മുംബൈയിലെ കോടതിയില്‍ എഎന്‍സി സമര്‍പ്പിച്ച റിപ്പോര്‍ട്ട് അനുസരിച്ച്, മുഹമ്മദ് സലിം മുഹമ്മദ് സുഹൈല്‍ ഷെയ്ഖ് എന്ന മയക്കുമരുന്ന് കടത്തുകാരന്‍, താന്‍ സെലിബ്രിറ്റികള്‍ക്കായി ആഡംബര പാര്‍ട്ടികള്‍ സംഘടിപ്പിച്ചിരുന്നതായാണ് പറഞ്ഞത്.
മുംബൈ: ബോളിവുഡ് നടി ശ്രദ്ധാ കപൂറിന്റെ സഹോദരനും നടനുമായ സിദ്ധാന്ത് കപൂറിനെ മുംബൈ പോലീസിന്റെ ആന്റി-നാര്‍ക്കോട്ടിക്‌സ് സെല്‍ (ANC) വിളിപ്പിച്ചു. സോഷ്യല്‍ മീഡിയ ഇന്‍ഫ്‌ളുവന്‍സര്‍ ഓറിക്ക് പിന്നാലെയാണ് സിദ്ധാന്ത് കപൂറിനെയും എഎന്‍സി വിളിപ്പിച്ചിരിക്കുന്നത്. മയക്കുമരുന്ന് പാര്‍ട്ടി കേസുമായി ബന്ധപ്പെട്ടാണ് സിദ്ധാന്തിനോടും ഓറിയോടും ഹാജരാകാന്‍ പോലീസ് ആവശ്യപ്പെട്ടിരിക്കുന്നത്.
സിദ്ധാന്തിനോട് നവംബര്‍ 25-ന് ഹാജരാകാന്‍ ആവശ്യപ്പെട്ടപ്പോള്‍, ഓറന്‍ അവത്രമണി എന്ന ഓറി നവംബര്‍ 26-ന് ഹാജരാകണമെന്നാണ് അധികൃതര്‍ നിര്‍ദേശിച്ചിരിക്കുന്നത്. നവംബര്‍ 20-ന് ചോദ്യം ചെയ്യലിനായി ഹാജരാകാന്‍ ഓറിയോട് നേരത്തെ ആവശ്യപ്പെട്ടിരുന്നെങ്കിലും, ഹാജരാകുന്നതില്‍ പരാജയപ്പെടുകയും കൂടുതല്‍ സമയം തേടുകയുമായിരുന്നു. ഓറി മുംബൈക്ക് പുറത്താണെന്ന് അദ്ദേഹത്തിന്റെ പ്രതിനിധി അവകാശപ്പെട്ടു.
ഈ മാസം ആദ്യം അറസ്റ്റിലായ ഒരു മയക്കുമരുന്ന് കടത്തുകാരന്‍ ഞെട്ടിക്കുന്ന അവകാശവാദങ്ങള്‍ ഉന്നയിച്ചിരുന്നു. മുംബൈയിലെ കോടതിയില്‍ എഎന്‍സി സമര്‍പ്പിച്ച റിപ്പോര്‍ട്ട് അനുസരിച്ച്, മുഹമ്മദ് സലിം മുഹമ്മദ് സുഹൈല്‍ ഷെയ്ഖ് എന്ന മയക്കുമരുന്ന് കടത്തുകാരന്‍, താന്‍ സെലിബ്രിറ്റികള്‍ക്കായി ആഡംബര പാര്‍ട്ടികള്‍ സംഘടിപ്പിച്ചിരുന്നതായാണ് പറഞ്ഞത്.
ഈ പാര്‍ട്ടികളില്‍ പങ്കെടുത്തവരായി സുഹൈല്‍ ഷെയ്ഖ് വെളിപ്പെടുത്തിയ പേരുകളില്‍ നടിമാരായ നോറ ഫത്തേഹി, ശ്രദ്ധാ കപൂര്‍, സഹോദരന്‍ സിദ്ധാന്ത് കപൂര്‍, ഓറി, ചലച്ചിത്ര നിര്‍മ്മാതാക്കളായ അബ്ബാസ്-മസ്താന്‍, റാപ്പര്‍ ലോക എന്നിവരും ഉള്‍പ്പെടുന്നു.
ബോളിവുഡ് താരങ്ങള്‍ മാത്രമല്ല, ബാബ സിദ്ദിഖിയുടെ മകനും എന്‍സിപി നേതാവുമായ സീഷാന്‍ സിദ്ദിഖി, ദാവൂദിന്റെ പരേതയായ സഹോദരി ഹസീന പാര്‍ക്കറിന്റെ മകന്‍ എന്നിവരും പങ്കെടുത്തവരില്‍ ഉള്‍പ്പെട്ടിരുന്നുവെന്ന് സുഹൈല്‍ ഷെയ്ഖ് പറഞ്ഞു.
ദാവൂദ് ഇബ്രാഹിം സംഘവുമായി ബന്ധമുണ്ടെന്ന് കരുതുന്ന മയക്കുമരുന്ന് കടത്ത് ശൃംഖലയെക്കുറിച്ചാണ് നിലവില്‍ അന്വേഷണം നടക്കുന്നത്. ഈ അവകാശവാദങ്ങള്‍ ഉന്നയിച്ച മയക്കുമരുന്ന് കടത്തുകാരന്‍, ദാവൂദ് സംഘത്തിലെ പ്രധാനിയായ സലിം ഡോളയുടെ അടുത്ത സഹായിയാണെന്നാണ് റിപ്പോര്‍ട്ട്. സലിം ഡോള നിലവില്‍ ഒളിവിലാണ്.
Content Highlights: Siddhanth Kapoor summoned by Mumbai Police in drug party case. Socialite Orry also re-summoned. Probe linked to Dawood Ibrahim gang. Read details.
Published: 21 Nov 2025, 08:52 pm IST
Related Topics
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..
Most Commented