അപ്രത്യക്ഷമായ ഇന്ത്യൻ കരുത്തിന്റെ ഫോട്ടോ; ചിത്രം മാറുമ്പോൾ ചരിത്രത്തിന് സംഭവിക്കുന്നത്!

മറച്ചുവെയ്ക്കുന്നത് മഹാവിജയം
സ്വാതന്ത്യേതര ഇന്ത്യൻ ചരിത്രത്തിന്റെ അടയാളമായിരുന്ന ചിത്രം നീക്കിയതിൽ പ്രതിഷേധിച്ച് കോൺ​ഗ്രസ് രം​ഗത്തെത്തി. വിഷയത്തിൽ, മോദി സർക്കാരിനെ നേരിട്ട് കടന്നാക്രമിക്കുകയാണ് കോൺ​ഗ്രസ് നേതാക്കൾ. ചരിത്രം തിരുത്തിയെഴുതാനും മുൻകാല കോൺ​ഗ്രസ് ഭരണനേട്ടങ്ങളെ കുറച്ചുകാണാനുമാണ് സർക്കാർ ശ്രമമെന്ന് പ്രിയങ്കാ ​ഗാന്ധി തുറന്നടിച്ചു. ഇന്ദിരാ ​ഗാന്ധിയുടെ ഭരണത്തിൽ രാജ്യം കൈവരിച്ച നേട്ടത്തെ മറന്നുകളയാനാണ് സർക്കാർ ശ്രമിക്കുന്നതെന്ന ശക്തമായ ആക്ഷേപവുമുണ്ട്. ചില പ്രത്യേക വിവരണങ്ങളോടും ആഖ്യാനങ്ങളോടും പൊരുത്തപ്പെടാത്ത സംഭവങ്ങൾ ബി.ജെ.പി. സർക്കാർ നീക്കംചെയ്യുന്നുവെന്ന് കോൺ​ഗ്രസ് എം.പി. മാണിക്കം ടാ​ഗോറും രം​ഗത്തെത്തി. 

എന്നാൽ, ഈ വിഷയത്തിൽ പ്രതിഷേധമറിച്ച് ആദ്യം രം​ഗത്തെത്തിയത് രാജ്യത്തെ കോൺ​ഗ്രസുകാരല്ലായിരുന്നു. അത് ഏതെങ്കിലും കക്ഷിരാഷ്ട്രീയത്തിൽപ്പെട്ടവരുമല്ലായിരുന്നു. സർക്കാരിനേയും സൈനിക മേധാവികളേയും നഖശിഖാന്തം എതിർത്തുകൊണ്ട് ആദ്യം വിഷയത്തെ സമൂഹത്തിന് മുന്നിൽ അവതരിപ്പിച്ചത് രാജ്യത്തിന്റെ വിമുക്തഭടന്മാരായിരുന്നു. സൈനിക ചരിത്രത്തിനെതിരായ നീക്കങ്ങൾ വീരമൃത്യു വരിച്ചവരോടുള്ള അവഹേളനമാണെന്ന് ചിലർ ചൂണ്ടിക്കാട്ടി. സ്വാതന്ത്ര്യാനന്തര ഇന്ത്യൻ ചരിത്രത്തിലെ ഏറ്റവും വലിയ യുദ്ധവിജയത്തെ നീക്കംചെയ്യുന്നതിലെ ആപത്തിനെയാണ് ഇവരെല്ലാം ചൂണ്ടിക്കാണിക്കുന്നത്. 

വിദേശത്ത് നിന്നുള്ള വിശിഷ്ട വ്യക്തികളും സൈനിക മേധാവികളും രാജ്യത്തെത്തുമ്പോൾ കണ്ടിരുന്ന ചിത്രമാണത്.  ഈ ചിത്രമാണ് പുരാണവും ഭൂതകാലവും കൊണ്ട് വച്ചുമാറിയത്. 1971-ലെ വിജയത്തിന്റെ അനുസ്മരണദിനമാണ് ഡിസംബർ 16. ഈ ദിവസത്തോടനുബന്ധിച്ച് തന്നെ ഇങ്ങനെയാരു അനാവശ്യ വിവാദത്തിന് തിരികൊളുത്തിയത് ദൗർഭാഗ്യകരമായിപ്പോയി എന്നാണ് പൊതുവേയുള്ള വിലയിരുത്തൽ.

