വെട്രിമാരന്‍ സംവിധാനം ചെയ്ത ഏറ്റവും പുതിയ തമിഴ്ചിത്രം വിടുതലൈ മികച്ച അഭിപ്രായം സ്വന്തമാക്കി മുന്നേറുകയാണ്. സൂരിയാണ് ചിത്രത്തിലെ നായകന്‍. വിജയ് സേതുപതി കാമിയോ വേഷത്തിലുമുണ്ട്. ഇപ്പോഴിതാ ചിത്രത്തിലെ അണിയറപ്രവര്‍ത്തകര്‍ക്കെല്ലാം സ്വര്‍ണനാണയം സമ്മാനിച്ചിരിക്കുകയാണ് സംവിധായകന്‍ വെട്രിമാരന്‍.

To advertise here,

വിടുതലൈ സിനിമയുടെ ഭാഗമായ ബി.രാജയാണ് ഈ വിവരം ട്വിറ്ററിലൂടെ പുറത്തുവിട്ടത്. ഇങ്ങനെയൊരു ചിത്രത്തിന്റെ ഭാഗമാവാന്‍ സാധിച്ചതില്‍ അഭിമാനമുണ്ടെന്ന് രാജ ട്വീറ്റ് ചെയ്തു. രണ്ട് ചിത്രങ്ങളും അദ്ദേഹം ഒപ്പം ചേര്‍ത്തിട്ടുണ്ട്. വിടുതലൈയുടെ വിജയം സഹപ്രവര്‍ത്തകരുമായി പങ്കിടുന്ന വെട്രിമാരന്റെ ചിത്രങ്ങള്‍ സമൂഹ മാധ്യമങ്ങളില്‍ വൈറലാണിപ്പോള്‍.

ജയമോഹന്‍ രചിച്ച തുണൈവന്‍ എന്ന നോവലിനെ ആസ്പദമാക്കിയാണ് വിടുതലൈ നിര്‍മിച്ചിരിക്കുന്നത്. ചിത്രത്തില്‍ പോലീസ് വേഷത്തിലാണ് സൂരി എത്തിയിരിക്കുന്നത്. നടന്റെ ജീവിതത്തിലെ നാഴികക്കല്ലായ കഥാപാത്രമാണ് വിടുതലൈയിലേത് എന്നാണ് പുറത്തുവരുന്ന വിവരങ്ങള്‍ സൂചിപ്പിക്കുന്നത്. ഭവാനി ശ്രീയാണ് നായിക. സംവിധായകന്‍ ഗൗതം വാസുദേവ് മേനോനും ഒരു പ്രധാനകഥാപാത്രത്തെ അവതരിപ്പിക്കുന്നുണ്ട്.

രണ്ടുഭാഗങ്ങളുള്ള ചിത്രത്തിന്റെ ആദ്യഭാഗമാണിപ്പോള്‍ പുറത്തുവന്നിരിക്കുന്നത്. രണ്ടാം ഭാഗം ഈ വര്‍ഷം സെപ്റ്റംബറില്‍ പുറത്തുവരുമെന്നാണ് വിവരം. ഇളയരാജയാണ് സംഗീതസംവിധാനം.