അച്ഛനായ സന്തോഷം പങ്കുവെച്ച് നടനും എഡിറ്ററുമായ സംഗീത് പ്രതാപ്. സാമൂഹികമാധ്യമങ്ങളിൽ പങ്കുവെച്ച കുറിപ്പിനും വീഡിയോയ്ക്കുമൊപ്പമാണ് താരം സന്തോഷം പങ്കുവെച്ചത്. നേരത്തെ, അച്ഛനാവാനൊരുങ്ങുന്നതിന്റെ സന്തോഷം സംഗീത് പങ്കുവെച്ചിരുന്നു.

To advertise here,

തിയേറ്റർ പശ്ചാത്തലമാക്കിയുള്ള ഭാര്യ ആൻസിയുടെ മറ്റേണിറ്റി ഫോട്ടോഷൂട്ടിലൂടെയായിരുന്നു താരം സന്തോഷം പങ്കുവെച്ചത്. ഇതേ വീഡിയോയുടെ തുടർച്ചയായാണ് പെൺകുഞ്ഞ് പിറന്ന വാർത്ത സംഗീത് പുറത്തുവിട്ടത്. പ്രിയദർശൻ ചിത്രങ്ങളെ ഓർമിപ്പിക്കുന്ന രംഗങ്ങൾ കോർത്തിണക്കിയ വീഡിയോയുടെ അവസാന ഭാഗത്താണ് പെൺകുഞ്ഞ് പിറന്നകാര്യം വെളിപ്പെടുത്തുന്നത്.

'കുഞ്ഞേ, നിന്റെ അമ്മ ചെറിയ കാര്യങ്ങളെപ്പോലും ഭയപ്പെട്ടിരുന്നു. സൂചി കണ്ടാൽപ്പോലും കരയുമായിരുന്നു. എന്നാൽ, ഇന്നലെ രാത്രി നിന്നെ ഈ ലോകത്തേക്ക് എത്തിക്കാൻ, ഞാൻ ഇതുവരെ കണ്ടതിൽവെച്ച് ഏറ്റവും ധൈര്യശാലിയെപ്പോലെയായി അവൾ മാറി', സംഗീത് കുറിച്ചു.

'എന്നെയും എന്റെ തീരുമാനങ്ങളെയും സംശയിച്ചാണ് ഞാൻ എന്റെ ജീവിതത്തിന്റെ ഭൂരിഭാഗവും ചെലവഴിച്ചത്. ഇന്നലെ എനിക്ക് വലുതും പ്രധാനപ്പെട്ടതുമായ തീരുമാനങ്ങൾ എടുക്കേണ്ടിവന്നു. വേദനയിൽ അവളുടെ കൈപിടിക്കുമ്പോൾ, ഇതിനുമുമ്പ് ഞാൻ അവളെ ഇത്രയധികം സ്‌നേഹിച്ചിരുന്നെങ്കിൽ എന്ന് ഞാൻ ചിന്തിച്ചുപോയി. നിന്റെ കുഞ്ഞൻ തല പുറത്തേക്ക് വരുന്നതുകണ്ടപ്പോൾ ഞാൻ ഒരു കുട്ടിയെപ്പോലെ പൊട്ടിക്കരഞ്ഞുപോയി. ആ നിമിഷത്തിൽ മൂന്ന് ഹൃദയങ്ങൾ ഒന്നായി മിടിച്ചു', സംഗീത് കൂട്ടിച്ചേർത്തു.

'ആളുകൾ പറയും, നീ ഇന്നലെ രാത്രിയാണ് ജനിച്ചത് എന്ന്. എന്നാൽ, നീ ആദ്യശ്വാസമെടുത്തപ്പോൾ ഞാൻ പുനർജനിക്കുകയായിരുന്നു എന്നതാണ് സത്യം', സംഗീത് കുറിപ്പ് അവസാനിപ്പിച്ചു.

2023 നവംബറിലായിരുന്നു സംഗീതിന്റെയും ആൻസിയുടെയും വിവാഹം. 'ഇറ്റ്‌സ് എ മെഡിക്കൽ മിറക്കിൾ' ആണ് സംഗീത് നായകനായി ഒടുവിലിറങ്ങിയ ചിത്രം. മമിത ബൈജു നായികയാവുന്ന 'ഹലോ ഡിയർ' ആണ് പുറത്തിറങ്ങാനിരിക്കുന്ന ചിത്രം.