കല്ലമ്പലം: തേവലക്കാട് എസ്.എൻ.യു.പി.എസ്. സ്കൂളിലെ അധ്യാപകൻ എസ്.എസ്. ആകർഷ്, ദളിത് വിദ്യാർഥിയെ ക്ലാസ് മുറിയിൽവെച്ച് ഈർക്കിൽകൊണ്ട് നാക്ക് വടിപ്പിച്ചെന്ന പരാതി, അധ്യാപകനെതിരേയുള്ള വ്യക്തിവിരോധം കാരണമുള്ളതായിരുന്നെന്ന് ഉപജില്ലാ വിദ്യാഭ്യാസ ഓഫീസറുടെ റിപ്പോർട്ട്.

To advertise here,

സ്കൂളിലുണ്ടായിരുന്ന ആഭ്യന്തരപ്രശ്നങ്ങളുടെ ഭാഗമായി അധ്യാപകനെതിരേ പ്രഥമാധ്യാപിക ദുഷ്ടലാക്കോടെ ചെയ്ത ഈ പ്രവൃത്തി ഒരുതരത്തിലും അഭികാമ്യമായി കാണുന്നില്ലെന്നും കിളിമാനൂർ എ.ഇ.ഒ.യുടെ അന്വേഷണറിപ്പോർട്ടിൽ പറയുന്നു. അധ്യാപകനെതിരേയെടുത്ത അച്ചടക്കനടപടി 15 ദിവസത്തെ സസ്പെൻഷനായി പരിമിതപ്പെടുത്തുകയും ചെയ്തു.

അധ്യാപകന്റെ സസ്പെൻഷൻ കാലാവധി നീട്ടണമെന്ന സ്കൂൾ മാനേജർ തോട്ടക്കാട് ശശി (വി. ശശീന്ദ്രൻ) നൽകിയ അപേക്ഷ തള്ളിയാണ് എ.ഇ.ഒ.യുടെ നടപടി. സംഭവം നടന്നുവെന്നു പറയുന്ന ദിവസം പ്രഥമാധ്യാപിക അവധിയായിരുന്നുവെന്നും തിരിച്ചെത്തിയശേഷം ക്ലാസ് ടീച്ചർമാരുടെയും കുട്ടികളുടെയും കൈയിൽനിന്നു പരാതി നിർബന്ധിച്ച് എഴുതിവാങ്ങുകയായിരുന്നുവെന്നും റിപ്പോർട്ടിൽ പറയുന്നു.

സംഭവത്തിൽ കുട്ടികൾക്കോ രക്ഷിതാക്കൾക്കോ പരാതിയില്ലെന്ന് രക്ഷിതാക്കൾ രേഖാമൂലം അറിയിച്ചിട്ടുണ്ട്. കുട്ടി ഇത്തരമൊരു വിഷമം വീട്ടിൽ പറഞ്ഞിട്ടില്ലെന്നും രക്ഷിതാക്കൾ അറിയിച്ചിരുന്നു. പരാതിക്ക് ബലം നൽകാൻ രക്ഷാകർത്താവുപോലുമറിയാതെ കുട്ടിയുടെ പേരിനൊപ്പം ജാതീയപരാമർശം ചേർത്തു.

കുട്ടികളിൽ ജാതീയമായ വിവേചനം രേഖപ്പെടുത്തി പ്രഥമാധ്യാപിക ചെയ്ത ഈ പ്രവൃത്തി ഒരിക്കലും അംഗീകരിക്കാൻ കഴിയില്ല. ഒക്ടോബർ 26 മുതൽ അധ്യാപകനെ സസ്പെൻഡ് ചെയ്ത ഉത്തരവ്, 15 ദിവസത്തേക്ക് പരിമിതപ്പെടുത്തിയതായും ഉത്തരവിൽ പറയുന്നു. കുട്ടികൾ ഈർക്കിൽവെച്ച് നാക്ക് വൃത്തിയാക്കിയ സംഭവത്തിൽ അധ്യാപകനുണ്ടായ ജാഗ്രതക്കുറവ് ആവർത്തിക്കാൻ പാടില്ലെന്നതിനാലാണ് 15 ദിവസത്തെ സസ്പെൻഷൻ നൽകുന്നത്.

കാലാവധി പൂർത്തിയാകുന്ന മുറയ്ക്ക് അധ്യാപകനെ സർവീസിൽ തിരിച്ചെടുക്കുന്നതിനുള്ള നടപടികൾ സ്വീകരിക്കാനും ഉത്തരവിൽ നിർദേശിച്ചിട്ടുണ്ട്. ജൂലായ് 30-ന് നടന്നതായി പറയുന്ന സംഭവത്തിൽ പ്രഥമാധ്യാപിക എ.എസ്. അനില ഒക്ടോബർ ഒൻപതിനാണ് ബാലാവകാശ കമ്മിഷന് പരാതി നൽകിയത്.

എ.ഇ.ഒ.യുടെ അന്വേഷണം നടക്കുന്നതിനിടെയാണ് ഒക്ടോബർ 26-ന് മാനേജർ അധ്യാപകനെ സസ്പെൻഡ് ചെയ്തത്. എ.ഇ.ഒ.യുടെ നിർദേശപ്രകാരം പ്രഥമാധ്യാപികയെയും മാനേജർ സസ്പെൻഡ് ചെയ്തിരുന്നെങ്കിലും പിന്നീട് പിൻവലിച്ചു.

നാക്ക് വടിക്കാൻ പറഞ്ഞിട്ടില്ല – എസ്.എസ്. ആകർഷ്

സാമൂഹികശാസ്ത്ര പാഠഭാഗവുമായി ബന്ധപ്പെട്ട് പഴയകാലത്ത് ഉപയോഗിച്ചിരുന്നതും ഇപ്പോൾ മാറ്റങ്ങളോടെ ഉപയോഗിക്കുന്നതുമായ വസ്തുക്കൾ പരിചയപ്പെടുത്തുന്നതിന്റെ ഭാഗമായി കുട്ടികൾക്ക് ഈർക്കിൽ പരിചയപ്പെടുത്തിയതാണെന്ന് അധ്യാപകൻ എസ്.എസ്. ആകർഷ് വിശദീകരിച്ചു.

ഒരു കുട്ടി ഈർക്കിൽ വാങ്ങിയിരുന്നുവെന്നും എന്നാൽ, ആ കുട്ടി അത് എന്ത് ചെയ്തുവെന്ന് തനിക്ക് അറിയില്ലെന്നും അദ്ദേഹം പറഞ്ഞു. കുട്ടിയുടെ നാക്ക് ഈർക്കിൽ ഉപയോഗിച്ച് വടിക്കാൻ താൻ നിർദേശിക്കുകയോ അത്തരമൊരു പ്രവർത്തനം ചെയ്യിക്കുകയോ ചെയ്തിട്ടില്ലെന്നും അധ്യാപകൻ പറഞ്ഞു.