ഇസ്ലാമാബാദ്: അല്‍ ഖായിദ തലവന്‍ അയ്മന്‍ അല്‍ സവാഹിരിയെ വധിക്കാന്‍ ഉപയോഗിച്ച ഡ്രോണ്‍ വിക്ഷേപിച്ചത് കിര്‍ഗിസ്താനിലെ വ്യോമതാവളത്തില്‍ നിന്നെന്ന് സൂചന. പാകിസ്താനിലെ മാധ്യമമായ ഡോണ്‍ ആണ് ഇക്കാര്യം റിപ്പോര്‍ട്ടുചെയ്തത്.

To advertise here,

വടക്കന്‍ കിര്‍ഗിസ്താനിലെ മനാസില്‍ ഗാന്‍സി വ്യോമതാവളത്തില്‍നിന്നാണ് ഡ്രോണ്‍ നിയന്ത്രിച്ചതെന്ന് റിപ്പോര്‍ട്ടില്‍ പറയുന്നു. പണ്ട് അമേരിക്കയുടെ സൈനികതാവളമായിരുന്നു ഗാന്‍സി. വ്യോമസേനയ്ക്കായിരുന്നു നിയന്ത്രണം. 2014 ജൂണില്‍ ഇത് കിര്‍ഗിസ്താന്‍ സൈന്യത്തിന് കൈമാറി. ഡ്രോണ്‍ വിക്ഷേപിച്ചത് എവിടെനിന്നാണെന്നോ ഏതുവഴിയാണ് കാബൂളിലെത്തിയതെന്നോ ഉള്ള വിവരങ്ങള്‍ യു.എസ്. ഔദ്യോഗികമായി പുറത്തുവിട്ടിട്ടില്ല.

പ്രാദേശിക സമയം ഞായറാഴ്ച രാവിലെ 6.18-നാണ് അഫ്ഗാന്‍ തലസ്ഥാനമായ കാബൂളിലെ ഷിര്‍പുരില്‍, വീടിന്റെ ബാല്‍ക്കണിയില്‍ നില്‍ക്കുകയായിരുന്ന സവാഹിരിയെ വധിച്ചത്. ഡ്രോണില്‍നിന്ന് രണ്ട് ഹെല്‍ഫയര്‍ മിസൈലുകള്‍ തൊടുത്താണ് യു.എസ്. ചാരസംഘടനയായ സി.ഐ.എ. ദൗത്യം നിര്‍വഹിച്ചത്.

സവാഹിരി അഫ്ഗാനിലെത്തിയത് അറിഞ്ഞിട്ടില്ലെന്ന് താലിബാന്‍

ഇസ്ലാമാബാദ്: അല്‍ ഖായിദ തലവന്‍ അയ്മന്‍ അല്‍ സവാഹിരി അഫ്ഗാന്‍ തലസ്ഥാനമായ കാബൂളില്‍ ഒളിവില്‍ക്കഴിഞ്ഞതിനെക്കുറിച്ച് അറിയില്ലെന്ന് താലിബാന്‍. അല്‍ ഖായിദ തലവനെ വധിച്ചെന്ന് യു.എസ്. പ്രസിഡന്റ് ജോ ബൈഡന്‍ പ്രഖ്യാപിച്ചശേഷം ആദ്യമായാണ് സവാഹിരിയുടെ പേരുപറഞ്ഞ് താലിബാന്‍ പ്രതികരിക്കുന്നത്.

വ്യാഴാഴ്ച പുറത്തുവിട്ട പ്രസ്താവനയില്‍, കാബൂളിലെ സവാഹിരിയുടെ സാന്നിധ്യമോ, ഇയാളെ വധിച്ചെന്ന യു.എസ്. അവകാശവാദമോ സ്ഥിരീകരിക്കുന്നില്ല. 'സവാഹിരി അഫ്ഗാനിസ്താനില്‍ എത്തിയെന്നോ ഇവിടെ താമസിച്ചെന്നോ വിവരങ്ങളൊന്നും ലഭിച്ചിട്ടില്ല. ഇക്കാര്യത്തില്‍ ഗൗരവമായ അന്വേഷണം നടത്താന്‍ ഇസ്ലാമിക് എമിറേറ്റ് ഓഫ് അഫ്ഗാനിസ്താന്‍ നേതൃത്വം രഹസ്യാന്വേഷണവിഭാഗത്തിന് നിര്‍ദേശം നല്‍കിയിട്ടുണ്ട്' -പ്രസ്താവനയില്‍ പറയുന്നു.

അമേരിക്ക അതിര്‍ത്തിലംഘിച്ചെന്നും അന്താരാഷ്ട്ര നിയമങ്ങള്‍ പാലിച്ചില്ലെന്നും താലിബാന്‍ കുറ്റപ്പെടുത്തി. ഇത്തരം പ്രവൃത്തികള്‍ ആവര്‍ത്തിച്ചാല്‍ പ്രത്യാഘാതത്തിന് ഉത്തരവാദി യു.എസ്. മാത്രമായിരിക്കുമെന്നും മുന്നറിയിപ്പുനല്‍കി.

താലിബാന്‍ ഭരണകൂടത്തില്‍ ഉന്നതനായ സിറാജുദീന്‍ ഹഖാനിയുടെ അറിവോടെയാണ് സവാഹിരി കാബൂളിലെ ഷിര്‍പുരില്‍ കഴിഞ്ഞതെന്നാണ് യു.എസ്. ആരോപിക്കുന്നത്.