തിരുവനന്തപുരം: പാലക്കാട് സി.പിഎമ്മിന്റേത് തകര്‍ന്ന തിരക്കഥയാണെന്ന് പ്രതിപക്ഷ നേതാവ് വി.ഡി സതീശന്‍. ഈ തിരക്കഥയുടെ തുടര്‍ച്ചയാണ് 2026-ല്‍ സിപിഎമ്മിനെ കാത്തിരിക്കുന്നതെന്നും വി.ഡി സതീശന്‍ പറഞ്ഞു. സി.പി എമ്മിന്റെ വോട്ട് 2021-നേക്കാള്‍ താഴേക്കു പോവുകയാണുണ്ടായതെന്നും എസ്.ഡി.പി.ഐയുടെയും ജമാഅത്തെ ഇസ്ലാമിയുടെയും വോട്ടിലാണ് രാഹുല്‍ ജയിച്ചത് എന്ന ഇടതുവാദം ജനങ്ങളെ അപമാനിക്കലാണെന്നും അദ്ദേഹം പറഞ്ഞു.

To advertise here,

ചേലക്കരയില്‍ 40000 വോട്ടിന് സിപിഎം ജയിച്ചിടത്ത് 12100 ലേക്ക് വോട്ടു കുറച്ചത് കോണ്‍ഗ്രസ് ആണെന്നും രമ്യ ഹരിദാസിനുവേണ്ടി പരമാവധി ശ്രമിച്ചിട്ടും കിട്ടാതെ പോയെന്നും സതീശന്‍ പറഞ്ഞു. പരാജയം പരിശോധിക്കുന്നതുപോലെ തന്നെ വിജയവും പരിശോധിക്കും. ചേലക്കരയിലെ പരാജയവും വയനാട്ടിലെ പോളിങ് കുറഞ്ഞിട്ടുപോലും നേടിയ ഉജ്ജ്വല വിജയവും ബൂത്ത് അടിസ്ഥാനത്തില്‍ പഠിക്കുമെന്നും അദ്ദേഹം പറഞ്ഞു. 

സ്ഥാനാര്‍ഥികളെ തീരുമാനിച്ചത് നേതൃത്വമാണ്. പരാജയത്തില്‍ നേതൃത്വത്തിന് ഉത്തരവാദിത്തമുണ്ട്. രമ്യ ഹരിദാസിന്റെ സ്ഥാനാര്‍ഥിത്വത്തെക്കുറിച്ച് പഠിക്കും. രമ്യ അവിടെ എം.പി ആയിരുന്ന ആളാണ്. ചേലക്കരയില്‍ കണക്ക് തെറ്റി. 3000 വോട്ടിന് ജയിക്കുമെന്ന് കരുതിയതാണ്. തോല്‍വി തീര്‍ച്ചയായും പരിശോധിക്കും. പിണറായി പോലീസ് അന്വേഷണം ഏര്‍പ്പെടുത്തുകയും ഫലം നേരത്തേ സ്വയം വിളിച്ചുപറയുകയും ചെയ്യുന്നതുപോലെ തനിക്ക് പറ്റില്ല. രമ്യ ഹരിദാസ് പരാജയപ്പെട്ടതുമായി ബന്ധപ്പെട്ട് അവര്‍ പ്രധാനപ്പെട്ട രണ്ട് നേതാക്കള്‍ക്കെതിരെ പരാതി നല്‍കിയതിനെക്കുറിച്ച് അറിയില്ല. പ്രചരണം നേരിട്ട് നിയന്ത്രിച്ചത് താനാണ്, പ്രധാനപ്പെട്ട എല്ലാ നേതാക്കളെയും അണിനിരത്തി. വീഴ്ച വരുത്തിയില്ലെന്നും പാലക്കാടിനേക്കാള്‍ മികച്ച പ്രചാരണം നടത്തിയിട്ടുണ്ടെന്നും വി.ഡി സതീശന്‍ പറഞ്ഞു. 

