കൊച്ചി: ചേരാനല്ലൂർ അപകടത്തിൽ കാറോടിച്ചിരുന്ന പതിനേഴുകാരന്റെ പിതാവായ അഡീഷണൽ സെഷൻസ് ജഡ്ജിയെ കേസന്വേഷിക്കുന്ന ക്രൈംബ്രാഞ്ച് സംഘം ഇന്നും ചോദ്യം ചെയ്യും. ചോദ്യം ചെയ്യലിനായി അദ്ദേഹത്തോട് രാവിലെ 11 മണിയോടെ ഹാജരാകാൻ ആവശ്യപ്പെട്ടിട്ടുണ്ട്. ബുധനഴ്ച ഇയാളെ മൂന്ന് മണിക്കൂറോളം ചോദ്യം ചെയ്തിരുന്നു. അതിനിടെ അഡീഷണൽ ജഡ്ജി മുൻകൂർ ജാമ്യം തേടി ഹൈക്കോടതിയെ സമീപിച്ചിട്ടുണ്ട്. ഇന്ന് തന്നെ ഈ ഹർജി പരിഗണിക്കും. ജസ്റ്റിസ് കൗസർ എടപ്പഗത്തിന്റെ ബെഞ്ചിന്റെ മുമ്പാകെയാണ് ഹർജി എത്തുക.

To advertise here,

ജഡ്ജിയുടെ ഫ്‌ളാറ്റിൽ ചൊവ്വാഴ്ച രാത്രിയും ബുധനാഴ്ച വൈകീട്ടും പോലീസ് പരിശോധനനടത്തി. 17-കാരൻ ഉപയോഗിച്ചിരുന്നതെന്ന് സംശയിക്കുന്ന ആഡംബരബൈക്ക് പോലീസ് കസ്റ്റഡിയിലെടുത്തു. ചില ഡിജിറ്റൽ ഉപകരണങ്ങളും കസ്റ്റഡിയിലെടുത്തിട്ടുണ്ട്.

അഡീഷണൽ സെഷൻസ് ജഡ്ജിയെ സസ്‌പെൻഡ് ചെയ്യേണ്ടതുണ്ടോ എന്നതടക്കമുള്ള കാര്യത്തിൽ പോലീസിന്റെ അന്വേഷണറിപ്പോർട്ട് ലഭിച്ചശേഷം ഹൈക്കോടതി തീരുമാനമെടുക്കും. ചീഫ് ജസ്റ്റിസ് സൗമെൻ സെന്നിന്റെ അധ്യക്ഷതയിൽ ചേർന്ന അഞ്ചംഗ അഡ്മിനിസ്ട്രേറ്റീവ് കമ്മിറ്റിയുടേതാണ് തീരുമാനം. കാർ എടുത്തുകൊണ്ടുപോയത് പിതാവിന്റെ അനുമതിയോടെയാണോ എന്നതിലടക്കം വ്യക്തതയില്ലാത്തത് കണക്കിലെടുത്താണ് അന്വേഷണ റിപ്പോർട്ടിനായി കാക്കുന്നത്. അപകടത്തിൽ മരിച്ച ജയബാലകൃഷ്ണന്റെ മക്കൾ ബുധനാഴ്ച ഹൈക്കോടതിയിലെത്തി രജിസ്ട്രാർ ജനറൽ ജി. ഗോപകുമാറിനെക്കണ്ട് ജുഡീഷ്യൽ ഓഫീസർക്കെതിരേ നിയമപരമായ നടപടി ആവശ്യപ്പെട്ട് പരാതി നൽകിയിട്ടുണ്ട്.

17കാരന്റെ ജാമ്യം റദ്ദാക്കണമെന്നാവശ്യപ്പെട്ട് പോലീസ് കോടതിയെ സമീപിക്കുകയും ചെയ്തിട്ടുണ്ട്. റീൽസ് ചിത്രീകരണത്തിനായി പ്രതി മുൻപും അതിവേഗത്തിൽ വാഹനമോടിച്ചിട്ടുണ്ടെന്നും അപകടസമയത്ത് വാഹനം 104 കി.മീ. വേഗത്തിലായിരുന്നെന്നും ചൂണ്ടിക്കാട്ടിയാണ് ഹർജി നൽകിയത്. പ്രതിയെ കസ്റ്റഡിയിൽ ചോദ്യംചെയ്യേണ്ടതിനാൽ ജാമ്യം റദ്ദാക്കണമെന്നാണ് ആവശ്യം. വെള്ളിയാഴ്ച വാദംകേൾക്കാനായി ഹർജി മാറ്റി. മജിസ്‌ട്രേറ്റ് പദവിയുള്ള, സ്ത്രീകളുടെയും കുട്ടികളുടെയും കേസുകൾ കൈകാര്യം ചെയ്യുന്ന കോടതി സമുച്ചയത്തിലെ ജുവനൈൽ കോടതിയിലാണ് വാദം കേട്ടത്. ജയബാലകൃഷ്ണന്റെ കുടുംബവും ജാമ്യത്തെ എതിർത്ത് കക്ഷി ചേർന്നിട്ടുണ്ട്. പ്രായപൂർത്തിയാവാത്തയാൾ കാറോടിച്ചതിൽ ഏഴുദിവസത്തിനകം വിശദീകരണം നൽകണമെന്നാവശ്യപ്പെട്ട് കാറുടമയായ ജഡ്ജിക്ക് മോട്ടോർ വാഹനവകുപ്പ് കാരണം കാണിക്കൽ നോട്ടീസ് നൽകി. വിശദീകരണം തൃപ്തികരമല്ലെങ്കിൽ വാഹനരജിസ്ട്രേഷൻ സസ്‌പെൻഡ്‌ചെയ്യുന്നതുൾപ്പെടെയുള്ള നടപടികളുണ്ടാവും.

