കണ്ണൂര്‍: തീവണ്ടിയിലെ പ്രത്യേക വാഗണില്‍ കുതിര കണ്ണൂരിലിറങ്ങി. പരിപാലകര്‍ക്കൊപ്പം പ്രത്യേക ട്രക്കില്‍ ഏഴിമലയിലേക്ക്. ഉത്തര്‍പ്രദേശിലെ ഹേംപുരിൽനിന്ന് കൊണ്ടുവന്ന കുതിര ഇനി നാവിക അക്കാദമിയില്‍ കുതിക്കും. അക്കാദമിയില്‍ പരിശീലനത്തിലുള്ള ഓഫീസേഴ്‌സ് കേഡറ്റുമാര്‍ക്കുള്ള റൈഡിങ്ങിനായാണ് കുതിരകളെ കൊണ്ടുവന്നത്. തിങ്കളാഴ്ച വന്നതടക്കം നിലവില്‍ 37 കുതിരകള്‍ ഉണ്ട്. ഒക്ടോബറില്‍ അഞ്ച് കുതിരകള്‍കൂടി എത്തും.
ഉത്തര്‍പ്രദേശിലെ ഹേംപുര്‍, ഷാരണ്‍പുര്‍, ഹരിയാനയിലെ ഹിസാര്‍ എന്നിവിടങ്ങളില്‍നിന്നാണ് കുതിരകളെ കൊണ്ടുവരുന്നത്. ഇവയില്‍ ആണും പെണ്ണും ഉണ്ട്. ഭൂരിഭാഗവും തീവണ്ടിയിലാണ് കണ്ണൂരെത്തിയത്. അവിടെനിന്ന് നാവിക അക്കാദമിയുടെ ട്രക്കില്‍ നേവല്‍ ബേസിലെത്തിക്കും.
നാവിക അക്കാദമിയുടെ അകത്ത് പ്രവര്‍ത്തിക്കുന്ന ആര്‍മിയുടെ 15 സംഘമാണ് കുതിര സവാരി പഠിപ്പിക്കുന്നത്. കേഡറ്റുകളുടെ പേടി കുറക്കാനും ആത്മവിശ്വാസം കൂട്ടാനുമാണ് കുതിര റൈഡിങ് നടത്തുന്നത്. നാലുവര്‍ഷമാണ് നാവിക പരിശീലനം. മിന്നും പ്രകടനം കാഴ്ചവെക്കാന്‍ വനിതാ കേഡറ്റ്‌സുകളും ഉണ്ട്. ആദ്യവര്‍ഷം ഒഴികെ ബാക്കി വര്‍ഷങ്ങളിലാണ് കുതിരസവാരി പരിശീലനം. ഇതില്‍ മികവ് പുലർത്തുന്നവർ വിവിധ ഗെയിമുകളില്‍ മത്സരിക്കാന്‍ പോകും.
ഏപ്രിലില്‍ ഡല്‍ഹിയില്‍ നടന്ന ഡല്‍ഹി കുതിര പ്രദര്‍ശനത്തില്‍ നാല് മെഡലുകള്‍ ഏഴിമല ടീം നേടിയിരുന്നു. 2011-ലാണ് കുതിരകള്‍ ഇവിടെ വന്നുതുടങ്ങിയത്. അന്ന് 12 കുതിരകളായിരുന്നു ഉണ്ടായിരുന്നത്. ചാട്ടത്തിനും ഓട്ടത്തിനും ഗെയ്മുകൾക്കും വിവിധയിനം കുതിരകളെയാണ് ഉപയോഗിക്കുക. പാസിങ് ഔട്ട് പരേഡില്‍ പ്രധാന അഡ്ജുഡന്റ് കുതിരപ്പുറത്ത് സഞ്ചരിക്കും.
കുതിരകളെയെല്ലാം ഏഴിമല നാവിക അക്കാദമിക്കകത്താണ് താമസിപ്പിക്കുന്നത്. കുളിപ്പിക്കാനും തീറ്റകൊടുക്കാനും പ്രത്യേകം ജീവനക്കാരുണ്ട്. പ്രായമായവയെ ഹിസാറിലേക്ക് തിരിച്ചു കൊണ്ടുപോകും. 21 വര്‍ഷംവരെയാണ് കുതിരകളുടെ ആയുസ്സ്.
Content Highlights: horses for ezhimala naval academy reached safely
Published: 01 Jul 2025, 11:31 am IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented