ധാക്ക: ഇന്ത്യയുമായുള്ള ഉഭയകക്ഷി ബന്ധം വഷളാക്കാൻ തങ്ങൾ ആഗ്രഹിക്കുന്നില്ലെന്നും, ബന്ധം കൂടുതൽ ശക്തമാക്കാനാണ് ലക്ഷ്യമിടുന്നതെന്നും ബംഗ്ലാദേശ് ഇടക്കാല സർക്കാർ. ഇരുരാജ്യങ്ങളും തമ്മിലുള്ള നയതന്ത്ര ബന്ധം വലിയ പ്രതിസന്ധി നേരിടുന്ന സാഹചര്യത്തിലാണ് ധനകാര്യ ഉപദേഷ്ടാവ് സാലിഹുദ്ദീൻ അഹമ്മദ് അനുരഞ്ജനത്തിന്റെ സൂചനകൾ നൽകിയത്. 

To advertise here,

ഇന്ത്യയുമായുള്ള ബന്ധം സാധാരണ നിലയിലാക്കാൻ ബംഗ്ലാദേശ് ചീഫ് അഡ്വൈസർ മുഹമ്മദ് യൂനസ് വ്യക്തിപരമായി ഇടപെടുന്നുണ്ടെന്ന് വൃത്തങ്ങൾ വ്യക്തമാക്കുന്നു. ചില കോണുകളിൽ നിന്ന് ഉയരുന്ന ഇന്ത്യ വിരുദ്ധ പരാമർശങ്ങൾ രാഷ്ട്രീയ പ്രേരിതമാണെന്നും അവയ്ക്ക് ഇടക്കാല സർക്കാരുമായി ബന്ധമില്ലെന്നും അഹമ്മദ് കൂട്ടിച്ചേർത്തു. അയൽരാജ്യങ്ങൾ തമ്മിലുള്ള ബന്ധം വഷളാക്കാൻ ശ്രമിക്കുന്ന മൂന്നാം കക്ഷികളുടെ പ്രലോഭനങ്ങളിൽ ഭരണകൂടം വീഴില്ലെന്നും അദ്ദേഹം ഉറപ്പുനൽകി.

നിലവിലെ രാഷ്ട്രീയ സാഹചര്യങ്ങൾ വ്യാപാരത്തെയോ സാമ്പത്തിക സഹകരണത്തെയോ ബാധിക്കില്ലെന്നും അവശ്യസാധനങ്ങളുടെ ഇറക്കുമതിക്ക് തടസ്സമുണ്ടാകില്ലെന്നും സാലിഹുദ്ദീൻ അഹമ്മദ് പറഞ്ഞു. ഇന്ത്യയിൽ നിന്ന് 50,000 മെട്രിക് ടൺ അരി ഇറക്കുമതി ചെയ്യാനും തീരുമാനിച്ചു. ഈ നീക്കം ഇരുരാജ്യങ്ങളും തമ്മിലുള്ള സാമ്പത്തിക ബന്ധം കൂടുതൽ ഊഷ്മളമാക്കാൻ സഹായിക്കുമെന്ന് അദ്ദേഹം പ്രത്യാശ പ്രകടിപ്പിച്ചു. ഇതോടൊപ്പം പാകിസ്താനിൽ നിന്നും 50,000 മെട്രിക് ടൺ അരി വാങ്ങാൻ യൂനസ് ഭരണകൂടം പദ്ധതിയിടുന്നുണ്ട്.