കൊല്‍ക്കത്ത: സമരത്തിനിടെ സന്ദേശ്ഖാലില്‍ ഞായറാഴ്ച തൃണമൂല്‍ കോണ്‍ഗ്രസ് പ്രവര്‍ത്തകരും ബി.ജെ. പി പ്രവര്‍ത്തകരും തമ്മില്‍ സംഘര്‍ഷം. തൃണമൂല്‍ എം.എല്‍.എ സുകുമാര്‍ മേഹ്ത്തയുടെ സഹായി തതന്‍ ഗയാന് ആക്രമിക്കപ്പെട്ടു. പോലീസ് സ്ഥലത്തെത്തിയാണ് സംഘര്‍ഷം നിയന്ത്രണ വിധേയമാക്കിയത്.
ബി.ജെ.പി പ്രവര്‍ത്തകര്‍ക്കെതിരേ തൃണമൂല്‍ സര്‍ക്കാര്‍ വ്യാജക്കേസുകള്‍ രജിസ്റ്റര്‍ ചെയ്യുന്നുവെന്ന് ചൂണ്ടിക്കാട്ടി സന്ദേശ്ഖാലിയില്‍ ഞായറാഴ്ച ബി.ജെ.പി പ്രവര്‍ത്തകരുടെ നേതൃത്വത്തില്‍ പോലീസ് സ്‌റ്റേഷന്‍ സമരം സംഘടിപ്പിച്ചിരുന്നു. ഇതിനിടെയായിരുന്നു ഇരുവിഭാഗങ്ങളും തമ്മില്‍ സംഘര്‍ഷമുണ്ടായത്. വനിതാ പ്രവര്‍ത്തകരാണ് എം.എല്‍.എയുടെ സഹായിയെ പ്രധാനമായും മര്‍ദിച്ചത്. ഇതിന്റെ വീഡിയോയും പുറത്തുവന്നിട്ടുണ്ട്. വിഷയം സംബന്ധിച്ച് മാധ്യമങ്ങളോട് സംസാരിക്കവേയാണ് തതന്‍ ഗയാന് മര്‍ദനമേറ്റത്.
തൃണമൂല്‍ കോണ്‍ഗ്രസ് നേതാവായ ഷെയ്ഖ് ഷാജഹാനെതിരേ ഭൂമി തട്ടിപ്പും ലൈംഗിക അതിക്രമ ആരോപണവും വന്നതോടെയായിരുന്നു സന്ദേശ്ഖാലി വിവാദത്തിലായത്. ഷെയ്ഖ് ഷാജഹാനെ പിന്നീട് പോലീസ് അറസ്റ്റ് ചെയ്യുകയും തൃണമൂല്‍ കോണ്‍ഗ്രസില്‍ നിന്ന് സസ്‌പെന്‍ഡ് ചെയ്യുകയും ചെയ്തിരുന്നു.
എന്നാല്‍ പീഡന വിവാദം കെട്ടിച്ചമച്ചതാണെന്നും ബംഗാള്‍ പ്രതിപക്ഷ നേതാവ് സുവേന്ദു അധികാരിയുടെ നിര്‍ദേശപ്രകാരമായിരുന്നു പരാതിക്കാരി കേസ് ഫയല്‍ ചെയ്തതെന്നും പറഞ്ഞുകൊണ്ട് പ്രാദേശിക ബി.ജെ.പി നേതാവിന്റെ വീഡിയോ പുറത്തുവന്നിരുന്നു. വീഡിയോ പുറത്തുവന്നതോടെ രാഷ്ട്രീയ നേട്ടത്തിന് വേണ്ടി ബി.ജെ.പി നടത്തിയ പ്രവര്‍ത്തിയാണെന്നാരോപിച്ച് തൃണമൂല്‍ കോണ്‍ഗ്രസും പ്രചാരണം തുടങ്ങിയിരുന്നു. പുറത്തുവന്ന വീഡിയോ വ്യാജമാണെന്നായിരുന്നു ബി.ജെ.പിയുടെ വിശദീകരണം.
Content Highlights: Bengals sandeshkhali trinamool mla aide attacked
Published: 12 May 2024, 06:29 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented