തൃശ്ശൂര്: സംയുക്തപരിശോധനാ റിപ്പോര്ട്ടില് വ്യക്തമായ വസ്തുതകളുടെ അടിസ്ഥാനത്തിലാണ് കളക്ടര് അര്ജുന് പാണ്ഡ്യന് ടോള്പിരിവ് നിര്ത്തിവെക്കാന് ഉത്തരവിട്ടത്.
ചാലക്കുടി ഡിവൈഎസ്പി, ആര്ടിഒ, തഹസില്ദാര് എന്നിവര് നടത്തിയ സംയുക്ത പരിശോധനയിലാണ് പലവട്ടം നടത്തിയ യോഗങ്ങളില് നിര്ദേശിച്ചതൊന്നും ദേശീയപാതാ അതോറിറ്റി പരിഗണിച്ചിട്ടുപോലുമില്ലെന്ന് വ്യക്തമായത്.
1. പണി നടക്കുന്ന ഇടങ്ങളില് ഫ്ലാഗ്മാനെ നിയോഗിച്ചില്ല
2. ആഴത്തില് കുഴിയെടുക്കുന്ന ഭാഗങ്ങളില് സര്വീസ് മതിയായ സംരക്ഷണ ബാരിക്കേഡുകള് സ്ഥാപിച്ചിട്ടില്ല
3. സര്വീസ് റോഡിനരികില് നിലവിലുള്ള വൈദ്യുതിക്കാലുകള് മാറ്റിയിട്ടില്ല
4. പ്രധാന റോഡുകളില്നിന്ന് സര്വീസ് റോഡുകളിലേക്ക് പ്രവേശിക്കുന്ന സ്ഥലങ്ങളില് എല്ലായിടത്തും വീതി കൂട്ടിയിട്ടില്ല
5. റോഡിന്റെ ഉയരം ക്രമീകരിച്ചിട്ടില്ല
6. മതിയായ വെളിച്ചം, മുന്നറിയിപ്പുബോര്ഡുകള്, റിഫ്ലക്ടറുകള് എന്നിവ സ്ഥാപിച്ചിട്ടില്ല
7. വെള്ളം ഒഴുകിപ്പോകുന്നതിനുള്ള സംവിധാനം എല്ലായിടത്തും പൂര്ത്തിയാക്കിയിട്ടില്ല. മഴയില് കൊരട്ടി ജങ്ഷനില് ശക്തമായ വെള്ളക്കെട്ട് രൂപപ്പെട്ടു
8. നിര്മാണപ്രവൃത്തികള് മന്ദഗതിയിലാണെന്നും ക്രെയിന് സൗകര്യം ഏര്പ്പെടുത്തിയിട്ടില്ലെന്നും റിപ്പോര്ട്ടിലുണ്ട്
കുരുക്ക് കഠിനമെന്ന് കളക്ടര്
ചിറങ്ങര അടിപ്പാതനിര്മാണസ്ഥലത്തും പരിസരത്തും വ്യാപകമായ ഗതാഗതക്കുരുക്കാണെന്ന പരാതിയെത്തുടര്ന്ന് ദേശീയപാതാ അതോറിറ്റിയുമായി മൂന്നുതവണ തൃശ്ശൂര് ജില്ലാ ഭരണകൂടം ചര്ച്ച നടത്തിയിരുന്നു. എന്നിട്ടും കുരുക്ക് ഒഴിവാക്കാന് നടപടി സ്വീകരിച്ചില്ല. തുടര്ന്ന് ടോള് നിര്ത്താന് ഏപ്രില് 16-ന് കളക്ടര് തീരുമാനമെടുത്തിരുന്നു. എന്നാല് ദേശീയപാതാ അതോറിറ്റി സാവകാശം ആവശ്യപ്പെട്ടതിനാല് ഉത്തരവ് പുറത്തിറങ്ങുംമുന്പ് പിന്വലിച്ചു. തുടര്ന്ന് ഏപ്രില് 22-ന് നടന്ന യോഗത്തില് 28-നകം ഗതാഗതക്കുരുക്കിന് പരിഹാരം കണ്ടില്ലെങ്കില് ഉത്തരവ് നടപ്പാക്കുമെന്ന് മുന്നറിയിപ്പ് നല്കിയിരുന്നു.
യോഗത്തില് നല്കിയ നിര്ദേശങ്ങള് പാലിക്കപ്പെട്ടിട്ടില്ലെന്നും അശാസ്ത്രീയമായും ആസൂത്രണമില്ലാതെയുമുള്ള നിര്മാണപ്രവൃത്തികള്മൂലം അടിയന്തരാവശ്യങ്ങള്ക്ക് പോകുന്ന വാഹനങ്ങളുള്പ്പെടെ മണിക്കൂറുകളോളം കുരുക്കില്പ്പെടുന്നത് ബോധ്യപ്പെട്ടിട്ടുണ്ടെന്നും കളക്ടറുടെ ഉത്തരവില് പറയുന്നു.
Content Highlights: Thrissur Collector suspends toll collection due to unsafe construction and traffic congestion
Published: 29 Apr 2025, 07:30 am IST
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



Most Commented