ന്യൂഡൽഹി: പ്രധാനമന്ത്രി നരേന്ദ്ര മോദിയെ 'കോംപ്രമൈസ്ഡ് പ്രധാനമന്ത്രി' എന്ന് വിശേഷിപ്പിച്ച രാഹുൽ ഗാന്ധിക്കെതിരേ രൂക്ഷവിമർശനവുമായി ബിജെപി. ഇന്ത്യയെ അപകീർത്തിപ്പെടുത്താൻ രാഹുൽ ഗാന്ധിക്ക് പണം ലഭിക്കുന്നുണ്ടോയെന്ന് ബിജെപി വക്താവ് തുഹിൻ സിൻഹ ചോദിച്ചു. ഡൊണാൾഡ് ട്രംപ്, ഷി ജിൻപിങ്, പുതിൻ എന്നിവർ പങ്കെടുത്ത ത്രികക്ഷി കൂടിക്കാഴ്ചയുടെ പശ്ചാത്തലത്തിൽ രാഹുൽ നടത്തിയ വിമർശനത്തിനെതിരെയാണ് ബിജെപി രംഗത്തുവന്നിരിക്കുന്നത്.
നവംബർ 20-ന് എക്സിൽ പങ്കുവെച്ച കുറിപ്പിലാണ് രാഹുൽ ഗാന്ധി പ്രധാനമന്ത്രിക്കെതിരെ പരിഹാസമുയർത്തിയത്. ട്രംപ്, ഷി ജിൻപിങ്, പുതിൻ എന്നിവർ ഒരുമിച്ചിരിക്കുന്ന ചിത്രം പങ്കുവെച്ചുകൊണ്ടായിരുന്നു പ്രതികരണം. കോൺഗ്രസാണ് അധികാരത്തിലെങ്കിൽ ഇന്ത്യയുടെ പ്രധാനമന്ത്രിയും ഈ നേതാക്കൾക്കൊപ്പം മേശയ്ക്കു ചുറ്റും ഇരിക്കുമായിരുന്നുവെന്നും ഒത്തുതീർപ്പിന് വഴങ്ങിയ ഒരു പ്രധാനമന്ത്രിക്ക് ഒരിക്കലും ആ മേശയിൽ ഇരിക്കാനാകില്ലെന്നും ആയിരുന്നു രാഹുലിന്റെ പരാമർശം. നവംബർ 19-ന് ചൈനയിലെ ഷെൻഷെനിൽ ഏഷ്യ-പസഫിക് സാമ്പത്തിക സഹകരണ ഉച്ചകോടിക്കിടെയാണ് ട്രംപ്, ഷി ജിൻപിങ്, പുതിൻ എന്നിവർ കൂടിക്കാഴ്ച നടത്തിയത്. ആഗോള രാഷ്ട്രീയത്തിൽ മൂന്ന് വൻശക്തികളുടെ ഈ കൂടിക്കാഴ്ച വലിയ ശ്രദ്ധ നേടിയിരുന്നു.
രാഹുലിന്റെ പരാമർശത്തിന് മറുപടിയായി കോൺഗ്രസ് ഭരണകാലത്ത് ഇന്ത്യയുടെ ദേശീയ താൽപര്യങ്ങൾ വിട്ടുവീഴ്ച ചെയ്തുവെന്ന് ബിജെപി ആരോപിച്ചു. ഇന്ദിരാഗാന്ധിയുടെ കാലത്തെ ഷിംല കരാറും പാകിസ്താൻ യുദ്ധത്തടവുകാരെ വിട്ടയച്ച നടപടിയും മുൻ പ്രധാനമന്ത്രി മൻമോഹൻ സിങ്ങിന്റെ കാലത്തെ ഷാം എൽ ഷെയ്ഖ് പ്രസ്താവനയും തുഹിൻ സിൻഹ ചൂണ്ടിക്കാട്ടി.
