ആലപ്പുഴ:സര്‍ക്കാരിന്റെയും സന്നദ്ധ സംഘടനകളുടെയും നേതൃത്വത്തില്‍ കേരളം ഒരേസമയം പരിചരിക്കുന്നത് രണ്ടരലക്ഷത്തോളം കിടപ്പുരോഗികളെ. ഇതിനായി രണ്ടായിരത്തോളം ഹോംകെയര്‍ യൂണിറ്റുകളാണ് പ്രവര്‍ത്തിക്കുന്നത്. കൂടുതലും സര്‍ക്കാര്‍ സംവിധാനത്തില്‍- 1,373 എണ്ണം.
ആരോഗ്യവകുപ്പ് പുറത്തുവിട്ട കണക്കിലാണ് ഇക്കാര്യമുള്ളത്. സേവനത്തിന്റെ ഗുണനിലവാരം കൂട്ടാനുള്ള നടപടി തദ്ദേശസ്ഥാപനങ്ങളുടെ സഹകരണത്തോടെ തുടങ്ങാന്‍ നിര്‍ദേശിച്ചിട്ടുണ്ട്. ചിലയിടങ്ങളില്‍ നടപടി തുടങ്ങി.
തദ്ദേശതലത്തില്‍ സാന്ത്വനപരിചരണ വിഭാഗങ്ങളെ ഏകോപിപ്പിക്കുക, മെഡിക്കല്‍ കോളേജ് ആശുപത്രികളിലും കാന്‍സര്‍ സെന്ററുകളിലും സാന്ത്വനപരിചരണം തുടങ്ങുക, ആരോഗ്യ, സന്നദ്ധ പ്രവര്‍ത്തകര്‍ക്കു പരിശീലനം നല്‍കുക, രോഗികളെ തൊഴില്‍പരമായി പുനരധിവസിപ്പിക്കുക എന്നിവയ്ക്കു പ്രാമുഖ്യം നല്‍കും.
വീടുകളില്‍ ഡോക്ടറുടെ സേവനവും നഴ്‌സിങ് പരിചരണവും നല്‍കുന്ന സ്ഥാപനങ്ങള്‍ക്കും കിടപ്പുരോഗികള്‍ക്ക് മാനസിക, സാമൂഹിക പിന്തുണയേകുന്ന സംഘടനകള്‍ക്കും സംസ്ഥാനതലത്തില്‍ രജിസ്‌ട്രേഷന്‍ നല്‍കുന്നുണ്ട്. സംഘടനകളിലുള്ളവര്‍ക്ക് ആരോഗ്യവകുപ്പ് വിവിധതലത്തില്‍ പരിശീലനം നല്‍കാന്‍ തുടങ്ങി.
കിടപ്പുരോഗി മരിച്ചതിനുശേഷവും വീടുകളില്‍ ആശ പ്രവര്‍ത്തകരെത്തും. ഈ കുടുംബത്തിന്റെ വിവരം സാമൂഹികാരോഗ്യകേന്ദ്രത്തിലെത്തി സഹായം നല്‍കുന്ന കാര്യങ്ങള്‍ ചര്‍ച്ചചെയ്യും.
ഇന്ത്യയില്‍ ആദ്യമായി പാലിയേറ്റീവ് നയം നടപ്പാക്കിയതു കേരളമാണ്, 2008-ല്‍. 2019-ല്‍ നയം പുതുക്കി.
Content Highlights: Keralas extensive home care system supports 2.5 lakh bedridden patients
Published: 02 Jan 2025, 09:35 am IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented