റായ്‌പുർ: ബസ്തറിന്റെ വന്യതയിൽനിന്ന് ആയുധം താഴെവെച്ച് മടങ്ങിയെത്തിയവർ റാംപിൽ ചുവടുവെച്ചു. ഛത്തീസ്ഗഢിൽ കീഴടങ്ങിയ ഒൻപത് മാവോവാദി വനിതകളാണ് ഫാഷൻ റാംപിലെത്തിയത്. പരമ്പരാഗതമായ ഖാദിവസ്ത്രങ്ങളും കോസ സാരിയും ധരിച്ചായിരുന്നു ‘റാംപ്‌ വാക്ക്’.

To advertise here,

ഖാദി ദിനാചരണത്തിന്റെ ഭാഗമായി റായ്‌പുരിൽ ഏഴിന് നടന്ന നെയ്ത്തുകാരുടെ പരിപാടിയിലാണ് ഇവർക്കായി വേദിയൊരുങ്ങിയത്. മുംബൈയിൽനിന്നുള്ള ഫാഷൻവിദഗ്‌ധർ ഏഴുദിവസം പരിശീലനം നൽകി. ഛത്തീസ്ഗഢ് മുഖ്യമന്ത്രി വിഷ്ണു ദേവ് സായ് പരിപാടിയിൽ പങ്കെടുത്തു.

ജീവിതത്തിലൊരിക്കിലും ഇങ്ങനെയൊരു നിമിഷമുണ്ടാകുമെന്ന് കരുതിയിരുന്നില്ലെന്ന് സുക്മ സ്വദേശിയായ 22-കാരി പുനേം ജ്യോതി പറഞ്ഞു. 2025 ഡിസംബറിൽ ഹൈദരാബാദിലാണ് ജ്യോതി കീഴടങ്ങിയത്. കീഴടങ്ങിയതിനുപിന്നാലെ, സുക്മയിലെ പുനരധിവാസകേന്ദ്രത്തിലാണ് ഒൻപതുപേരും.