കോട്ടയം: കൊല്ലം-ദിണ്ടിക്കല്‍ ദേശീയപാതയില്‍ (എന്‍.എച്ച്. 183, കെ.കെ.റോഡ്) പുതിയ ബൈപ്പാസ് നിര്‍മിക്കാന്‍ ഏകദേശധാരണ. മണിപ്പുഴയില്‍നിന്ന് തുടങ്ങുന്നതിനുപകരം ബൈപ്പാസ് മുളങ്കുഴയില്‍നിന്ന് ആരംഭിക്കും.

To advertise here,

മുളങ്കുഴയില്‍നിന്ന് തുടങ്ങി ഈരയില്‍ക്കടവ് റോഡുവഴി കോട്ടയം-കറുകച്ചാല്‍, പുതുപ്പള്ളി-മണര്‍കാട്, പുതുപ്പള്ളി-പയ്യപ്പാടി, പയ്യപ്പാടി-കൊച്ചുമറ്റം റോഡുകള്‍ മറികടന്ന് പാമ്പാടി എട്ടാംമൈലില്‍ പ്രവേശിക്കുന്നവിധത്തിലാണ് രൂപരേഖ. ഫലത്തില്‍, എം.സി.റോഡും കെ.കെ.റോഡും തമ്മില്‍ ബന്ധിപ്പിക്കും.

നിലവിലുള്ള ഈരയില്‍ക്കടവ് റോഡ് മുന്നോട്ടുനീട്ടി കാക്കൂര്‍ ജങ്ഷന്‍-മുളങ്കുഴ വഴി ദേശീയപാതയില്‍ പ്രവേശിക്കണമെന്ന നിര്‍ദേശവും യോഗം അംഗീകരിച്ചു. ഏഴുകിലോമീറ്റര്‍ പാടത്തുകൂടിയാണ് റോഡ് പോകുന്നത്. ദേശീയപാതയില്‍ കൊടുങ്ങൂര്‍, 14-ാംമൈല്‍, പുളിക്കല്‍ക്കവല, പാമ്പാടി എന്നീ ജങ്ഷനുകളില്‍ പുതിയ ബൈപ്പാസ് നിര്‍മിക്കണമെന്ന് നിര്‍ദേശമുണ്ടായി. ഇതുസംബന്ധിച്ച് പുതിയ രൂപരേഖ തയ്യാറാക്കും.

പാമ്പാടി ജങ്ഷനിലെ റോഡ് വീതി കൂട്ടുന്നതിലെ പ്രശ്‌നങ്ങള്‍ കണക്കിലെടുത്ത്, വട്ടമലപ്പടിയില്‍ തുടങ്ങി കോത്തല 12-ാംമൈലില്‍ എത്തുന്നവിധത്തിലുള്ള പാമ്പാടി ബൈപ്പാസിന്റെ സാധ്യത പരിശോധിക്കാന്‍ യോഗത്തില്‍ ധാരണയായി. ഫ്രാന്‍സിസ് ജോര്‍ജ് എം.പി. കളക്ടറേറ്റില്‍ വിളിച്ചുചേര്‍ത്ത യോഗത്തിലാണ് തീരുമാനം. ദേശീയപാത വിഭാഗം തയ്യാറാക്കിയ ബൈപ്പാസിന്റെ രൂപരേഖ യോഗത്തില്‍ അവതരിപ്പിച്ചു.

കുമളിമുതല്‍ കോട്ടയംവരെ 24 മീറ്ററും കോട്ടയംമുതല്‍ കൊല്ലംവരെ 30 മീറ്റര്‍ വീതിയിലും റോഡ് വികസിപ്പിക്കാനാണ് ദേശീയപാത വിഭാഗം തീരുമാനിച്ചിരിക്കുന്നത്. സ്ഥലം ഏറ്റെടുക്കാന്‍ പ്രയാസമുള്ള മണര്‍കാടുമുതല്‍ കോടിമതവരെയുള്ള ഭാഗം ഒഴിവാക്കുന്നതിനാണ് ബൈപ്പാസ് എന്ന ആശയം ഉയര്‍ന്നത്. മോര്‍ത്ത് (ദേശീയ ഉപരിതലഗതാഗത മന്ത്രാലയം) ആണ് റോഡ് രൂപരേഖ തയ്യാറാക്കിയത്. 12.600 കിലോമീറ്റര്‍ ദൂരത്തിലും 30 മീറ്റര്‍ വീതിയിലുമാണ് റോഡ്. ഇതിനൊപ്പം നിലവിലുള്ള കെ.കെ.േറാഡ് 14 മീറ്റര്‍ വീതിയില്‍ നവീകരിക്കും.

ചീഫ് വിപ്പ് ഡോ. എന്‍.ജയരാജ്, തിരുവഞ്ചൂര്‍ രാധാകൃഷ്ണന്‍ എം.എല്‍.എ., ജില്ലാ പഞ്ചായത്തംഗം രാധ വി. നായര്‍, ദേശീയപാത വിഭാഗം എക്‌സിക്യുട്ടീവ് എന്‍ജിനീയര്‍ സി.രാകേഷ്, അസിസ്റ്റന്റ് എക്‌സിക്യുട്ടീവ് എന്‍ജിനീയര്‍ എ.എസ്.സുര, അസി. എന്‍ജിനീയര്‍ കെ.എം.അരവിന്ദ് എന്നിവര്‍ സംബന്ധിച്ചു.