മാജിക് ഇഷ്ടമുള്ള കുട്ടിക്ക് യഥാർഥത്തിൽ മാജിക്കൽ പവ‍േഴ്സ് കിട്ടിയാലോ.. എന്നാൽ യഥാർഥത്തിൽ അത് മാജിക് തന്നെയായിരുന്നോ അതോ വെറും മായയോ? അതിനുള്ള ഉത്തരമാണ് ഫഹദ് ഫാസിലിനെ നായകനാക്കി ഷശാങ്ക് യെലറ്റി സംവിധാനം ചെയ്ത ‘ഡോണ്ട് ട്രബിൾ ദി ട്രബിൾ’. മാജിക്കും ഫാന്റസിയും വൈകാരികതയും കോർത്തിണക്കുന്ന ഒരു വ്യത്യസ്ത അനുഭവമാണ് ചിത്രം നൽകുന്നത്. ആംബുലൻസ് ഡ്രൈവറായ സൂരിയുടെയും നിഗൂഢതകൾ നിറഞ്ഞ പെൺകുട്ടിയായ ദിവ്യയുടെയും ബന്ധമാണ് ചിത്രത്തിന്റെ പ്രധാന ആകർഷണം. തുടക്കത്തിൽ പരസ്പരം ‘ട്രബിൾ’ ആയിത്തോന്നുന്ന സൂരിയും ദിവ്യയും കഥ മുന്നോട്ടുപോകുമ്പോൾ ഹൃദയസ്പർശിയായ ബന്ധത്തിലേക്ക് എത്തുന്നു.

To advertise here,

മാജിക്കിനോടുള്ള ദിവ്യയുടെ താത്പര്യം കഥയുടെ ഫാന്റസി സ്വഭാവം നിലനിർത്തുന്നു. ഒരു സാധാരണ കുട്ടിയല്ല ദിവ്യയെന്നും അവൾക്ക് അസാധാരണമായ ശക്തികളുണ്ടെന്നും സൂരിക്ക് മനസ്സിലാകുന്നതോടെ കഥ മറ്റൊരു തലത്തിലേക്ക് കടക്കുന്നു. എന്നാൽ അവൾക്ക് ഈ ശക്തികൾ എവിടെനിന്നാണ് ലഭിച്ചത്, എന്തുകൊണ്ടാണ് അവൾക്ക് ഇത്തരമൊരു കഴിവുള്ളത് എന്നതിനെക്കുറിച്ചുള്ള ചോദ്യങ്ങൾ ആദ്യപകുതിയിലുടനീളം കൗതുകം നിലനിർത്തുന്നു.

രണ്ടാം പകുതിയിൽ എത്തുമ്പോൾ കഥയിൽ നിർണായകമായ ട്വിസ്റ്റ് അവതരിപ്പിക്കുകയും ചെയ്യുന്നു. അതോടെ ആദ്യപകുതിയിൽ ഉയർന്നുവന്ന പല ചോദ്യങ്ങൾക്കും വ്യക്തതയാകും. അതേസമയം, ട്വിസ്റ്റ് കഥയെ മുന്നോട്ടുനീക്കാനുള്ള ഉപാധിയായിമാത്രം നിലനിർത്താതെ സൂരിയുടെയും ദിവ്യയുടെയും ബന്ധത്തിന് വൈകാരികമായ അർഥം നൽകുന്നു. സൗരഭ് സച്ച്ദേവ, മഹേഷ് മഞ്ജരേക്കർ എന്നിവരും ചിത്രത്തിൽ പ്രധാന വേഷങ്ങളിലെത്തുന്നു.

ഫഹദ് ഫാസിലിന്റെ സൂരിയായുള്ള പ്രകടനം കഥാപാത്രത്തിന്റെ കുസൃതിയും നർമവും പിന്നീട് രൂപപ്പെടുന്ന വൈകാരികതയും ഒരുപോലെ കൈകാര്യം ചെയ്യുന്നു. ദിവ്യയായി എത്തുന്ന സാറ പാലേക്കറും കഥാപാത്രത്തിന്റെ നിഷ്കളങ്കതയും നിഗൂഢതയും മികച്ച രീതിയിൽ അവതരിപ്പിക്കുന്നു. ഇരുവരും തമ്മിലുള്ള കെമിസ്ട്രിയാണ് ചിത്രത്തിന്റെ ആത്മാവ്. ക്ലൈമാക്സിലേക്ക് എത്തുമ്പോൾ കഥയുടെ ഫാന്റസി ഘടകങ്ങളും കഥാപാത്രങ്ങളുടെ വൈകാരിക യാത്രയും ഒരുമിച്ച് ചേരുന്നു. സൂരിയുടെയും ദിവ്യയുടെയും ബന്ധത്തിന് നൽകുന്ന വൈകാരികമായ സമാപനം പ്രേക്ഷകന് സംതൃപ്തി നൽകുന്നതാണ്. 

എസ്.എസ്. രാജമൗലിയുടെ പ്രസന്റേഷനും വമ്പൻ നിർമാതാക്കളുടെ സാന്നിധ്യവും വലിയൊരു മാജിക്കൽ ലോകം പ്രതീക്ഷിക്കാൻ പ്രേക്ഷകരെ പ്രേരിപ്പിച്ചേക്കാം. എന്നാൽ ഫാന്റസി ലോകം സൃഷ്ടിക്കുന്നതിനേക്കാൾ, മാജിക്കിനെ ഒരു വൈകാരിക ബന്ധത്തിന്റെ പശ്ചാത്തലമായാണ് ചിത്രം ഉപയോഗിച്ചിരിക്കുന്നത്. ഫാന്റസിയും മിസ്റ്ററിയും നർമവും ഇമോഷനും ചേർന്ന സിനിമാനുഭവമാണ് ‘ഡോണ്ട് ട്രബിൾ ദി ട്രബിൾ’.