ഡിജിറ്റൽ ട്രാൻസ്ഫർമേഷൻ, ബ്രാൻഡിങ്, ക്രിയേറ്റീവ് കമ്യൂണിക്കേഷൻ എന്നീ മേഖലകളിൽ 28 വർഷത്തിലേറെ അനുഭവസമ്പത്തുള്ള വ്യക്തിയാണ് ശാലിഭദ്ര ഷാ. കോർപ്പറേറ്റ് സ്ഥാപനങ്ങൾ, സർക്കാർ വകുപ്പുകൾ, വിദ്യാഭ്യാസ സ്ഥാപനങ്ങൾ, വിനോദ വ്യവസായം തുടങ്ങി വിവിധ മേഖലകളിൽ പ്രവർത്തിച്ചിട്ടുള്ള അദ്ദേഹം, സാങ്കേതികവിദ്യയും ആശയവിനിമയവും സംയോജിപ്പിച്ച് പുതിയ ബിസിനസ് സാധ്യതകൾ സൃഷ്ടിക്കുന്നതിൽ ശ്രദ്ധേയമായ പങ്കുവഹിച്ചിട്ടുണ്ട്. ദേശീയതലത്തിലുള്ള വിവിധ പദ്ധതികൾ, വൈബ്രന്റ് ഗുജറാത്ത് ഉച്ചകോടികൾ, വലിയ പ്രചാരണ പരിപാടികൾ, ഡിജിറ്റൽ കമ്യൂണിക്കേഷൻ സംരംഭങ്ങൾ എന്നിവയിലും അദ്ദേഹം പ്രവർത്തിച്ചിട്ടുണ്ട്.

To advertise here,

ഡിജിറ്റൽ വിനോദമേഖലയിൽ പുതിയൊരു കാഴ്ചപ്പാടുമായി മുന്നോട്ടുവരികയാണ് ഇപ്പോൾ ശാലിഭദ്ര ഷാ. അദ്ദേഹത്തിന്റെ നേതൃത്വത്തിൽ ആരംഭിച്ച ABC Talkies, സ്വതന്ത്ര സിനിമകൾക്കും മുഖ്യധാരാ ഒ.ടി.ടി. പ്ലാറ്റ്ഫോമുകളിൽ ഇടം ലഭിക്കാത്ത ചിത്രങ്ങൾക്കും പ്രേക്ഷകരിലേക്കെത്താനും വരുമാനം നേടാനും അവസരമൊരുക്കുന്ന ഓപ്പൺ ആക്സസ് ഫിലിം സ്ട്രീമിങ് പ്ലാറ്റ്ഫോമാണ്. ഇതിന്റെ തുടർച്ചയായി മലയാള സിനിമകൾക്ക് പ്രത്യേക പ്രാധാന്യം നൽകുന്ന My Talkies എന്ന സംരംഭവും ഒരുങ്ങുന്നു.

കേരള ഫിലിം ചേംബർ ഓഫ് കൊമേഴ്സിന്റെ (KFCC) സഹകരണത്തോടെയാണ് My Talkies മലയാള സിനിമാ മേഖലയിലേക്ക് ചുവടുവയ്ക്കുന്നത്. സിനിമകൾക്ക് പ്രദർശനത്തിനും വരുമാനത്തിനും കൂടുതൽ അവസരങ്ങൾ സൃഷ്ടിക്കുക, പ്രേക്ഷകർക്ക് കുറഞ്ഞ ചെലവിൽ ഇഷ്ടമുള്ള ചിത്രങ്ങൾ കാണാൻ അവസരം നൽകുക, പ്രാദേശിക ഭാഷാ സിനിമകളെ കൂടുതൽ വിപുലമായ പ്രേക്ഷകസമൂഹത്തിലേക്ക് എത്തിക്കുക എന്നിവയാണ് ഈ സംരംഭത്തിന്റെ പ്രധാന ലക്ഷ്യങ്ങൾ.

നിലവിൽ ആഗോള കമ്പനികൾ ആധിപത്യം പുലർത്തുന്ന ഒ.ടി.ടി. വിപണിയിൽ ABC Talkies, My Talkies എന്നിവ എങ്ങനെ വ്യത്യസ്തമാകുന്നു? മലയാള സിനിമയ്ക്ക് ഇതിലൂടെ എന്ത് നേട്ടമുണ്ടാകും? ആർട്ടിഫിഷ്യൽ ഇന്റലിജൻസ് സിനിമയുടെ ഭാവിയെ എങ്ങനെ മാറ്റും? ഈ വിഷയങ്ങളിലെല്ലാം ശാലിഭദ്ര ഷാ തന്റെ കാഴ്ചപ്പാടുകൾ പങ്കുവയ്ക്കുന്നു.

“എല്ലാ സിനിമകൾക്കും അവസരം ലഭിക്കണം; അതാണ് ഞങ്ങളുടെ ജനാധിപത്യപരമായ സമീപനം”

ഇന്ത്യയിൽ ഇന്ന് നിരവധി ഒ.ടി.ടി. പ്ലാറ്റ്ഫോമുകളുണ്ട്. ആഗോള കമ്പനികളും ദേശീയതലത്തിലുള്ള പ്രമുഖ പ്ലാറ്റ്ഫോമുകളും വിപണിയിൽ ശക്തരാണ്. ഈ സാഹചര്യത്തിൽ ABC Talkies, My Talkies എന്നിവ എന്താണ് വ്യത്യസ്തമായി മുന്നോട്ടുവയ്ക്കുന്നത്?

ഒ.ടി.ടി. വിപണി ഇതിനകം തന്നെ വളരെ സജീവമാണ്. എന്നാൽ നിലവിലുള്ള മിക്ക പ്ലാറ്റ്ഫോമുകളും അവരവരുടെ പ്രേക്ഷകവിഭാഗം, ഉള്ളടക്ക നയം, ബജറ്റ് എന്നിവ പരിഗണിച്ചാണ് സിനിമകൾ തിരഞ്ഞെടുക്കുന്നത്. ഓരോ പ്ലാറ്റ്ഫോമിനും സ്വന്തമായ മാനദണ്ഡങ്ങളുണ്ട്. ഉപഭോക്താക്കളെ നേടുകയും അവരെ പ്ലാറ്റ്ഫോമിൽ നിലനിർത്തുകയും ചെയ്യുക എന്നതാണ് അവരുടെ പ്രധാന ലക്ഷ്യം. അതുകൊണ്ടുതന്നെ ഒരു ഭാഷയിൽ നിർമ്മിക്കപ്പെടുന്ന എല്ലാ സിനിമകളും ഏറ്റെടുക്കാൻ അവർക്ക് സാധിക്കില്ല. ഇന്ത്യയിൽ ഓരോ വർഷവും വിവിധ ഭാഷകളിലായി ധാരാളം സിനിമകൾ നിർമ്മിക്കപ്പെടുന്നുണ്ട്. പ്രധാനപ്പെട്ട എല്ലാ ഒ.ടി.ടി. പ്ലാറ്റ്ഫോമുകളെയും ഒരുമിച്ച് പരിഗണിച്ചാലും വലിയൊരു വിഭാഗം സിനിമകൾക്ക് പ്രദർശനത്തിനും വരുമാനം നേടുന്നതിനും അനുയോജ്യമായ വേദി ലഭിക്കുന്നില്ല.

പല നിർമ്മാതാക്കൾക്കും മുന്നിലുള്ള ഏക പോംവഴി യൂട്യൂബ് പോലുള്ള പ്ലാറ്റ്ഫോമുകളാണ്. ഈ വിടവ് നികത്തുകയാണ് ABC Talkies-ന്റെയും My Talkies-ന്റെയും ലക്ഷ്യം. നിർമ്മിക്കപ്പെടുന്ന സിനിമകൾക്ക് പ്രേക്ഷകരിലേക്കെത്താനും അതിലൂടെ വരുമാനം നേടാനും കഴിയുന്ന ഒരു സമഗ്ര സംവിധാനം ഒരുക്കുകയാണ് ഞങ്ങൾ ചെയ്യുന്നത്.

“നോ ഇലക്ഷൻ, നോ റിജക്ഷൻ” — സിനിമകൾക്ക് തുറന്ന വാതിൽ

ABC Talkies ഒരു ഓപ്പൺ ആക്സസ് ഫിലിം സ്ട്രീമിങ് പ്ലാറ്റ്ഫോം എന്നാണ് വിശേഷിപ്പിക്കപ്പെടുന്നത്. എന്താണ് അതുകൊണ്ട് ഉദ്ദേശിക്കുന്നത്?

ഓപ്പൺ ആക്സസ് എന്നത് ജനാധിപത്യപരമായ ഒരു സമീപനമാണ്. ABC Talkies ആയാലും My Talkies ആയാലും ഞങ്ങളുടെ അടിസ്ഥാന ആശയം ഒന്നാണ്: “നോ ഇലക്ഷൻ, നോ റിജക്ഷൻ.”

ജനാധിപത്യത്തിൽ എല്ലാവർക്കും അവസരം ലഭിക്കണം. എല്ലാവർക്കും അഭിപ്രായം പ്രകടിപ്പിക്കാൻ കഴിയണം. അതേ ആശയം സിനിമാ വിതരണ മേഖലയിലും നടപ്പാക്കാനാണ് ഞങ്ങൾ ശ്രമിക്കുന്നത്.

ഒരു സിനിമയ്ക്ക് കഥയുണ്ടാകണം, നിശ്ചിത നിലവാരം പുലർത്തണം, സർക്കാർ മാർഗനിർദേശങ്ങളും ബാധകമായ നിയമങ്ങളും പാലിക്കണം. നിരോധിതമായ ഉള്ളടക്കങ്ങളോ നിയമലംഘനങ്ങളോ ഉണ്ടാകരുത്. ഈ മാനദണ്ഡങ്ങൾ പാലിക്കുന്ന സിനിമകൾക്ക് ഞങ്ങളുടെ പ്ലാറ്റ്ഫോമിൽ അവസരം നൽകുക എന്നതാണ് ലക്ഷ്യം. മറ്റൊരു പ്രധാന വ്യത്യാസം ഞങ്ങളുടെ പേ-പെർ-വ്യൂ മാതൃകയാണ്. ഒരു സിനിമ മാത്രം കാണാൻ ആഗ്രഹിക്കുന്ന പ്രേക്ഷകൻ അതിനായി ഒരു മാസത്തെയോ ഒന്നിലധികം മാസങ്ങളിലെയോ സബ്സ്ക്രിപ്ഷൻ എടുക്കേണ്ടതില്ല.

പ്രേക്ഷകർ കാണാൻ ആഗ്രഹിക്കുന്ന സിനിമയ്ക്ക് മാത്രം പണം നൽകിയാൽ മതി. സിനിമയുടെ അടിസ്ഥാനത്തിൽ രണ്ടോ മൂന്നോ രൂപ മുതൽ 15 അല്ലെങ്കിൽ 20 രൂപ വരെയുള്ള നിരക്കിൽ ചിത്രങ്ങൾ ലഭ്യമാക്കാനാണ് ഞങ്ങൾ ഉദ്ദേശിക്കുന്നത്. ഇതിലൂടെ വിനോദം കൂടുതൽ ആളുകൾക്ക് പ്രാപ്യമാകും.

My Talkies: മലയാള സിനിമയ്ക്ക് പുതിയൊരു വേദി

My Talkies പ്രധാനമായും മലയാള സിനിമകൾക്കായി രൂപപ്പെടുത്തിയതാണ്. കേരള ഫിലിം ചേംബർ ഓഫ് കൊമേഴ്സുമായി സഹകരിച്ച് ഇത്തരമൊരു സംരംഭം ആരംഭിക്കാൻ മലയാള സിനിമയെ തിരഞ്ഞെടുത്തത് എന്തുകൊണ്ടാണ്?

ഇതിന് പ്രധാനമായും രണ്ട് കാരണങ്ങളുണ്ട്. ഒന്നാമതായി, മലയാള സിനിമയുടെ കഥപറച്ചിൽ രീതി വളരെ സവിശേഷമാണ്. നമ്മുടെ ജീവിതത്തോടും സമൂഹത്തോടും ചേർന്നുനിൽക്കുന്ന കഥകൾ മലയാള സിനിമയിൽ ധാരാളമുണ്ട്. അതുകൊണ്ടുതന്നെ ഭാഷ അറിയാത്തവർക്കുപോലും ഇത്തരം കഥകളോട് താത്പര്യം തോന്നുന്നുണ്ട്. മലയാള സിനിമയ്ക്ക് ഇന്ത്യയിലും വിദേശത്തും സ്വീകാര്യത വർധിക്കുന്നതും കാണുന്നു.

രണ്ടാമതായി, മലയാള സിനിമാ വ്യവസായത്തിന്റെ സംഘടനാ സംവിധാനവും വിവിധ മേഖലകളിലെ പ്രവർത്തനരീതികളും താരതമ്യേന വ്യക്തമായി നിർവചിക്കപ്പെട്ടിട്ടുണ്ട്. വ്യവസായത്തിലെ വിവിധ സംഘടനകളും പങ്കാളികളും പുതിയ ആശയങ്ങളോട് പ്രതികരിക്കുന്നവരാണ്.

ഈ സംരംഭം മുന്നോട്ടുകൊണ്ടുപോകുന്നതിൽ കേരള ഫിലിം ചേംബർ ഓഫ് കൊമേഴ്സ് സജീവമായ പിന്തുണയാണ് നൽകിയത്. നിർമ്മാതാക്കളുടെ ഭാഗത്തുനിന്നും നല്ല പ്രതികരണം ലഭിച്ചിട്ടുണ്ട്. സുതാര്യത ഉറപ്പാക്കുക, എല്ലാവർക്കും പ്രയോജനകരമായ ഒരു സംവിധാനം സൃഷ്ടിക്കുക എന്നിവയാണ് ഞങ്ങളുടെ ലക്ഷ്യം.

മലയാള സിനിമയെ തുടക്കമാക്കി, ഭാവിയിൽ ഈ മാതൃക മറ്റു ഭാഷകളിലേക്കും വ്യാപിപ്പിക്കാൻ കഴിയുമെന്നാണ് പ്രതീക്ഷിക്കുന്നത്. ഇന്ത്യൻ സിനിമാ വ്യവസായത്തിന് തന്നെ മാതൃകയാകാവുന്ന ഒരു സംവിധാനമായി ഇത് വളരാൻ സാധ്യതയുണ്ട്.

വരുമാനം ലഭിക്കാതെ പോകുന്ന സിനിമകൾക്ക് പുതിയ പ്രതീക്ഷ

സിനിമകൾ, നിർമ്മാതാക്കൾ, പ്രേക്ഷകരുടെ പെരുമാറ്റം, വിപണിയിലെ സാധ്യതകൾ എന്നിവ സംബന്ധിച്ച ഡാറ്റയുടെ അടിസ്ഥാനത്തിലാണോ ഈ സംരംഭം മുന്നോട്ടുകൊണ്ടുപോകുന്നത്?

വിപണിയിലെ സിനിമകളുടെ അവസ്ഥ പരിശോധിക്കുമ്പോൾ, വലിയൊരു വിഭാഗം ചിത്രങ്ങൾക്ക് തിയേറ്റർ റിലീസിന് ശേഷം വരുമാനം നേടാൻ കഴിയുന്നില്ലെന്നതാണ് ഞങ്ങളുടെ വിലയിരുത്തൽ.

ഞങ്ങളുടെ കണക്കുകൂട്ടലിൽ, നിർമ്മിക്കപ്പെടുന്ന സിനിമകളിൽ ഏകദേശം 70 ശതമാനത്തിനും ഫലപ്രദമായി വരുമാനം നേടാൻ കഴിയുന്നില്ല. യഥാർഥ കണക്ക് ഇതിലും കൂടുതലായിരിക്കാം. മലയാള സിനിമാ വ്യവസായത്തിൽ പ്രതിവർഷം ഏകദേശം 180 മുതൽ 240 വരെ സിനിമകൾ നിർമ്മിക്കപ്പെടുന്നുണ്ടെങ്കിൽ, അതിൽ ഏകദേശം 120 മുതൽ 130 സിനിമകൾക്ക് തിയേറ്റർ റിലീസിന് ശേഷം വരുമാനം കണ്ടെത്തുന്നതിൽ പ്രശ്നങ്ങളുണ്ടാകാം. ഇത് ഞങ്ങളുടെ പ്ലാറ്റ്ഫോമിന് വലിയൊരു സാധ്യതയാണ് തുറന്നുതരുന്നത്. ഇതിനകം നിർമ്മിച്ച സിനിമകളിൽനിന്ന് കൂടുതൽ വരുമാനം നേടാൻ നിർമ്മാതാക്കൾക്ക് മറ്റൊരു വഴി നൽകുകയാണ് ഞങ്ങൾ ലക്ഷ്യമിടുന്നത്.

