തിരുവനന്തപുരം: സംഘപരിവാറിനെപോലും നാണിപ്പിക്കുന്ന തരത്തില്‍ ഭൂരിപക്ഷവര്‍ഗീയപ്രീണനവുമായി സിപിഎം രംഗത്തെത്തിയിരിക്കുകയാണെന്ന് പ്രതിപക്ഷനേതാവ് വി.ഡി സതീശന്‍. വയനാട്ടില്‍ പ്രിയങ്ക ഗാന്ധിക്കുണ്ടായ ഉജ്ജ്വല വിജയം ന്യൂനപക്ഷതീവ്രവാദികളുടെ വോട്ട് കൊണ്ടാണെന്നാണ് സിപിഎം സംസ്ഥാനസെക്രട്ടറി പറയുന്നത്. അത് വയനാട്ടിലെ ജനങ്ങളെ മുഴുവന്‍ അപമാനിച്ചതാണെന്ന് സതീശന്‍ പറഞ്ഞു.  സിപിഎമ്മിന്റെ ഈ വര്‍ഗീയപ്രീണനനയമാണ് ബി.ജെ.പിക്ക് ന്യൂനപക്ഷങ്ങള്‍ക്കെതിരായി ശബ്ദമുയര്‍ത്താന്‍ വേണ്ടി പ്രേരണയായി മാറിയതെന്നും അദ്ദേഹം കൂട്ടിച്ചേര്‍ത്തു.

To advertise here,

ലോക്‌സഭാ തിരഞ്ഞെടുപ്പിന് ശേഷം സിപിഎമ്മിന്റെ അജണ്ട മാറി. സംഘപരിവാറിനെപോലും നാണിപ്പിക്കുന്ന തരത്തില്‍ ഭൂരിപക്ഷവര്‍ഗീയപ്രീണനവുമായി സിപിഎം രംഗത്തെത്തിയിരിക്കുകയാണ്. വയനാട്ടില്‍ പ്രിയങ്ക ഗാന്ധിക്കുണ്ടായ ഉജ്ജ്വല വിജയം ന്യൂനപക്ഷതീവ്രവാദികളുടെ വോട്ട് കൊണ്ടാണെന്നാണ് സിപിഎം സംസ്ഥാനസെക്രട്ടറി പറയുന്നത്. അത് വയനാട്ടിലെ ജനങ്ങളെ മുഴുവന്‍ അപമാനിച്ചതാണ് സിപിഎം. വയനാട്ടിലെ മുഴുവന്‍ ജനവിഭാഗവും ഒരുമിച്ച് നിന്ന് കൊണ്ടാണ് ജാതിമതവ്യത്യാസമില്ലാതെ രാഷ്ട്രീയവ്യത്യാസമില്ലാതെ രാഹുല്‍ ഗാന്ധിയേയും പ്രിയങ്ക ഗാന്ധിയേയും വിജയിപ്പിച്ചത്. അതിന്റെ പേരില്‍ വര്‍ഗീയതയുണ്ടാക്കാന്‍ സിപിഎം ശ്രമിക്കുന്നത് സിപിഎമ്മും സംഘപരിവാറും തമ്മിലുള്ള ദൂരം അകലെയല്ല എന്നു കാണിക്കുന്നതിന് തുല്യമാണ്. - സതീശന്‍ പറഞ്ഞു.

സംഘപരിവാര്‍ കുറേ നാളുകളായി വര്‍ഗീയസംഘര്‍ഷമുണ്ടാക്കുന്നതിനായി ശ്രമിക്കുന്നു. പാലക്കാട് ചിറ്റൂരിലെ നല്ലേപ്പള്ളി സ്‌കൂളിലെ ക്രിസ്മസ് ആഘോഷം തടസ്സപ്പെടുത്തി. വടക്കേ ഇന്ത്യയിലെ മധ്യപ്രദേശിലും ഛത്തീസ്ഗഢീലും യുപിയിലും ചെയ്യുന്ന പരിപാടി കേരളത്തിലും സംഘപരിവാര്‍ ആവര്‍ത്തിക്കാനാണ് ശ്രമിക്കുന്നത്. ഇതിന് പിന്തുണ കൊടുക്കുന്നത് സിപിഎമ്മാണെന്നും വി.ഡി സതീശന്‍ പറഞ്ഞു. സിപിഎമ്മിന്റെ ഈ വര്‍ഗീയപ്രീണനനയമാണ് ബി.ജെ.പിക്ക് ന്യൂനപക്ഷങ്ങള്‍ക്കെതിരായി ശബ്ദമുയര്‍ത്താന്‍ വേണ്ടി പ്രേരണയായി  മാറിയത്. - സതീശന്‍ പറഞ്ഞു.

സിപിഎമ്മിന്റെ തനിനിറം പുറത്തുവന്നിരിക്കുകയാണ്. പൊയ്മുഖം അഴിഞ്ഞുവീണിരിക്കുകയാണ്. സംഘപരിവാറിനെ സന്തോഷിപ്പിക്കാനുള്ള ശ്രമമാണ് സിപിഎമ്മും പിണറായിയും നടത്തുന്നത്. മുഖ്യമന്ത്രിയുടെ അറിവോടെയാണ് വിജയരാഘവന്‍ സംസാരിച്ചതും പിന്തുണച്ച് സിപിഎം നേതാക്കള്‍ രംഗത്തെത്തിയതും. കേരളത്തിന്റെ ചരിത്രത്തില്‍ ഇത്രയും മോശം നിലപാട് ഒരുകാലത്തും സിപിഎമ്മെടുത്തിട്ടില്ലെന്നും സംഘപരിവാറിനെ ഭയന്നാണ് സിപിഎം നേതാക്കള്‍ ജീവിക്കുന്നതെന്നും സതീശന്‍ പറഞ്ഞു.