'മകൻ കാറെടുത്തത് താനറിയാതെ'

കൊച്ചി: താനറിയാതെയാണ് മകൻ കാറുമായി പുറത്തു പോയതെന്ന മുൻനിലപാട് ക്രൈംബ്രാഞ്ചിനുമുന്നിലും ആവർത്തിച്ച് കാറോടിച്ചിരുന്ന പതിനേഴുകാരന്റെ പിതാവായ അഡീഷണൽ സെഷൻസ് ജഡ്ജി. ചേരാനല്ലൂർ സ്റ്റേഷനിൽ വെച്ച് ഇക്കാര്യം പറയുകയും ഇതിനായി വാട്‌സാപ്പ് ഗ്രൂപ്പിൽ അയച്ച സന്ദേശം പോലീസിനെ കാണിക്കുകയും ചെയ്തിരുന്നു. ഇക്കാര്യങ്ങൾ അന്ന് മൊഴിയായി രേഖപ്പെടുത്തിയിരുന്നില്ല. കേസ് ജില്ലാ ക്രൈംബ്രാഞ്ച് ഏറ്റെടുത്തതോടെയാണ് അന്വേഷണം ഔദ്യോഗിക നടപടിക്രമങ്ങളിലേക്ക് കടന്നത്.

അപകടശേഷമാണ് മകൻ വാഹനമെടുത്തുപോയത് അറിഞ്ഞതെന്നും പോലീസ് സ്റ്റേഷനിൽവെച്ച് ജയബാലകൃഷ്ണന്റെ കുടുംബത്തോട് ധിക്കാരപരമായി പെരുമാറിയില്ലെന്നും പ്രായപൂർത്തിയാകാത്ത വ്യക്തിയുടെ ചിത്രം പകർത്തുന്നത് നിയമവിരുദ്ധമാണെന്ന് ചൂണ്ടിക്കാട്ടുക മാത്രമാണ് ചെയ്തതെന്നും ജഡ്ജി ക്രൈംബ്രാഞ്ചിന് മൊഴി നൽകിയതായാണ് വിവരം.

അതേസമയം ബുധനാഴ്ച ഉച്ചകഴിഞ്ഞ് ജഡ്ജിയുടെ ഫ്‌ലാറ്റിൽ നടത്തിയ പരിശോധനയിൽ 17-കാരൻ കാറുമായി പോകുന്നതുൾപ്പെടെയുള്ള സി.സി.ടി.വി. ദൃശ്യങ്ങൾ ശേഖരിച്ചിട്ടുണ്ട്. ഫ്‌ലാറ്റിലെ ജീവനക്കാരുടെ മൊഴിയും രേഖപ്പെടുത്തി. ആഡംബര ബൈക്ക് പതിനേഴുകാരൻ ഉപയോഗിച്ചിരുന്നതായാണ് പോലീസ് സംശയിക്കുന്നത്. വാഹനത്തിന്റെ രജിസ്‌ട്രേഷനിലും പോലീസിന് സംശയമുണ്ട്. ഇക്കാര്യങ്ങളിലടക്കം വിശദ പരിശോധന നടത്തിവരുകയാണ്. ഫ്‌ലാറ്റിൽ ബുധനാഴ്ച വൈകീട്ടോടെ വീണ്ടും പരിശോധന നടത്തി. രാത്രി വൈകിയും പരിശോധന തുടരുകയാണ്.

അതേസമയം പ്രായപൂർത്തിയാകാത്ത മകൻ ഓടിച്ച കാറിടിച്ച് സ്‌കൂട്ടർ യാത്രക്കാരൻ മരിച്ച സംഭവത്തിൽ, കാർ ഉടമയായ ജഡ്ജി ഏഴുദിവസത്തിനകം മോട്ടോർ വാഹനവകുപ്പിന്റെ കാരണം കാണിക്കൽ നോട്ടീസിന് മറുപടി നൽകണം. പ്രായപൂർത്തിയാകാത്തയാൾക്ക് വാഹനം ഓടിക്കാൻ നൽകിയ സംഭവത്തിൽ നിയമപ്രകാരമുള്ള നടപടികളുടെ ഭാഗമായാണ് നോട്ടീസ് അയച്ചത്. കാറിന്റെ രജിസ്ട്രേഷൻ റദ്ദാക്കാതിരിക്കാൻ കാരണമുണ്ടെങ്കിൽ ഏഴു ദിവസത്തിനകം ബോധിപ്പിക്കണമെന്നാണ് നിർദേശം. നേരിട്ടോ ദൂതൻ മുഖേനയോ വിശദീകരണം നൽകാം.