സംവിധായകൻ ഭാരതിരാജയെ വീട്ടിലെത്തി സന്ദർശിച്ച് നടനും കേന്ദ്രമന്ത്രിയുമായ സുരേഷ് ​ഗോപി. മകൻ മനോജ് ഭാരതിയുടെ മരണത്തിൽ ദുഃഖിതനായിരിക്കുന്ന ഭാരതിരാജയെ ആശ്വസിപ്പിക്കാനാണ് സുരേഷ് ​ഗോപിയെത്തിയത്. സുരേഷ് ​ഗോപിതന്നെയാണ് ഇക്കാര്യം സോഷ്യൽ മീഡിയയിലൂടെ അറിയിച്ചത്.

To advertise here,

മനോജ് ഭാരതിരാജക്ക് ആദരാഞ്ജലികൾ അർപ്പിക്കുന്നതായി സുരേഷ് ​ഗോപി പോസ്റ്റ് ചെയ്തു. ഭാരതിരാജയെ സന്ദർശിക്കുന്നതിന്റെ ചിത്രവും സുരേഷ് ​ഗോപി സോഷ്യൽ മീഡിയയിലൂടെ പങ്കുവെച്ചു. ഏതാനും ദിവസങ്ങൾക്കുമുമ്പാണ് ഭാരതിരാജയുടെ മകനും നടനുമായ മനോജ് അന്തരിച്ചത്. ഹൃദയാഘാതമാണ് മരണകാരണം. ഒരു മാസം മുമ്പ്  ഓപ്പണ്‍-ഹാര്‍ട്ട് ശസ്ത്രക്രിയയ്ക്ക് വിധേയനായിരുന്നു. അതിനുശേഷം വീട്ടില്‍ വിശ്രമത്തിൽ കഴിയുന്നതിനിടേയാണ് മരണം സംഭവിച്ചത്.

1999-ല്‍ ഭാരതിരാജ സംവിധാനം ചെയ്ത താജ്മഹല്‍ എന്ന ചിത്രത്തിലൂടെയാണ് മനോജ് അഭിനയരംഗത്തേക്ക് ചുവടുവെച്ചത്. പിന്നീട് സമുദ്രം, കടല്‍ പൂക്കള്‍, അല്ലി അര്‍ജുന, വര്‍ഷമെല്ലാം വസന്തം, പല്ലവന്‍, ഈറ നിലം, മഹാ നടികന്‍, അന്നക്കൊടി, മാനാട് തുടങ്ങിയ തമിഴ് ചിത്രങ്ങളില്‍ അഭിനയിച്ചു. 2022-ലെ വിരുമന്‍ ആയിരുന്നു അവസാനം അഭിനയിച്ച ചിത്രം.

2023ല്‍ ഭാരതിരാജയ്‌ക്കൊപ്പം മാര്‍ഗഴി തിങ്കള്‍ എന്ന ചിത്രം സംവിധാനം ചെയ്തു. മണിരത്‌നത്തിന്റെ ബോംബൈ, ശങ്കറിന്റെ എന്തിരന്‍ എന്നീ ചിത്രങ്ങളില്‍ സഹസംവിധായകനായി പ്രവര്‍ത്തിച്ചിട്ടുണ്ട്. നടി നന്ദനയാണ് ഭാര്യ. രണ്ട് മക്കളുണ്ട്‌.