പാലക്കാട് സന്ദീപ് വാര്യരുടെ വരവ് തിരഞ്ഞെടുപ്പിന് ഗുണം ചെയ്തിട്ടുണ്ടെന്നും വി.ഡി സതീശന്‍ പറഞ്ഞു. കോണ്‍ഗ്രസില്‍ നിന്ന് ബി.ജെ.പിയിലേക്ക് ആളുകള്‍ പോവുമ്പോള്‍ പരിഹസിച്ച സി.പി.എം ബി.ജെ.പിയില്‍ നിന്ന് കോണ്‍ഗ്രസിലേക്ക് ആളുവന്നപ്പോള്‍ കൂട്ടക്കരച്ചില്‍ നടത്തിയതെന്തിനായിരുന്നുവെന്നും വി.ഡി സതീശന്‍ ചോദിച്ചു. ബി.ജെ.പിക്ക് വോട്ടുകുറഞ്ഞപ്പോള്‍ ആര്‍ക്കാണ് വിഷമം? വടകര-പാലക്കാട് കോണ്‍ഗ്രസ് ഡീല്‍ എന്ന ഇടതു പ്രചാരണം നടത്തിയവര്‍ ആ ഡീലിനെക്കുറിച്ച് ഉത്തരം പറഞ്ഞിട്ടുപോകണമെന്നും വി.ഡി സതീശന്‍ ആവശ്യപ്പെട്ടു. സി.പി.എം കോണ്‍ഗ്രസിനെ തോല്‍പിക്കാനാണ് നോക്കിയത്. അതിനര്‍ഥം ബി.ജെ.പി ജയിച്ചുവരുമെന്നാണ്. പാലക്കാട് തിരഞ്ഞെടുപ്പിന്റെ കാലത്ത് എന്തെങ്കിലും ആക്രമണം സി.പി.എം ബി.ജെ.പിക്കെതിരെ നടത്തിയതായി ആര്‍ക്കെങ്കിലും അറിയാമോ എന്നും അദ്ദേഹം ചോദിച്ചു. 

കത്ത് വിവാദം, റെയ്ഡ് വിവാദം, സ്പിരിറ്റ് വിവാദം, പെട്ടി വിവാദം, പരസ്യവിവാദം, സന്ദീപ് വാര്യര്‍ വിവാദം തുടങ്ങി കോണ്‍ഗ്രസിനെതിരെ ആറ് വിവാദങ്ങള്‍ ഉണ്ടാക്കി. ആറും തിരിച്ചടിച്ചുവെന്നും വി.ഡി സതീശന്‍ പറഞ്ഞു. 

സന്ദീപ് വാര്യരെ പാര്‍ട്ടിയിലേക്ക് കൊണ്ടുവന്നത് അണ്‍കണ്ടീഷണല്‍ ആയിട്ടാണ്. അദ്ദേഹത്തെ പിറകില്‍ നിര്‍ത്തില്ല മുമ്പില്‍ത്തന്നെ നിര്‍ത്തുമെന്ന് ദേശീയനേതൃത്വവും കെ.പി.സി.സിയും താനും ഉറപ്പുവരുത്തിയിട്ടുണ്ടെന്നും സതീശന്‍ പറഞ്ഞു. തൃശ്ശൂര്‍ സീറ്റിനെക്കുറിച്ച് സന്ദീപ് വാര്യരുമായി ഇപ്പോള്‍ ധാരണയൊന്നുമില്ല, ബി.ജെ.പിയില്‍ നിന്ന് കൂടുതല്‍ പേര്‍ വരുമോ എന്ന കാര്യത്തില്‍ കാണാന്‍ പോകുന്ന പൂരം പറഞ്ഞറിയിക്കുന്നില്ല എന്നായിരുന്നു വി.ഡി സതീശന്റെ പ്രതികരണം.