പ്രേക്ഷകരുടെ കാര്യത്തിൽ, ട്രാൻസാക്ഷണൽ വീഡിയോ ഓൺ ഡിമാൻഡ് അഥവാ TVOD എന്നറിയപ്പെടുന്ന പേ-പെർ-വ്യൂ സംവിധാനം ഇന്ത്യയിൽ ഇപ്പോഴും വ്യാപകമായി സ്വീകരിക്കപ്പെട്ടിട്ടില്ല. ഈ മാതൃക ലോകത്തിന്റെ വിവിധ ഭാഗങ്ങളിൽ നിലവിലുണ്ടെങ്കിലും ഇന്ത്യയിൽ വില ഒരു പ്രധാന ഘടകമാണ്.

ഒരു കപ്പ് ചായയുടെ വിലയ്ക്ക് വിനോദം ലഭ്യമാക്കുക എന്നതാണ് ഞങ്ങളുടെ സമീപനം. വില പ്രേക്ഷകർക്ക് താങ്ങാനാകുന്നതാണെങ്കിൽ, ഒരിക്കൽ മാത്രം കാണാൻ ഉദ്ദേശിക്കുന്ന സിനിമയ്ക്കുപോലും പണം നൽകാൻ അവർ തയ്യാറാകുമെന്നാണ് ഞങ്ങളുടെ വിശ്വാസം.ABC Talkies-ൽ പണം നൽകി ഉള്ളടക്കം കാണാൻ തയ്യാറാകുന്നവരുടെ എണ്ണത്തിൽ വളർച്ച ഞങ്ങൾ കണ്ടിട്ടുണ്ട്. അതിനാൽ ഈ മാതൃക നിർമ്മാതാക്കൾക്കും പ്രേക്ഷകർക്കും ഒരുപോലെ ഗുണകരമാകുമെന്നാണ് പ്രതീക്ഷ.

സിനിമ കാണുന്നതിലുപരി, സമഗ്രമായൊരു സിനിമാ ആവാസവ്യവസ്ഥ ഉണ്ടാക്കണം

പ്രേക്ഷകർക്ക് സിനിമകൾ കാണാനുള്ള ഒരു പ്ലാറ്റ്ഫോം എന്നതിലുപരി, നിർമ്മാതാക്കൾക്കും പ്രേക്ഷകർക്കും എന്തെല്ലാം അധിക നേട്ടങ്ങളാണ് നിങ്ങളുടെ സംരംഭം നൽകുന്നത്?

പ്രേക്ഷകരെ സംബന്ധിച്ചിടത്തോളം, മറ്റെവിടെയും എളുപ്പത്തിൽ ലഭിക്കാത്ത നിരവധി സിനിമകളും കഥകളും കാണാൻ കഴിയുമെന്നതാണ് പ്രധാന നേട്ടം. ആവർത്തിച്ചുള്ള സബ്സ്ക്രിപ്ഷൻ ഫീസ് നൽകാതെ, തങ്ങൾക്ക് ഇഷ്ടമുള്ള സിനിമകൾ മാത്രം തിരഞ്ഞെടുക്കാം. കൂടുതൽ സമയം പ്ലാറ്റ്ഫോമിൽ ചെലവഴിക്കുകയും കൂടുതൽ ഉള്ളടക്കം കാണുകയും ചെയ്യുന്ന പ്രേക്ഷകർക്ക് പ്രോത്സാഹനങ്ങൾ നൽകുന്നതിനുള്ള സാധ്യതകളും ഞങ്ങളുടെ ബിസിനസ് മാതൃകയിലുണ്ട്. ഇതുവഴി പ്രേക്ഷകരുമായുള്ള ബന്ധം കൂടുതൽ ശക്തമാക്കാൻ കഴിയും.

നിർമ്മാതാക്കൾക്കായി ഞങ്ങൾ ലക്ഷ്യമിടുന്നത് ഒരു ഒ.ടി.ടി. പ്ലാറ്റ്ഫോമിൽ മാത്രം ഒതുങ്ങുന്ന സംവിധാനമല്ല. സിനിമകൾ വിവിധ വിതരണ മാർഗങ്ങളിലൂടെ പ്രേക്ഷകരിലേക്കെത്തിക്കാൻ സഹായിക്കുന്ന ഒരു വിപുലമായ ശൃംഖലയാണ്. ABC Talkies വഴി ഡിജിറ്റൽ സ്ട്രീമിങ്ങിനുപുറമേ, ആഗോള പ്ലാറ്റ്ഫോമുകൾ, സാറ്റലൈറ്റ് ടെലിവിഷൻ, വിമാനങ്ങളിലെയും കപ്പലുകളിലെയും വിനോദ സംവിധാനങ്ങൾ, കേബിൾ നെറ്റ്വർക്കുകൾ എന്നിവയിലേക്കും സിനിമകളെ എത്തിക്കുന്നതിനുള്ള അവസരങ്ങൾ ഒരുക്കാനാണ് ഞങ്ങൾ ശ്രമിക്കുന്നത്.

ഒരൊറ്റ ഒ.ടി.ടി. പ്ലാറ്റ്ഫോമിന്റെ തീരുമാനത്തെ മാത്രം ആശ്രയിക്കേണ്ട സാഹചര്യം നിർമ്മാതാക്കൾക്ക് ഉണ്ടാകരുത്. സിനിമയുടെ വിതരണത്തിനും വരുമാനത്തിനും കൂടുതൽ വഴികൾ തുറക്കണം. പ്ലാറ്റ്ഫോം വളരുകയും വ്യവസായത്തിന്റെ പിന്തുണ വർധിക്കുകയും ചെയ്യുന്നതനുസരിച്ച്, സിനിമകൾക്ക് അവസാനഘട്ട ധനസഹായം, മാർക്കറ്റിങ് പിന്തുണ തുടങ്ങിയ സേവനങ്ങളും ഭാവിയിൽ പരിഗണിക്കാനാണ് ഉദ്ദേശിക്കുന്നത്. സിനിമകൾ നിർമ്മിക്കുന്നതുമുതൽ വിതരണം ചെയ്യുന്നതും പ്രേക്ഷകരിലേക്കെത്തിക്കുന്നതും വരുമാനം നേടുന്നതും വരെയുള്ള വിവിധ ഘട്ടങ്ങളെ പരസ്പരം ബന്ധിപ്പിക്കുന്ന ഒരു സംവിധാനമാണ് ഞങ്ങളുടെ ലക്ഷ്യം.

ദക്ഷിണേന്ത്യൻ സിനിമയുടെ ആഗോള സാധ്യതകൾ

മലയാളം, തമിഴ്, തെലുങ്ക്, കന്നഡ എന്നീ ദക്ഷിണേന്ത്യൻ ഭാഷകളിലെ സിനിമകൾക്ക് വരുംതലമുറയിൽ കൂടുതൽ പ്രാധാന്യം ലഭിക്കുമെന്ന വിലയിരുത്തൽ വ്യാപകമാണ്. ഈ അഭിപ്രായത്തോട് യോജിക്കുന്നുണ്ടോ?

കഴിഞ്ഞ അഞ്ചോ ആറോ വർഷങ്ങളിലെ സിനിമകളുടെ സ്വീകാര്യത പരിശോധിച്ചാൽ ഈ അഭിപ്രായത്തിന് വലിയ അടിസ്ഥാനമുണ്ടെന്ന് കാണാം. ദക്ഷിണേന്ത്യൻ ഭാഷകളിലെ സിനിമകൾക്ക് ഇന്ത്യയിലും വിദേശത്തും പ്രേക്ഷകരെ ലഭിക്കുന്നുണ്ട്. മറ്റു ഭാഷകളിലേക്ക് മൊഴിമാറ്റം നടത്തി എളുപ്പത്തിൽ ലഭ്യമാക്കുമ്പോൾ കൂടുതൽ ആളുകൾ ഇത്തരം സിനിമകൾ കാണാൻ തയ്യാറാകുന്നു. മലയാള സിനിമയുടെ പ്രത്യേകത അതിന്റെ കഥകളിലാണ്. സാധാരണ മനുഷ്യരുടെ ജീവിതത്തോടും അനുഭവങ്ങളോടും ചേർന്നുനിൽക്കുന്ന കഥകൾ ഇവിടെ ധാരാളമുണ്ട്. സിനിമയുടെ വിജയം എല്ലായ്പ്പോഴും വലിയ താരങ്ങളെയോ വലിയ ബജറ്റിനെയോ ആശ്രയിച്ചിരിക്കണമെന്നില്ല. പുതുമുഖങ്ങളോ അധികം അറിയപ്പെടാത്ത അഭിനേതാക്കളോ അഭിനയിച്ച സിനിമകളും മികച്ച ബോക്സ് ഓഫീസ് വിജയം നേടിയിട്ടുണ്ട്. നല്ല കഥയാണെങ്കിൽ, സിനിമയുടെ നിർമ്മാണച്ചെലവോ അഭിനേതാക്കളുടെ താരമൂല്യമോ മാത്രം നോക്കിയല്ല പ്രേക്ഷകർ അതിനെ സ്വീകരിക്കുന്നത് എന്നതിന്റെ സൂചനയാണിത്.

വിതരണ സംവിധാനങ്ങൾ മെച്ചപ്പെടുകയും ഭാഷാപരമായ തടസ്സങ്ങൾ കുറയുകയും ചെയ്യുന്നതോടെ പ്രാദേശിക സിനിമകൾക്ക് കൂടുതൽ വലിയ പ്രേക്ഷകസമൂഹത്തിലേക്ക് എത്താൻ കഴിയും. ഇതിലൂടെ സിനിമാ നിർമ്മാതാക്കൾക്ക് പുതിയ അവസരങ്ങൾ ലഭിക്കുമെന്നാണ് ഞാൻ കരുതുന്നത്.

സിനിമാ ലോകത്ത് ആർട്ടിഫിഷ്യൽ ഇന്റലിജൻസിന്റെ വരവ്

ആർട്ടിഫിഷ്യൽ ഇന്റലിജൻസ് വിനോദമേഖലയിൽ വലിയ മാറ്റങ്ങൾ സൃഷ്ടിച്ചുകൊണ്ടിരിക്കുകയാണ്. പൂർണമായും AI ഉപയോഗിച്ച് സിനിമകൾ നിർമ്മിക്കുന്നതിനെക്കുറിച്ചും നിങ്ങളുടെ ഒ.ടി.ടി. പ്ലാറ്റ്ഫോമുകളിൽ AI ഉപയോഗിക്കുന്നതിനെക്കുറിച്ചും എന്താണ് അഭിപ്രായം?

