ദെഹ്റാദൂൺ: ലോക്സഭാ പ്രതിപക്ഷ നേതാവ് രാഹുൽ ഗാന്ധിയുടെ പേഴ്സണൽ അസിസ്റ്റന്റാണെന്ന് വിശ്വസിപ്പിച്ച് തിരഞ്ഞെടുപ്പിൽ മത്സരിക്കാൻ സീറ്റ് നൽകാമെന്ന വ്യാജേന പണം വാങ്ങി കബളിപ്പിച്ചതായി യുവതിയുടെ പരാതി. ഉത്തരാഖണ്ഡിലെ ദെഹ്റാദൂൺ സ്വദേശിനിയായ ഭാവന പാണ്ഡെയാണ് പരാതി നൽകിയത്. പ്രതി ഫോണിൽ വിളിച്ച് കനിഷ്ക എന്ന് പരിചയപ്പെടുത്തിയതായും തന്റെ പക്കൽ നിന്ന് 25 ലക്ഷം രൂപ തട്ടിയെടുത്തതായും യുവതിയുടെ പരാതിയിൽ പറയുന്നു.

To advertise here,

ഉത്തരാഖണ്ഡ് മുൻമുഖ്യമന്ത്രി ഹരീഷ് റാവത്ത്, എം‌എൽ‌എ യശ്പാൽ ആര്യ, മുൻമന്ത്രി ഹരക് സിങ് റാവത്ത്, ഉത്തരാഖണ്ഡ് കോൺഗ്രസ് അധ്യക്ഷൻ ഗണേഷ് ഗോദിയാൽ എന്നിവരടക്കമുള്ള നിരവധി രാഷ്ട്രീയ നേതാക്കളുടെ ശബ്ദങ്ങളെ അനുകരിക്കുന്ന ഓഡിയോ ക്ലിപ്പുകൾ ഉപയോഗിച്ച് പ്രതി ഗാന്ധിയുടെ പി.എ.യാണെന്ന് വിശ്വസിപ്പിച്ച് പാണ്ഡെയുടെ വിശ്വാസം നേടിയെടുത്തു.

ദെഹ്റാദൂണിലെ ഒരു ഹോട്ടലിൽ കോൺഗ്രസ് നേതാക്കളും എം‌എൽ‌എമാരും താമസിക്കുന്നുണ്ടെന്ന് പ്രതി വിശ്വസിപ്പിച്ചതായും പരാതിയിൽ പറയുന്നു. അസംബ്ലി മണ്ഡലങ്ങളുടെ സർവേകൾ നടത്തുകയാണെന്നും ഇതിന് ചെലവുകൾക്ക് പണം ആവശ്യമാണെന്നും കനിഷ്ക അറിയിച്ചു. ഇതിനെത്തുടർന്ന്, പിന്നീട് തിരികെ നൽകാമെന്ന് വാഗ്ദാനം ചെയ്ത് പ്രതി പണം ആവശ്യപ്പെട്ടു.

ഏപ്രിൽ 13 ന് ഭാവന പാണ്ഡെ തന്റെ ബാങ്ക് അക്കൗണ്ടിൽ നിന്ന് 9.5 ലക്ഷം രൂപയുടെ ആദ്യ ഇടപാട് നടത്തി. അതിനുശേഷം, അവർ ഏകദേശം 5 ലക്ഷം രൂപ പണമായി നൽകുകയും ബാക്കി തുക പ്രതിയുടെ മറ്റൊരു കൂട്ടാളിയായ മഹാരാഷ്ട്രയിൽ നിന്നുള്ള എം‌എൽ‌എയാണെന്ന് പരിചയപ്പെടുത്തിയ വ്യക്തിയ്ക്ക് തവണകളായി നൽകുകയും ചെയ്തു.

പണം തിരികെ ചോദിച്ചപ്പോൾ, പ്രതി ഒഴികഴിവുകൾ പറഞ്ഞും വ്യത്യസ്ത സമയപരിധികൾ പറഞ്ഞും ഒടുവിൽ ബന്ധം വിച്ഛേദിച്ചു. താൻ തട്ടിപ്പിന് ഇരയായെന്ന് മനസ്സിലാക്കിയ യുവതി പോലീസിൽ പരാതി നൽകി. ഇത് അടിസ്ഥാനമാക്കി, രാജ്പുർ പോലീസ് ഭാരതീയ ന്യായ സംഹിതയുടെ (BNS) ബന്ധപ്പെട്ട വകുപ്പുകൾ പ്രകാരം കേസ് രജിസ്റ്റർ ചെയ്ത് അന്വേഷണം ആരംഭിച്ചു.