ആലപ്പുഴ: പോസ്റ്റൽ ബാലറ്റ് സമയത്ത് എത്താഞ്ഞതിനാൽ നൂറുകണക്കിനു പോളിങ് ഉദ്യോഗസ്ഥർക്ക് വോട്ടുചെയ്യാനായില്ല. മിക്ക ജില്ലകളിലും പ്രശ്നമുണ്ടായി. തങ്ങളുടെ വോട്ടവകാശം നിഷേധിക്കുന്നതിനെതിരേ അവർ പ്രതിഷേധിക്കുകയും ചെയ്തു. പോളിങ് സാമഗ്രി വാങ്ങാനെത്തുമ്പോൾ വോട്ടുചെയ്യാമെന്നാണ് അവരോടു കമ്മിഷൻ പറഞ്ഞത്. എന്നാൽ, അതിനെത്തിയപ്പോഴാണ് ഒട്ടേറെപ്പേർക്ക് ബാലറ്റ് വന്നിട്ടില്ലെന്നറിഞ്ഞത്.

To advertise here,

ചെങ്ങന്നൂർ ക്രിസ്ത്യൻ കോളേജിലെ പോളിങ് സാമഗ്രി വിതരണകേന്ദ്രത്തിൽ ബുധനാഴ്ച രാവില 7.45 മുതൽ വോട്ടു ചെയ്യാൻ നീണ്ട നിരയായിരുന്നു. ഇതിനുള്ള ഫെസിലിറ്റേഷൻ കേന്ദ്രം തുറന്നത് ഒൻപതുമണിയോടെയാണ്. വോട്ടെടുപ്പു തുടങ്ങിയപ്പോൾ പലരുടെയും ബാലറ്റ് എത്തിയിട്ടില്ലെന്നറിഞ്ഞു. അതോടെ, ഉദ്യോഗസ്ഥർ പ്രതിഷേധമറിയിച്ച് സാമഗ്രികൾ വാങ്ങി അതതു കേന്ദ്രങ്ങളിലേക്കു പോയി.

മറ്റു ജില്ലകളിൽ നിന്നെത്തിയവരാണ് ബാലറ്റ് കിട്ടാത്തതിൽ കൂടുതൽ. പലർക്കും ഉച്ചകഴിഞ്ഞ് ബാലറ്റ് എത്തിച്ചെങ്കിലും അവർ പോളിങ് കേന്ദ്രങ്ങളിലേക്കു പോയിരുന്നു. ആലപ്പുഴയിൽ ബാലറ്റ് വന്ന വിവരം ഉദ്യോഗസ്ഥരെ അറിയിച്ചെങ്കിലും തിരിച്ചുവരാൻ പലർക്കും കഴിഞ്ഞില്ല.

കാസർകോട്ട് മഷി തീർന്നതുകാരണം ഒരുമണിക്കൂർ വോട്ടിങ് നിർത്തിവെച്ചു. തൊടുപുഴയിൽ വരിനിന്ന് വോട്ടു ചെയ്യാനെത്തിയപ്പോഴാണ് ജീവനക്കാരിൽ പലരും പട്ടികയിൽ പേരില്ലെന്നറിഞ്ഞത്. അവിടെ ബാലറ്റ് ലഭ്യമാകാത്തതിനാൽ 1,000 പേരിൽ 400 പേർ മാത്രമാണ് വോട്ടുചെയ്തത്.

കോട്ടയത്ത് വോട്ടുചെയ്യാൻ കഴിയാഞ്ഞവർക്ക് പൊതുവോട്ടെടുപ്പു കഴിഞ്ഞ് വ്യാഴാഴ്ച രാത്രി 11 വരെ ഫെസിലിറ്റേഷൻ കേന്ദ്രങ്ങളിൽ അതിനുസൗകര്യമൊരുക്കുമെന്ന് അറിയിച്ചു.

ജീവനക്കാരുടെ വോട്ടവകാശം നഷ്ടപ്പെടുത്തുന്നതിനെതിരേ ഫെസ്റ്റോ(ഫെഡറേഷൻ ഓഫ് സ്റ്റേറ്റ് എംപ്ലോയീസ് ആൻഡ് ടീച്ചേഴ്സ് ഓർഗനൈസേഷൻ)യുടെ നേതൃത്വത്തിൽ മിക്ക ജില്ലകളിലും പ്രതിഷേധിച്ചു. ആലപ്പുഴ എസ്.ഡി. കോളേജിൽ പ്രതിഷേധ പ്രകടനം നടത്തിയ എൻ.ജി.ഒ. യൂണിയൻ ജില്ലാ ജോയിന്റ് സെക്രട്ടറി സി.സി. നയനൻ, ജില്ലാ സെക്രട്ടേറിയറ്റംഗം വിമൽ വി. ദേവ്, കെ.എസ്.ടി.എ. സംസ്ഥാന കമ്മിറ്റിയംഗം എം. സിന്ധു, എ.എൽ. മുനീർ എന്നിവരെ സൗത്ത്പോലീസ് അറസ്റ്റു ചെയ്തു. ഇവരെ പിന്നീട് വിട്ടയച്ചു. അമ്പലപ്പുഴ മണ്ഡലം റിട്ടേണിങ് ഓഫീസർ ജെ. മോബിയുടെ നിർദേശപ്രകാരമായിരുന്നു അറസ്റ്റ്.