AIയെക്കുറിച്ച് സംസാരിക്കുമ്പോൾ രണ്ട് കാര്യങ്ങൾ വേർതിരിച്ചു കാണണം. ഒന്ന്, ഉള്ളടക്കം പ്രചരിപ്പിക്കാനും പിന്തുണയ്ക്കാനും AI ഉപയോഗിക്കുന്നത്. മറ്റൊന്ന്, ഉള്ളടക്കം തന്നെ സൃഷ്ടിക്കാൻ AI ഉപയോഗിക്കുന്നത്. രണ്ടും ഇന്ന് വളരെ പ്രസക്തമാണ്. ഞങ്ങളുടെ പ്ലാറ്റ്ഫോമുകളിൽ ശുപാർശാ സംവിധാനങ്ങൾ, പ്രേക്ഷകരുടെ പെരുമാറ്റം വിശകലനം ചെയ്യൽ, സിനിമകൾ കണ്ടെത്തുന്നതിനുള്ള സൗകര്യങ്ങൾ, മാർക്കറ്റിങ് തുടങ്ങിയ മേഖലകളിൽ AI വ്യാപകമായി ഉപയോഗിക്കാൻ ഉദ്ദേശിക്കുന്നുണ്ട്.

പ്രേക്ഷകരുടെ താത്പര്യങ്ങൾ മനസ്സിലാക്കി അവർക്ക് ഇഷ്ടപ്പെടാൻ സാധ്യതയുള്ള സിനിമകൾ നിർദേശിക്കാൻ AI സഹായിക്കും. അതുവഴി പുതിയ സിനിമകൾ കണ്ടെത്തുന്നതും തിരഞ്ഞെടുക്കുന്നതും എളുപ്പമാകും.

എന്നാൽ AI സംവിധാനങ്ങൾ ഫലപ്രദമായി പ്രവർത്തിക്കാൻ മതിയായ ഡാറ്റ ആവശ്യമാണ്. പ്രേക്ഷകരുടെ എണ്ണം വർധിക്കുകയും അവരുടെ കാഴ്ചാശീലങ്ങളെക്കുറിച്ചുള്ള വിവരങ്ങൾ ലഭിക്കുകയും ചെയ്യുമ്പോൾ ഈ സംവിധാനങ്ങൾ ഘട്ടംഘട്ടമായി മെച്ചപ്പെടുത്താൻ കഴിയും. സിനിമാ നിർമ്മാണത്തിന്റെ കാര്യത്തിൽ, AI ഉപയോഗിച്ച് സൃഷ്ടിക്കുന്ന ഉള്ളടക്കം കൂടുതൽ പ്രചാരത്തിലാകുമെന്ന് ഞാൻ കരുതുന്നു. അത് നിലവിലുള്ള സിനിമകൾക്കൊപ്പം മറ്റൊരു വിഭാഗമായി വളരും.

അതേസമയം, വ്യാജവിവരങ്ങൾ പ്രചരിപ്പിക്കുന്നതിനും തെറ്റിദ്ധരിപ്പിക്കുന്ന ഉള്ളടക്കം സൃഷ്ടിക്കുന്നതിനും AI ദുരുപയോഗം ചെയ്യപ്പെടാനുള്ള സാധ്യതയുമുണ്ട്. ഭാവിയിൽ AI ഉള്ളടക്കങ്ങൾക്ക് കൂടുതൽ നിയന്ത്രണ സംവിധാനങ്ങൾ രൂപപ്പെടാൻ സാധ്യതയുണ്ട്.
എനിക്ക് ഏറ്റവും വലിയ മാറ്റം പ്രതീക്ഷിക്കുന്ന മേഖലകളിലൊന്ന് ഡബ്ബിങ്ങാണ്. ഒരു സിനിമയുടെ ഭാഷാന്തരവും ഡബ്ബിങ്ങും കൂടുതൽ എളുപ്പത്തിലും കാര്യക്ഷമമായും ചെയ്യാൻ കഴിയുകയാണെങ്കിൽ, അതിന്റെ ആഗോള പ്രേക്ഷകസാധ്യത ഗണ്യമായി വർധിക്കും. ഒരു പ്രത്യേക ഭാഷയിൽ മാത്രം കാണാൻ കഴിയുന്ന സിനിമ ലോകത്തിന്റെ വിവിധ ഭാഗങ്ങളിലുള്ള പ്രേക്ഷകർക്ക് അവരുടെ സ്വന്തം ഭാഷയിൽ ആസ്വദിക്കാൻ കഴിയുന്ന സാഹചര്യം വരും. സിനിമയിൽ അഭിനയിക്കുന്നത് വലിയ താരമാണോ എന്നതിനേക്കാൾ, കഥയുടെ നിലവാരവും അത് മനസ്സിലാക്കാൻ കഴിയുന്ന ഭാഷയിൽ ലഭിക്കുന്നതുമാകും പ്രേക്ഷകർക്ക് പ്രധാനം.

ഭാഷാപരമായ തടസ്സങ്ങൾ കുറയുന്നതോടെ സിനിമകളുടെ വിതരണത്തിനും വരുമാനത്തിനും പുതിയ സാധ്യതകൾ തുറക്കപ്പെടും. യൂട്യൂബ് പോലുള്ള പ്ലാറ്റ്ഫോമുകൾ പോലും ഓട്ടോമാറ്റിക് ഡബ്ബിങ് സംവിധാനങ്ങളിലേക്ക് നീങ്ങുന്നത് ഈ മാറ്റത്തിന്റെ സൂചനയാണ്.

അഞ്ച് വർഷത്തിനപ്പുറം: ഒരു ഒ.ടി.ടി. പ്ലാറ്റ്ഫോമിൽനിന്ന് സമഗ്രമായൊരു ആവാസവ്യവസ്ഥയിലേക്ക്

അടുത്ത അഞ്ച് വർഷത്തിനുള്ളിൽ ABC Talkies, My Talkies എന്നീ സംരംഭങ്ങൾ എവിടെയെത്തുമെന്നാണ് പ്രതീക്ഷിക്കുന്നത്? പ്രേക്ഷകർക്കും സിനിമ വ്യവസായത്തിനും എന്തെല്ലാം മാറ്റങ്ങളാണ് ഇതിലൂടെ ഉണ്ടാകുക?

ഞങ്ങളുടെ ലക്ഷ്യത്തെ ഒരു പ്രത്യേക വിൽപ്പന സവിശേഷതയായി മാത്രം കാണാൻ ഞാൻ ആഗ്രഹിക്കുന്നില്ല. സിനിമകൾ അപ്‌ലോഡ് ചെയ്യുകയും പ്രേക്ഷകർ അവ കാണുകയും ചെയ്യുന്ന ഒരു ഒ.ടി.ടി. പ്ലാറ്റ്ഫോമിനപ്പുറത്തേക്കാണ് ഞങ്ങൾ ചിന്തിക്കുന്നത്. ഒരു സമഗ്രമായ ആവാസവ്യവസ്ഥയും അതിലൂടെ ഒരു സ്ഥാപനവും രൂപപ്പെടുത്തുകയാണ് ഞങ്ങളുടെ ലക്ഷ്യം.

ഈ മാതൃക ഇന്ത്യയിലുടനീളം വ്യാപിപ്പിക്കാൻ കഴിഞ്ഞാൽ വിവിധ ഭാഷകളിലെ സിനിമകൾക്ക് അവരുടെ പരമ്പരാഗത വിപണികൾക്കപ്പുറം പ്രേക്ഷകരെ കണ്ടെത്താൻ കഴിയും. ഒഡിയ സിനിമയ്ക്ക് മലയാളി പ്രേക്ഷകരിലേക്കും മലയാള സിനിമയ്ക്ക് ഒഡീഷയിലെയും ഉത്തരേന്ത്യയിലെയും പ്രേക്ഷകരിലേക്കും എത്താൻ സാധിക്കും. വടക്കുകിഴക്കൻ സംസ്ഥാനങ്ങളിലെ സിനിമകൾക്കും കൂടുതൽ പ്രേക്ഷകരെ ലഭിക്കും.

നിലവിൽ പ്രമുഖ ഒ.ടി.ടി. പ്ലാറ്റ്ഫോമുകളിൽ ലഭ്യമായ ഭാഷകളുടെ വൈവിധ്യം അവരുടെ ഉള്ളടക്ക തിരഞ്ഞെടുപ്പിനെ ആശ്രയിച്ചിരിക്കുന്നു. ഭോജ്പുരി, ബംഗാളി, ഗുജറാത്തി, മറാത്തി, അസമീസ് തുടങ്ങിയ ഭാഷകളിലെ സിനിമകൾക്ക് എല്ലായ്പ്പോഴും അർഹിക്കുന്നത്ര പ്രാതിനിധ്യം ലഭിക്കുന്നില്ല. വിവിധ ഭാഷകളിലുള്ള സിനിമകൾക്ക് പരസ്പരം പ്രേക്ഷകരെ കണ്ടെത്താൻ കഴിയുന്ന ഒരു സംവിധാനമാണ് ഞങ്ങൾ വിഭാവനം ചെയ്യുന്നത്. ഇതോടൊപ്പം, സബ്സ്ക്രിപ്ഷൻ സംവിധാനത്തിലും കൂടുതൽ തിരഞ്ഞെടുപ്പുകൾ ലഭ്യമാക്കണം. സബ്സ്ക്രിപ്ഷൻ എടുക്കാൻ ആഗ്രഹിക്കുന്നവർക്ക് അതാകാം. എന്നാൽ ഒരു സിനിമ മാത്രം കാണാൻ ആഗ്രഹിക്കുന്നവർക്ക് അതിനായി പ്രത്യേകമായി പണം നൽകി കാണാനുള്ള അവസരവും ഉണ്ടായിരിക്കണം.

ഞങ്ങളുടെ ദീർഘകാല കാഴ്ചപ്പാട് സിനിമാ നിർമ്മാണത്തെയും ധനസഹായത്തെയും ഉൾക്കൊള്ളുന്നതാണ്. സിനിമാ വ്യവസായത്തിൽ നിക്ഷേപിക്കാൻ ആഗ്രഹിക്കുന്ന നിരവധി ആളുകളുണ്ട്. എന്നാൽ എങ്ങനെ ഈ മേഖലയിലേക്ക് പ്രവേശിക്കണം, എങ്ങനെ നിക്ഷേപിക്കണം എന്നൊന്നും പലർക്കും വ്യക്തതയില്ല.

നിശ്ചിത തുക നിക്ഷേപിക്കാൻ ആഗ്രഹിക്കുന്ന ഒരാൾക്ക് അനുയോജ്യമായ സിനിമയിലോ സിനിമകളുടെ ഒരു കൂട്ടത്തിലോ നിക്ഷേപിച്ച് അതിന്റെ ഭാഗമാകാൻ കഴിയുന്ന സംവിധാനം വികസിപ്പിക്കാനാണ് ഞങ്ങൾ ആഗ്രഹിക്കുന്നത്. ഇതിനായി വ്യക്തമായ ഘടനയും നടപടിക്രമങ്ങളും ആവശ്യമാണ്.

അതുപോലെ, യുവസംവിധായകർക്കും പുതിയ സിനിമാ പ്രവർത്തകർക്കും അവരുടെ സിനിമകൾ കൂടുതൽ ക്രമബദ്ധമായി നിർമ്മിക്കാനുള്ള അവസരം ലഭിക്കണം. സിനിമ കാണുന്ന ഒരു പ്രേക്ഷകനുപോലും ഭാവിയിൽ ഈ പ്ലാറ്റ്ഫോമിലൂടെ സിനിമാ വ്യവസായത്തിന്റെ ഭാഗമാകാൻ കഴിയുന്ന സാഹചര്യം സൃഷ്ടിക്കണം. അതിനായി പലരെയും നേരിട്ട് സമീപിക്കേണ്ടിവരുന്ന ഇന്നത്തെ രീതിക്ക് പകരം, ഡിജിറ്റൽ സംവിധാനത്തിലൂടെ തന്നെ അവസരങ്ങൾ കണ്ടെത്താൻ കഴിയണം. നിർമ്മാണം, ധനസഹായം, വിതരണം, വരുമാനം, പ്രേക്ഷകരുടെ പങ്കാളിത്തം എന്നിവയെല്ലാം പരസ്പരം ബന്ധിപ്പിക്കുന്ന ഒരു സമഗ്ര സംവിധാനമാണ് ഞങ്ങളുടെ ദീർഘകാല ലക്ഷ്യം.

മലയാള സിനിമയ്ക്ക് അതിരുകൾക്കപ്പുറത്തേക്ക് വളരാനുള്ള അവസരം

ശാലിഭദ്ര ഷായുടെ നേതൃത്വത്തിൽ ABC Talkies, My Talkies എന്നീ സംരംഭങ്ങൾ മുന്നോട്ടുവയ്ക്കുന്നത് സിനിമകൾ കാണുന്നതിനുള്ള മറ്റൊരു ഡിജിറ്റൽ വേദി എന്ന ആശയത്തിൽ മാത്രം ഒതുങ്ങുന്നില്ല. സിനിമകൾക്ക് കൂടുതൽ വിതരണസാധ്യതകൾ സൃഷ്ടിക്കുക, നിർമ്മാതാക്കൾക്ക് വരുമാനം നേടാനുള്ള ബദൽ മാർഗങ്ങൾ ഒരുക്കുക, പ്രേക്ഷകർക്ക് കുറഞ്ഞ ചെലവിൽ ഇഷ്ടമുള്ള സിനിമകൾ കാണാൻ അവസരം നൽകുക എന്നിവയെല്ലാം ഇതിന്റെ ഭാഗമാണ്.

കേരള ഫിലിം ചേംബർ ഓഫ് കൊമേഴ്സിന്റെ സഹകരണത്തോടെ മലയാള സിനിമയെ കേന്ദ്രീകരിച്ച് ആരംഭിക്കുന്ന My Talkies, ഭാഷാപരവും ഭൂമിശാസ്ത്രപരവുമായ അതിരുകൾ മറികടന്ന് സിനിമകൾക്ക് കൂടുതൽ പ്രേക്ഷകരെ കണ്ടെത്താൻ സഹായിക്കുമെന്ന പ്രതീക്ഷയാണ് മുന്നോട്ടുവയ്ക്കുന്നത്.

AI അധിഷ്ഠിതമായ ഉള്ളടക്ക ശുപാർശകൾ, വിവിധ ഭാഷകളിലേക്കുള്ള ഡബ്ബിങ്, മറ്റു വിതരണ ചാനലുകളിലേക്കുള്ള പ്രവേശനം, ഭാവിയിൽ സിനിമാ ധനസഹായത്തിനുള്ള സാധ്യതകൾ എന്നിവയിലൂടെ കൂടുതൽ വിപുലമായ ഒരു സിനിമാ ആവാസവ്യവസ്ഥ സൃഷ്ടിക്കാനാണ് ഈ സംരംഭങ്ങളുടെ ലക്ഷ്യം.

ഈ മാതൃക എത്രത്തോളം വ്യാപകമായി വളരുമെന്നത് പ്രേക്ഷകരുടെ പ്രതികരണം, സാമ്പത്തികമായി നിലനിൽക്കാനുള്ള ശേഷി, സിനിമാ വ്യവസായത്തിന്റെ സഹകരണം, നടപ്പാക്കലിന്റെ കാര്യക്ഷമത എന്നിവയെ ആശ്രയിച്ചിരിക്കും. എങ്കിലും, സിനിമകൾക്ക് പ്രേക്ഷകരിലേക്കെത്താൻ കൂടുതൽ വഴികൾ തുറക്കുകയും സിനിമാ വ്യവസായത്തിൽ കൂടുതൽ ആളുകൾക്ക് പങ്കാളികളാകാൻ അവസരമൊരുക്കുകയും ചെയ്യുക എന്ന ആശയമാണ് ഇതിന്റെ കാതൽ.

ശാലിഭദ്ര ഷായുടെ വാക്കുകളിൽ, ലക്ഷ്യം മറ്റൊരു ഒ.ടി.ടി. പ്ലാറ്റ്ഫോം സൃഷ്ടിക്കുക മാത്രമല്ല; മറിച്ച്, ഇന്ത്യൻ സിനിമയെ കൂടുതൽ ജനാധിപത്യപരവും എല്ലാവർക്കും പ്രാപ്യവും പരസ്പരം ബന്ധിപ്പിക്കപ്പെട്ടതുമായ ഒരു ഡിജിറ്റൽ ലോകത്തിലേക്ക് നയിക്കുകയാണ്.