ചണ്ഡീഗഢ്: സ്‌കൂട്ടറിന്റെ പിന്‍സീറ്റില്‍ സഞ്ചരിക്കുകയായിരുന്ന ജാപ്പനീസ് വിനോദസഞ്ചാരിയില്‍നിന്ന് ഹെല്‍മറ്റ് ധരിക്കാത്തതിന് ആയിരം രൂപ കൈക്കൂലി വാങ്ങി ട്രാഫിക് പോലീസ്. ഹരിയാണയിലെ ഗുരുഗ്രാമിലാണ് സംഭവം. പിഴയെന്ന പേരില്‍ ആയിരം രൂപ ഈടാക്കിയെന്നാണ് ആരോപണം. ജപ്പാന്‍ സ്വദേശിയായ കയ്‌റ്റോ സംഭവത്തിന്റെ വീഡിയോ ദൃശ്യങ്ങള്‍ മെറ്റ സ്മാര്‍ട്ട് ഗ്ലാസിലൂടെ പകര്‍ത്തി സാമൂഹികമാധ്യമങ്ങളില്‍ പങ്കുവെച്ചതോടെയാണ് സംഭവം പുറത്തറിഞ്ഞത്. തുടര്‍ന്ന് കുറ്റക്കാരായ മൂന്ന് ട്രാഫിക് ഉദ്യോഗസ്ഥരെ ഗുരുഗ്രാം ട്രാഫിക് പോലീസ് സസ്‌പെന്‍ഡ് ചെയ്തു. കരണ്‍ സിങ്, ശുഭം, ഭൂപേന്ദര്‍ എന്നിവരാണ് സസ്‌പെന്‍ഷനിലായത്.
ഒരുദിവസം മുന്‍പാണ് നടന്ന സംഭവത്തിന്റെ വീഡിയോ ദൃശ്യങ്ങള്‍ ഇന്‍സ്റ്റാഗ്രാമില്‍ കയ്‌റ്റോ പങ്കുവെച്ചത്. വീഡിയോയുടെ തുടക്കത്തില്‍ ഒരു യുവതിക്കൊപ്പം സ്‌കൂട്ടറില്‍ കയ്‌റ്റോ യാത്രചെയ്യുന്നത് കാണാം. യൂ ടേണ്‍ എടുക്കുന്നതിനിടെ ട്രാഫിക് പോലീസ് കൈകാട്ടി വണ്ടി നിര്‍ത്തി. പിന്‍സീറ്റില്‍ ധരിക്കുന്നവര്‍ക്കും ഹെല്‍മറ്റ് നിര്‍ബന്ധമാണെന്നും ധരിക്കാത്തതിനാല്‍ ആയിരം രൂപ പിഴയൊടുക്കണമെന്നും ട്രാഫിക് പോലീസ് ആവശ്യപ്പെട്ടു. മുറി ഇംഗ്ലീഷില്‍ പിഴ ഇവിടെ അടച്ചില്ലെങ്കില്‍ കോടതിയില്‍ അടയ്‌ക്കേണ്ടി വരുമെന്ന് ട്രാഫിക് ഉദ്യോഗസ്ഥന് പറയുന്നത് വീഡിയോ ദൃശ്യങ്ങളില്‍ കാണാം.
പിഴ അടയ്ക്കാമെന്ന് സമ്മതിച്ച കയ്‌റ്റോ കാര്‍ഡ് ഉപയോഗിച്ചോട്ടെയെന്ന് ട്രാഫിക് ഉദ്യോഗസ്ഥരോട് ചോദിച്ചു. എന്നാല്‍, കാര്‍ഡ് പറ്റില്ലെന്നും പിഴ പണമായി അടയ്ക്കണമെന്നും ആവശ്യപ്പെട്ടു. തന്റെ കൈയിലുണ്ടായിരുന്ന 500-ന്റെ രണ്ട് നോട്ടുകള്‍ ഉദ്യോഗസ്ഥന് കയ്‌റ്റോ കൈമാറുന്നതും വീഡിയോയില്‍ കാണാം. പിന്നീട് പ്രദേശത്ത് പലരും ഹെല്‍മറ്റ് ധരിക്കാതെ യാത്രചെയ്യുന്നുണ്ടെന്ന് ട്രാഫിക് ഉദ്യോഗസ്ഥരോട് കയ്‌റ്റോ പറയുന്നതും ദൃശ്യങ്ങളില്‍ കാണാം. ഒരു വിദേശിയായതിനാലാണ് ഇത്തരമൊരു സംഭവം ഇന്ത്യയില്‍ നേരിടേണ്ടിവന്നതെന്ന് കയ്‌റ്റോ പിന്നീട് വിശദീകരിച്ചു.
കയ്‌റ്റോയ്ക്ക് നേരിടേണ്ടിവന്ന അനുഭവം സാമൂഹികമാധ്യമങ്ങളിലും വലിയ ചര്‍ച്ചയായി. നിരവധി പ്രതികരണങ്ങളാണ് വീഡിയോ പങ്കുവെച്ച കയ്‌റ്റോയ്ക്ക് ലഭിച്ചുകൊണ്ടിരിക്കുന്നത്. പിഴ വാങ്ങിയ ഉദ്യോഗസ്ഥര്‍ രസീത് നല്‍കാത്തതിനാല്‍ ഇത് കൈക്കൂലിയായി മാത്രമേ കാണാന്‍ കഴിയൂവെന്നാണ് സാമൂഹികമാധ്യമങ്ങളിലെ പലരും പറയുന്നത്. സസ്‌പെന്‍ഷന്‍ മാത്രം പോരാ, അവരെ ഏതാനും ദിവസം ജയിലിലടണമെന്നാണ് ഒരാള്‍ പ്രതികരിച്ചത്. സസ്‌പെന്‍ഷന്‍ ആയാലും ശമ്പളത്തിന്റെ ഒരു പങ്ക് ലഭിക്കുമെന്നതിനാല്‍ സസ്‌പെന്‍ഷന്‍ ചിലര്‍ക്ക് അനുഗ്രഹമാണെന്നാണ് മറ്റൊരാള്‍ പ്രതികരിച്ചത്. അതേസമയം, അഴിമതിക്കെതിരേ ഒരു വിട്ടുവീഴ്ചയുമില്ലെന്നും മൂന്ന് ഉദ്യോഗസ്ഥരെയും സസ്‌പെന്‍ഡ് ചെയ്തതായും തങ്ങളുടെ ഔദ്യോഗിക എക്‌സ് അക്കൗണ്ടില്‍ ഗുരുഗ്രാം ട്രാഫിക് പോലീസ് കുറിച്ചു.
Content Highlights: three gurugram police suspended after taking bribe from Japanese tourist
Published: 02 Sept 2025, 10:00 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented