ജയ്പുർ: ദേശീയ പരീക്ഷാ ഏജൻസി (എൻ.ടി.എ) രാജ്യവ്യാപകമായി നടത്തിയ ഓൾ ഇന്ത്യ ആയുഷ് പോസ്റ്റ് ഗ്രാജുവേറ്റ് എൻട്രൻസ് ടെസ്റ്റ് (AIAPGET-2026) വൈദ്യുതി തടസ്സത്തെത്തുടർന്ന് മുടങ്ങി. ശനിയാഴ്ച ജയ്പുരിലെ ശ്രീ സത്യസായി പി.ജി കോളേജ് പരീക്ഷാ കേന്ദ്രത്തിൽ കമ്പ്യൂട്ടർ അധിഷ്ഠിത പരീക്ഷ എഴുതുകയായിരുന്ന 192 ഉദ്യോഗാർഥികളിൽ 49 പേർക്കാണ് പരീക്ഷ പൂർത്തിയാക്കാൻ സാധിക്കാതെവന്നത്. പരീക്ഷാ നടത്തിപ്പിന്റെ ചുമതലയുണ്ടായിരുന്ന ഏജൻസിയായ എഡ്യൂക്വിറ്റി കരിയർ ടെക്നോളജീസ് പ്രൈവറ്റ് ലിമിറ്റഡിന്റെ ഭാഗത്തുനിന്നുണ്ടായ സാങ്കേതിക തടസ്സത്തിൽ എൻ.ടി.എ ഖേദം പ്രകടിപ്പിച്ചു.

To advertise here,

ആദ്യ ഷിഫ്റ്റിൽ 10 മണിക്ക് പരീക്ഷ ആരംഭിച്ചതിന് തൊട്ടുപിന്നാലെ 10.15-ഓടെയാണ് വൈദ്യുതിബന്ധം വിച്ഛേദിക്കപ്പെട്ടത്. ഉച്ചയ്ക്ക് ശേഷമുള്ള രണ്ടാമത്തെ ഷിഫ്റ്റിലും വൈദ്യുതി തടസ്സം നീക്കാൻ കഴിയാത്തതിനെ തുടർന്ന് നിരവധി ഉദ്യോഗാർഥികൾ മണിക്കൂറുകളോളം പരീക്ഷാ കേന്ദ്രത്തിന് പുറത്ത് കാത്തുനിൽക്കേണ്ടി വന്നു. രാജ്യവ്യാപകമായി 200 പരീക്ഷാ കേന്ദ്രങ്ങളിലായി 35,837 ഉദ്യോഗാർഥികൾ ആദ്യ ഷിഫ്റ്റിൽ പരീക്ഷ പൂർത്തിയാക്കിയപ്പോഴാണ് ജയ്പുരിലെ കേന്ദ്രത്തിൽ മാത്രമാണ് സാങ്കേതിക തടസ്സം നേരിട്ടത്.

പരീക്ഷ പൂർത്തിയാക്കാൻ കഴിയാത്ത 49 ഉദ്യോഗാർഥികൾക്കായി സെപ്റ്റംബർ ഒന്നിന് രാവിലെ 10 മണിക്ക് പുനഃപരീക്ഷ നടത്താൻ എൻ.ടി.എ തീരുമാനിച്ചിട്ടുണ്ട്. ജയ്പുരിലെ 'രാജസ്ഥാൻ കോളേജ് ഓഫ് എഞ്ചിനീയറിങ് ഫോർ വുമൺ' പരീക്ഷാ കേന്ദ്രത്തിൽ വെച്ചായിരിക്കും ഈ പുനഃപരീക്ഷ നടക്കുക.

ബാധിക്കപ്പെട്ട ഉദ്യോഗാർഥികൾക്ക് പുതുക്കിയ അഡ്മിറ്റ് കാർഡുകൾ ഉടൻ ലഭ്യമാക്കുമെന്നും എന്തെങ്കിലും സംശയങ്ങളുള്ളവർക്ക് എൻ.ടി.എ ഹെൽപ്പ്‌ലൈൻ നമ്പറുകളിലോ aiapget@nta.ac.in എന്ന ഔദ്യോഗിക ഇമെയിൽ വിലാസത്തിലോ ബന്ധപ്പെടണമെന്നും അധികൃതർ അറിയിച്ചു.