ബിഹാർ: കോൺഗ്രസ് നേതാവ് സോണിയ ഗാന്ധിയുടെ ഓർമക്കുറിപ്പിനെച്ചൊല്ലിയുള്ള രാഷ്ട്രീയവിവാദം ജെഡിയുവിലേക്കും വ്യാപിക്കുന്നു. ഇന്ത്യാ മുന്നണിയിൽനിന്ന് ബിഹാർ മുൻ മുഖ്യമന്ത്രി നിതീഷ് കുമാർ പുറത്തുപോയതിനെക്കുറിച്ച് സോണിയ നടത്തിയ പരാമർശങ്ങൾക്കെതിരെ പാർട്ടി ശക്തമായ എതിർപ്പുമായി രംഗത്തെത്തി.

To advertise here,

2024 ജനുവരിയിൽ പ്രതിപക്ഷ നേതാക്കളുടെ യോഗത്തിൽനിന്ന് നിതീഷ് കുമാർ പെട്ടെന്ന് ഇറങ്ങിപ്പോയെന്നും നിസ്സാര കാരണം പറഞ്ഞാണ് അദ്ദേഹം യോഗംവിട്ടതെന്നും സോണിയ തന്റെ പുസ്തകത്തിൽ എഴുതിയിരുന്നു. നിതീഷിന്റെ മുന്നണിമാറ്റം നേരത്തേ ആസൂത്രണം ചെയ്തതായിരുന്നുവെന്നും പുസ്തകത്തിൽ സൂചിപ്പിച്ചിട്ടുണ്ട്.

എന്നാൽ, സോണിയയുടെ ഈ വിലയിരുത്തൽ ജെഡിയു തള്ളി. ഇന്ത്യ മുന്നണിയുടെ പ്രധാന ശിൽപി നിതീഷ് കുമാറായിരുന്നെന്നും പ്രതിപക്ഷപാർട്ടികളെ ഒരുമിച്ചുകൊണ്ടുവരുന്നതിൽ അദ്ദേഹം നിർണായക പങ്കുവഹിച്ചിരുന്നെന്നും പാർട്ടി വ്യക്തമാക്കി.

പൊതുസേവനത്തിനും ബിഹാറിന്റെ വികസനത്തിനുമായി ജീവിതം സമർപ്പിച്ച നേതാവിനെതിരെ കോൺഗ്രസ് വ്യക്തിപരവും നിലവാരമില്ലാത്തതുമായ പരാമർശങ്ങൾ നടത്തുകയാണെന്ന് ജെഡിയു ദേശീയ വർക്കിങ് പ്രസിഡന്റ് സഞ്ജയ് കുമാർ ഝാ ആരോപിച്ചു. പ്രതിപക്ഷ നേതാക്കളെ ഒരുമിപ്പിക്കാൻ നിതീഷ് രാജ്യത്തുടനീളം യാത്രചെയ്തിരുന്നെന്നും 2023 ജൂണിൽ പട്‌നയിൽ ഇന്ത്യ മുന്നണിയുടെ ആദ്യയോഗം സംഘടിപ്പിച്ചത് അദ്ദേഹമായിരുന്നെന്നും സഞ്ജയ് കുമാർ ഝാ ചൂണ്ടിക്കാട്ടി.

നിതീഷ് മുന്നണി വിടുന്നതിലേക്ക് നയിച്ച സാഹചര്യങ്ങളെക്കുറിച്ച് സോണിയയുടെ പുസ്തകത്തിൽ കൃത്യമായ വിശദീകരണമില്ലാത്തത് എന്തുകൊണ്ടാണെന്നും അദ്ദേഹം ചോദിച്ചു. കോൺഗ്രസിനെ ഉൾപ്പെടുത്താതെതന്നെ പ്രതിപക്ഷസഖ്യം രൂപീകരിക്കാനായിരുന്നു തുടക്കത്തിൽ പല നേതാക്കളുടെയും താൽപര്യമെന്നും എന്നാൽ, കോൺഗ്രസിനെകൂടി മുന്നണിയിൽ ഉൾപ്പെടുത്തണമെന്ന് നിതീഷ് നിർബന്ധം പിടിക്കുകയായിരുന്നെന്നും സഞ്ജയ് കുമാർ ഝാ കൂട്ടിച്ചേർത്തു. എൻഡിഎയെ നേരിടുക എന്ന പൊതുലക്ഷ്യത്തേക്കാൾ വ്യക്തിഗതവും പ്രാദേശികവുമായ രാഷ്ട്രീയ താൽപര്യങ്ങൾക്കാണ് മുന്നണിയിൽ പ്രാധാന്യമെന്ന് നിതീഷ് പിന്നീട് തിരിച്ചറിഞ്ഞെന്നും അദ്ദേഹം പറഞ്ഞു.

2024 ജനുവരിയിലായിരുന്നു നിതീഷ് കുമാറിന്റെ നിർണായക രാഷ്ട്രീയ ചുവടുമാറ്റം. ബിഹാർ മുഖ്യമന്ത്രിസ്ഥാനം രാജിവെച്ച അദ്ദേഹം മഹാസഖ്യ സർക്കാരിൽനിന്ന് പിന്മാറി വീണ്ടും എൻഡിഎയിൽ ചേർന്നിരുന്നു. തുടർന്ന് ഒൻപതാം തവണയും അദ്ദേഹം ബിഹാർ മുഖ്യമന്ത്രിയായി സത്യപ്രതിജ്ഞ ചെയ്തു.

2024 ലോക്‌സഭാ തിരഞ്ഞെടുപ്പിന് ഏതാനും മാസങ്ങൾക്കു മുമ്പായിരുന്നു നിതീഷിന്റെ മുന്നണിമാറ്റം. പ്രധാനമന്ത്രി നരേന്ദ്ര മോദിക്കെതിരെ പ്രതിപക്ഷത്തെ ഒറ്റക്കെട്ടായി അണിനിരത്താനുള്ള നീക്കത്തിന് ഇത് വലിയ തിരിച്ചടിയായി.