കോട്ടയം: കവി സച്ചിദാനന്ദന് പിന്തുണയുമായി യാക്കോബായ സുറിയാനി സഭയുടെ മുതിർന്ന മെത്രാപ്പോലീത്ത ഗീവർഗീസ് മാർ കൂറിലോസ്. ബുധനാഴ്ച പങ്കുവച്ച ഫേസ്ബുക്ക് പോസ്റ്റിലൂടെയാണ് അദ്ദേഹം ഐക്യദാർഢ്യം അറിയിച്ചത്.

To advertise here,

അധികാരവർഗത്തിന് മുന്നിൽ സ്വന്തം നട്ടെല്ലും തലച്ചോറും പണയം വയ്ക്കുന്നതാണ് ഏറ്റവും വലിയ അടിമത്തം. ചിന്തിക്കുന്നത് കുറ്റമായി കാണുന്ന ഇന്നത്തെ സാഹചര്യത്തിൽ സച്ചിദാനന്ദൻ ചെയ്യുന്നത് ജോർജ് ഓർവെലിന്റെ ഭാഷയിലുള്ള 'ചിന്താ കുറ്റം' (thought crime) ആണെന്ന് അദ്ദേഹം പറഞ്ഞു.

ജാക്ക് രാൻ‌സിയേ, ഹാർഡ്റ്റ്, നെഗ്രി, സിസെക് തുടങ്ങിയ പ്രമുഖ ഇടതുപക്ഷ ചിന്തകരെ ഉദ്ധരിച്ചുകൊണ്ട് സച്ചിദാനന്ദൻ ഈ ചിന്താകുറ്റം വീണ്ടും ആവർത്തിക്കുകയാണെന്ന് മാർ കൂറിലോസ് ചൂണ്ടിക്കാട്ടി. ഇത്തരം നിലപാടുകൾ അധികാരികൾക്ക് പൊറുക്കാവുന്നതിനും അപ്പുറമാണെന്നും, എന്നാൽ താൻ ചിന്താകുറ്റകാർക്കൊപ്പം ഉറച്ചുനിൽക്കുമെന്നും വ്യക്തമാക്കിയാണ് അദ്ദേഹം തന്റെ കുറിപ്പ് അവസാനിപ്പിക്കുന്നത്.

തുടർഭരണം പാർട്ടിയെ നശിപ്പിക്കുമെന്നും തുടർച്ചയായ ഭരണത്തേക്കാൾ ജനാധിപത്യത്തിന് ഗുണകരമാകുക മാറിമാറിയുള്ള ഭരണമാണെന്നും സച്ചിദാനന്ദൻ കഴിഞ്ഞദിവസം അഭിപ്രായപ്പെട്ടിരുന്നു. നിയമസഭാ തിരഞ്ഞെടുപ്പ് ലക്ഷ്യമിട്ട് ഇടതുപക്ഷം പ്രചാരണം ശക്തമാക്കുന്നതിനിടെ തുടർഭരണം പാർട്ടിയെ ദുർബലപ്പെടുത്തുമെന്ന സച്ചിദാനന്ദന്റെ വാദം വിവാദമായ സാഹചര്യത്തിലാണ് ഗീവർഗീസ് മാർ കൂറിലോസിൻ്റെ പ്രതികരണം.