ചണ്ഡീഗഢ്: ഹരിയാന മുഖ്യമന്ത്രിയായി നായബ് സിങ് സൈനി വ്യാഴാഴ്ച സത്യപ്രതിജ്ഞ ചെയ്തു. പ്രധാനമന്ത്രി നരേന്ദ്രമോദി, കേന്ദ്ര ആഭ്യന്തരവകുപ്പ് മന്ത്രി അമിത് ഷാ, പ്രമുഖ ബി.ജെ.പി നേതാക്കള്‍ എന്നിവരുടെ സാന്നിധ്യത്തിലായിരുന്നു നായബിന്റെ സത്യപ്രതിജ്ഞ. പാഞ്ച്കുളയിലെ വാത്മീകി ക്ഷേത്രത്തില്‍ പൂജ നടത്തിയതിനുശേഷമാണ് നായബ് സത്യപ്രതിജ്ഞയ്‌ക്കെത്തിയത്. 

To advertise here,

ചടങ്ങ് പൊതുജനങ്ങള്‍ക്ക് കാണുവാനായി 14 വലിയ എന്‍.ഇ.ഡി സ്‌ക്രീനുകള്‍ സ്ഥാപിച്ച്, അമ്പതിനായിരത്തിലധികം ആളുകളുകളുടെ സാന്നിധ്യത്തിലാണ് നായബ് മുഖ്യമന്ത്രിയായത്. പ്രതിപക്ഷനേതാക്കളും കര്‍ഷകരും വിവിധ സാമൂഹികസംഘടനകളുടെ പ്രതിനിധികളും സത്യപ്രതിജ്ഞ ചടങ്ങിലേക്ക് ക്ഷണിക്കപ്പെട്ടിരുന്നു. 

സ്ഥാനമേറ്റതിനുശേഷം മുഖ്യമന്ത്രി മറ്റു മന്ത്രിമാരുമായും എന്‍.ഡി.എ സഖ്യത്തിലെ പ്രമുഖരും ചേര്‍ന്ന് സംസ്ഥാനത്തിന്റെ സമഗ്രോന്നതിയെക്കുറിച്ച് ചര്‍ച്ചകള്‍ നടത്തി. അടിയന്തരാവസ്ഥയുടെ അമ്പതാം വാര്‍ഷികവും ദേശീയവികസനം നേരിടുന്ന പ്രശ്‌നങ്ങളും അവര്‍ ചര്‍ച്ച ചെയ്തു. മഹാരാഷ്ട്രയിലും ഝാര്‍ഖണ്ഡിലും നടക്കാനിരിക്കുന്ന തിരഞ്ഞെടുപ്പുകളില്‍ സഖ്യം സ്വീകരിക്കേണ്ടതായ രാഷ്ട്രീയ തന്ത്രങ്ങളെക്കുറിച്ചും ചര്‍ച്ച നടത്തി.  

അമ്പത്തിയഞ്ചുകാരനായ നായബ് സിങ് സൈനി ഹരിയാനയിലെ പിന്നോക്ക സമുദായത്തിലാണ് ജനിച്ചുവളര്‍ന്നത്. വളരെ സാധാരണ കുടുംബത്തിലെ അംഗമായ സൈനി നിയമബിരുദധാരിയാണ്. 

ബി.ജെ.പി അംബാല പാര്‍ട്ടി ഓഫീസില്‍ കംപ്യൂട്ടര്‍ ഓപറേറ്ററായി ജോലി ചെയ്യാന്‍ വന്ന നായബിന് ഹരിയാന ബി.ജെ.പി കിസാന്‍ മോര്‍ച്ചയുടെ ജനറല്‍ സെക്രട്ടറിസ്ഥാനമാണ് പാര്‍ട്ടി ആദ്യം നല്‍കിയ ചുമതല. ബി.ജെ.പിയുടെ അംബാല യൂത്ത് വിങ്ങിന്റെ നേതാവായിരിക്കെയാണ് ബി.ജെ.പി നേതാവും കേന്ദ്രമന്ത്രിയുമായിരുന്ന മനോഹര്‍ ലാല്‍ ഖട്ടറിന്റെ ശ്രദ്ധയാകര്‍ഷിക്കുന്നത്. ഹരിയാനയിലെ ബി.ജെ.പി യുടെ മുഖ്യ അജണ്ടയായിരുന്ന ഗോസംരക്ഷണവും ഗോവധ നിരോധനവും നായബിന്റെയും രാഷ്ട്രീയ ആയുധങ്ങളായിരുന്നു.