മുംബൈ: എൻ.സി.പി.യുടെ ഇരുവിഭാഗങ്ങളും തമ്മിൽ ലയനസാധ്യത തള്ളാതെ മഹാരാഷ്ട്ര ഉപമുഖ്യമന്ത്രിയും എൻ.സി.പി. അധ്യക്ഷയുമായ സുനേത്ര പവാർ. സമയമാവുമ്പോൾ കാര്യങ്ങൾ വ്യക്തമാവുമെന്ന് സുനേത്ര പ്രതികരിച്ചു. സ്വാതന്ത്ര്യസമര സേനാനി ബിർസ മുണ്ടയുടെ 191-ാം ജന്മവാർഷിക പരിപാടികൾ പ്രഖ്യാപിക്കുന്നതിനായി നടത്തിയ വാർത്താ സമ്മേളനത്തിനിടെയാണ് മാധ്യമങ്ങളുടെ ചോദ്യങ്ങളോട് പ്രതികരിച്ചത്.

To advertise here,

'നിങ്ങൾക്ക് കൂടുതൽ താത്പര്യം മറ്റൊരു വിഷയത്തിലാണെന്ന് എനിക്കറിയാം (ലയനത്തെക്കുറിച്ചുള്ള അഭ്യൂഹങ്ങളിൽ). സമയമാവുമ്പോൾ കാര്യങ്ങൾ വ്യക്തമാകുമെന്ന് ഞാൻ പറയാൻ ആഗ്രഹിക്കുന്നു,'സുനേത്ര പവാർ പറഞ്ഞു.

കഴിഞ്ഞദിവസങ്ങളിൽ എൻ.സി.പി.യിലെ മുതിർന്ന നേതാക്കൾ കേന്ദ്ര ആഭ്യന്തരമന്ത്രി അമിത്ഷായുമായി ഡൽഹിയിൽ കൂടിക്കാഴ്ച നടത്തിയിരുന്നു. എന്നാൽ, സുനേത്ര പവാറും മകനും ലോക്സഭാംഗവുമായ പാർഥ് പവാറും ഈ യോഗത്തിൽ പങ്കെടുത്തിരുന്നില്ല.

അതേസമയം, പാർഥ് പവാർ ഉൾപ്പെടെയുള്ള എൻ.സി.പി. നേതാക്കൾ എൻ.സി.പി. (എസ്.പി.) അധ്യക്ഷൻ ശരദ് പവാറുമായും കൂടിക്കാഴ്ച നടത്തി. അദ്ദേഹത്തിന്റെ ആരോഗ്യവിവരങ്ങൾ അന്വേഷിക്കുകമാത്രമായിരുന്നു കൂടിക്കാഴ്ചയുടെ ലക്ഷ്യമെന്നും രാഷ്ട്രീയ വിഷയങ്ങളൊന്നും ചർച്ചചെയ്തില്ലെന്നുമാണ് നേതാക്കളുടെ വിശദീകരണം.

എൻ.സി.പി.യുടെ ഇരുവിഭാഗങ്ങളും വീണ്ടും ഒന്നിക്കുമെന്ന ചർച്ചകൾ കുറച്ചുനാളുകളായി മഹാരാഷ്ട്ര രാഷ്ട്രീയത്തിൽ സജീവമാണ്. അന്തരിച്ച ഉപമുഖ്യമന്ത്രി അജിത് പവാറും ലയനത്തെ അനുകൂലിച്ചിരുന്നെന്ന് മുതിർന്ന എൻ.സി.പി. നേതാവ് സുനിൽ തത്കരെ കഴിഞ്ഞയാഴ്ച വെളിപ്പെടുത്തിയതോടെയാണ് അഭ്യൂഹങ്ങൾ വീണ്ടും ശക്തിയാർജിച്ചത്.