദേശങ്ങൾ പാലിക്കാൻ രാജ്യങ്ങൾക്ക് എത്രത്തോളം സമയം അനുവദിക്കുമെന്നോ അതല്ലെങ്കിൽ നിയമലംഘനം നടത്തുന്നവർക്ക് എന്തൊക്കെ ശിക്ഷാ നടപടികൾ നേരിടേണ്ടി വരുമെന്നോ യുഎസ് ഇതുവരെ കൃത്യമായി വെളിപ്പെടുത്തിയിട്ടില്ല.

ഇറാന്റെ സാമ്പത്തിക ശൃംഖലകളെ തകർക്കാനുള്ള നീക്കത്തിൽ പ്രസിഡന്റ് ഡൊണാൾഡ് ട്രംപ് നേരിട്ട് ഇടപെടുന്നുണ്ടെന്നാണ് റിപ്പോർട്ടുകൾ വ്യക്തമാക്കുന്നത്. ഇതിന്റെ ഭാഗമായി ട്രംപ് ലോകനേതാക്കളെ വ്യക്തിപരമായി ഫോണിൽ വിളിച്ച് ഇറാനുമായുള്ള എല്ലാത്തരം ഇടപാടുകളും പൂർണ്ണമായി നിർത്തലാക്കാൻ ആവശ്യപ്പെടുകയാണ്. അമേരിക്കക്കൊപ്പം നിൽക്കുന്ന രാജ്യങ്ങൾക്ക് വലിയ പ്രതിഫലം ലഭിക്കുമെന്നും, നേരെമറിച്ച് ഇറാനൊപ്പം നിൽക്കുന്ന രാജ്യങ്ങൾ കടുത്ത സാമ്പത്തിക ഒറ്റപ്പെടൽ നേരിടേണ്ടി വരുമെന്നും യുഎസ് ട്രഷറി സെക്രട്ടറി മുന്നറിയിപ്പ് നൽകി. കൂടാതെ, ഇറാനുമായി ബന്ധം പുലർത്തുന്ന ഒരു പ്രമുഖ ധനകാര്യ സ്ഥാപനത്തിന് നേരെ ഈ ആഴ്ച അവസാനത്തോടെ കടുത്ത ഉപരോധം ഉണ്ടാകുമെന്നും അദ്ദേഹം കൂട്ടിച്ചേർത്തു.

യുഎഇ, ഹോങ്കോങ്, ചൈന, സിംഗപ്പൂർ, സ്വിറ്റ്സർലൻഡ്, യൂറോപ്പ് എന്നിവടങ്ങൾ കേന്ദ്രീകരിച്ച് ഇറാന്റെ നിഴൽ കപ്പലുകളെ സഹായിക്കുന്ന ബ്രോക്കർ കമ്പനികളെയാണ് പ്രധാനമായും പുതിയ ഉപരോധം ലക്ഷ്യം വെക്കുന്നത്. ഡിജിറ്റൽ ആസ്തികൾ, സാങ്കേതികവിദ്യ, സ്വർണ്ണം, വ്യോമയാനം, ഷിപ്പിങ് എന്നിവയുമായി ബന്ധപ്പെട്ട ഇറാന്റെ സാമ്പത്തിക നീക്കങ്ങൾക്കാണ് തടസ്സം നേരിടുക. ഇതിനുപുറമെ, ഇറാനിലേക്ക് ചില പണമിടപാടുകൾ നടത്താൻ അനുമതി നൽകിയിരുന്ന പൊതു ലൈസൻസുകൾ കൂടി യുഎസ് ട്രഷറി താൽക്കാലികമായി റദ്ദാക്കിയിട്ടുണ്ട്.

അതേസമയം, അമേരിക്കയുടെ ഈ സാമ്പത്തിക സമ്മർദ്ദ തന്ത്രങ്ങളോട് ഇറാൻ പ്രതിനിധി മുഹമ്മദ് ബാഗർ ഗാലിബാഫ് ശക്തമായാണ് പ്രതികരിച്ചത്. മറ്റുള്ള രാജ്യങ്ങളുമായുള്ള ഇറാന്റെ സാമ്പത്തിക ബന്ധങ്ങൾ തടയാൻ തക്കവണ്ണമുള്ള ഒരു സാമ്പത്തിക ഭദ്രത നിലവിൽ അമേരിക്കയ്ക്കില്ലെന്ന് അദ്ദേഹം പരിഹസിച്ചു. ഇറാന്റെ പ്രധാന കച്ചവട പങ്കാളികളാരും അമേരിക്കയുടെ ഇത്തരം ഒച്ചപ്പാടുകളെ കാര്യമായി എടുക്കുന്നില്ലെന്നും ഗാലിബാഫ് എക്സിൽ കുറിച്ചു.