മാറിയ ബം​ഗ്ലാദേശ്

ഭീകരത സഹിക്കവയ്യാതെ രാജ്യംവിട്ടതിന്റെ ചരിത്രം ബം​ഗ്ലാദേശുകാർക്കുണ്ട്. അതേ ചരിത്രം വീണ്ടും ആവർത്തിക്കുമോ എന്ന ഭീതിയിലാണ് ലോകവും അതിലേറെ ഇന്ത്യയും. രാജ്യത്താകെ കത്തിപ്പടർന്ന ജനരോഷത്തിന് മുന്നിൽ ഒന്നുംചെയ്യാനാകാതെ മുൻ പ്രധാനമന്ത്രി ഷെയ്ഖ് ഹസീന രാജിവെച്ച് നാടുവിട്ടതോടെയാണ് മറ്റൊരു പ്രതിസന്ധി കൂടി ബം​ഗ്ലാദേശിന് മുന്നിൽ അനാവൃതമായത്. ഭരണശിലാകേന്ദ്രങ്ങളിലേക്കും ഉന്നതരുടെ വസതിയിലേക്കും പ്രതിഷേധക്കാർ ഇരച്ചെത്തി. അന്നോളം ഇന്ത്യയുമായി അടുപ്പമുണ്ടായിരുന്ന അവാമി ലീ​ഗ് ഭരണം കൈവിട്ടു. വിശ്വസിക്കാനാകുന്ന ഒരു സഖ്യരാഷ്ട്രത്തിൽ നിന്ന് കടുത്ത ഇന്ത്യാവിരുദ്ധരായ ഒരുകൂട്ടം അവിടെ ഭരണത്തിലേറി. 

വിമോചനയുദ്ധത്തിൽ ഇന്ത്യൻ സേനയുടെ പങ്ക് അവ​ഗണിച്ച് കളയാൻ ആ​ഗ്രഹിക്കുന്നവരാണ് ഇന്ന് ബം​ഗ്ലാദേശിന്റെ തലപ്പത്ത്. ഇതേ പാതയിലാണോ ഇന്ത്യയുടെ സഞ്ചാരം എന്നാണ് വിമർശകർ ഉന്നയിക്കുന്ന പ്രധാന ആശങ്ക. 3000 ധീരസൈനികരെയാണ് അന്ന് രാജ്യത്തിനുവേണ്ടി വീരമൃത്യു വരിച്ചത്. ആഭ്യന്തരപ്രശ്നങ്ങൾ കൊടുമ്പിരികൊണ്ടിരുന്ന കാലത്ത് നിന്നാണ് അവർക്ക് മുന്നിലേക്ക് സമാധാനപരമായ ഒരു രാഷ്ട്രത്തെ ഇന്ത്യ വച്ചുനീട്ടിയത്. പാക് സൈന്യം നടത്തിയ കൂട്ടക്കൊലകളിലും അരാചകത്വത്തിലും മനംമടുത്ത് ഇന്ത്യയിലേക്കുള്ള അഭയാർഥികളായി എത്തുന്നവരിൽ ക്രമാതീതമായ വർധനവ് ഉണ്ടായതോടെയാണ് സർക്കാർ വിഷയത്തിൽ ഇടപെടേണ്ടത് അനിവാര്യമാണെന്ന് തീരുമാനിക്കുന്നത്. 

വർഷങ്ങൾക്കിപ്പുറം ബം​ഗ്ലാദേശിൽ സ്ഥിതി മറ്റൊന്നാണ്. വിമോചനത്തിന്റെ സ്മരണയ്ക്കായി അന്നാട്ടിലെ പ്രതിമ ഇന്ത്യാവിരുദ്ധരായ ആളുകൾ നശിപ്പിച്ചിട്ട് മാസങ്ങളേ ആകുന്നുള്ളൂ. ബംഗ്ലാദേശ് വിമോചനത്തിന്‍റെ സ്മരണകൾ മാത്രമല്ല, ഇന്ത്യൻ സാംസ്കാരിതയുമായി ബന്ധപ്പെട്ട എന്തിനോടും ആക്രമണമനോഭാവത്തോടെ പെരുമാറുന്നവർ ആ നാട് ഭരിക്കുമ്പോൾ നാം കരുത്തുകാട്ടിയ ദിവസങ്ങളെ ഇന്ത്യ ഉയർത്തിപ്പിടിക്കേണ്ടതുണ്ട്.

ലോഞ്ചിൽ ചെറിയ വ്യത്യാസങ്ങൾ വരുത്തിക്കളയാം എന്ന് വിചാരിച്ച് ഈ ചിത്രം മാറ്റിയെന്ന് നിസ്സാരവത്ക്കരിക്കാൻ പറ്റുന്ന വിഷയമാണോ എന്നാണ് ഉയരുന്ന ഒരു ചോദ്യം. അങ്ങിനെയെങ്കിൽ രാജ്യത്തെ ജനങ്ങളെ ഇക്കാര്യം ബോധ്യപ്പെടുത്തേണ്ട ധാർമിക ഉത്തരവാദിത്വം ഭരണകൂടത്തിനും ഉന്നത ഉദ്യോ​ഗസ്ഥർക്കില്ലേ എന്നതും പ്രസക്തമായ ചോദ്യമാണ്. ഈ പശ്ചാത്തലത്തിലാണ് പൗരാണിക ജ്ഞാനവും ആധുനിക സാങ്കേതികവിദ്യയും സംയോജിക്കുന്ന ഇന്ത്യൻ സൈന്യത്തിന്റെ ചിത്രം വ്യക്തമായ സന്ദേശവും രാഷ്ട്രീയവും ചർച്ചയാവുന്നത്.