ഷിംല കരാറിലൂടെ പാകിസ്താൻ സൈനികരെ വിട്ടയച്ചിട്ടും പിന്നീട് പാകിസ്താൻ ഇന്ത്യയ്ക്കെതിരെ ഭീകരവാദം പ്രോത്സാഹിപ്പിച്ചു എന്നായിരുന്നു സിൻഹയുടെ ആരോപണം. കോൺഗ്രസ് ഭരണകാലത്ത് ചൈനീസ് കമ്യൂണിസ്റ്റ് പാർട്ടിയുമായി ധാരണാപത്രം ഒപ്പിട്ടതും രാജീവ് ഗാന്ധി ഫൗണ്ടേഷനുമായി ബന്ധപ്പെട്ട സംഭാവനകളും അദ്ദേഹം ഉന്നയിച്ചു.
'ഇന്ത്യയെ അപകീർത്തിപ്പെടുത്താനാണ് രാഹുൽ ഗാന്ധിക്ക് പണം ലഭിക്കുന്നതെന്ന് തോന്നുന്നു' എന്നായിരുന്നു ബിജെപി നേതാവിന്റെ പരിഹാസം. ബിജെപി വക്താവ് ആർ.പി. സിങ്ങും രാഹുലിനെതിരെ രംഗത്തെത്തി. ഇന്ത്യയെക്കുറിച്ച് നിരന്തരം മോശം പ്രചാരണം നടത്തുകയാണ് രാഹുൽ ഗാന്ധിയെന്നായിരുന്നു അദ്ദേഹത്തിന്റെ ആരോപണം. പ്രധാനമന്ത്രി നരേന്ദ്ര മോദിക്ക് ലോകനേതാക്കളുമായി മികച്ച ബന്ധമുണ്ടെന്നും ഇന്നത്തെ ആഗോളക്രമത്തിൽ ഇന്ത്യയ്ക്ക് ശക്തമായ സ്ഥാനമാണുള്ളതെന്നും ആർ.പി. സിങ് അവകാശപ്പെട്ടു.
അമേരിക്കയിലെ ഷിക്കാഗോ സർവകലാശാലയിൽ നടത്തിയ പ്രസംഗത്തിലും ഇന്ത്യയുടെ വിദേശനയത്തെ രാഹുൽ ഗാന്ധി വിമർശിച്ചിരുന്നു. അന്താരാഷ്ട്ര വിഷയങ്ങളിൽ സ്വതന്ത്ര നിലപാടെടുക്കാനുള്ള ഇന്ത്യയുടെ കഴിവ് കുറഞ്ഞുവരികയാണെന്നും ആഗോള ചർച്ചകളിൽ ഇന്ത്യ ഒരു 'സൈഡ് പ്ലെയർ' മാത്രമായി മാറിയെന്നും അദ്ദേഹം ആരോപിച്ചു.
അതേസമയം, ഇറാനുമായും അമേരിക്കയുമായും പാകിസ്താൻ ചർച്ചകൾ നടത്തുമ്പോൾ ഇന്ത്യയ്ക്ക് ആഗോളതലത്തിൽ വേണ്ടത്ര ഇടപെടൽ നടത്താനാകുന്നില്ലെന്നായിരുന്നു രാഹുലിന്റെ വിമർശനം. ഇതിന് പിന്നാലെ രാഹുലിനെ 'പാകിസ്താൻ ഫാൻബോയ്' എന്ന് വിശേഷിപ്പിച്ച് ബിജെപി നേതാവ് പ്രദീപ് ഭണ്ഡാരിയും രംഗത്തെത്തിയിരുന്നു.
ട്രംപ്-ഷി-പുതിൻ കൂടിക്കാഴ്ചയെ ചൊല്ലിയുള്ള പുതിയ വാക്പോര് ഇന്ത്യയുടെ വിദേശനയവും ആഗോളതലത്തിലെ സ്വാധീനവും സംബന്ധിച്ച ബിജെപി-കോൺഗ്രസ് രാഷ്ട്രീയ പോരാട്ടത്തിന് പുതിയ മാനം നൽകിയിരിക്കുകയാണ്.
Content Highlights: Rahul Gandhi criticized PM Modi as a compromised prime minister following a high-profile global leaders' meeting., BJP spokesperson Tuhin Sinha questioned if Rahul Gandhi receives funds to defame India internationally., BJP leaders highlighted past Congress regimes to counter Rahul Gandhi's foreign policy criticisms.
Published: 20 Nov 2026, 04:55 pm IST
Related Topics
മാതൃഭൂമി.കോം വാട്സാപ്പിലും
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..



Most Commented