ടെഹ്‌റാന്‍: തെക്കുകിഴക്കന്‍ ഇറാനില്‍ കോടതിസമുച്ചയത്തിന് നേരെ അജ്ഞാത സംഘം തോക്കുകളും ഗ്രനേഡുകളും ഉപയോഗിച്ച് നടത്തിയ ആക്രമണത്തില്‍ ആറ് പേര്‍ കൊല്ലപ്പെട്ടു. സംഭവത്തില്‍ 20 പേര്‍ക്ക് പരിക്കേറ്റിട്ടുണ്ട്‌.
സീസ്റ്റാന്‍-ബലൂചെസ്ഥാന്‍ പ്രവിശ്യയിലെ നഗരമായ സഹീദാനിലായിരുന്നു ആക്രമണം. കൊല്ലപ്പെട്ടവരെ ഇനിയും തിരിച്ചറിഞ്ഞിട്ടില്ല. പോലീസും സുരക്ഷ സേനയും ഉടന്‍ തന്നെ സ്ഥലത്തെത്തി. സുരക്ഷാ സേന തോക്കുധാരികളായ മൂന്നുപേരെ വധിച്ചതായും റിപ്പോര്‍ട്ടുണ്ട്.
തീവ്രവാദ സംഘടനയായ ജെയ്ഷ് അല്‍-അദലാണ് ആക്രമണത്തിന് പിന്നിലെന്ന് സുരക്ഷാ സേനകളോട്‌ അടുത്ത ബന്ധമുള്ള തസ്‌നിം ന്യൂസ് ഏജന്‍സി ആരോപിച്ചു.
അഫ്ഗാനിസ്ഥാനും പാകിസ്താനുമായി അതിര്‍ത്തി പങ്കിടുന്ന പ്രവിശ്യയില്‍ തീവ്രവാദ ഗ്രൂപ്പുകള്‍, സായുധ മയക്കുമരുന്ന് കടത്തുകാര്‍, ഇറാനിയന്‍ സുരക്ഷാ സേന എന്നിവര്‍ തമ്മിലുള്ള ഏറ്റുമുട്ടലുകള്‍ പതിവ് സംഭവമാണ്. കഴിഞ്ഞ ഒക്ടോബറില്‍ പോലീസ് വാഹനവ്യൂഹത്തിന് നേരെയുണ്ടായ ആക്രമണത്തില്‍ പത്ത് ഉദ്യോഗസ്ഥര്‍ കൊല്ലപ്പെട്ടിരുന്നു.
Content Highlights: unknown gunmen kill six and 20 wounded in attack on court building
Published: 26 Jul 2025, 04:34 pm IST
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented