അജിത് കുമാര് 'ഗുഡ് ബാഡ് അഗ്ലി'യില് | Photo: Facebook/ Mythri Movie Makers
അജിത് കുമാറിനെ നായകനാക്കി ആദിക് രവിചന്ദ്രന് സംവിധാനംചെയ്ത 'ഗുഡ് ബാഡ് അഗ്ലി' തങ്ങളെ സംബന്ധിച്ച് വലിയ ലാഭമായിരുന്നില്ലെന്ന് നിര്മാതാക്കളായ മൈത്രി മൂവി മേക്കേഴ്സ്. വന്ലാഭം ലഭിച്ചില്ലെങ്കിലും ചിത്രം നഷ്ടമായിരുന്നില്ലെന്ന് നിര്മാതാക്കള് പറഞ്ഞു. തങ്ങള് നിര്മിച്ച പ്രദീപ് രംഗനാഥന്- മമിത ബൈജു ചിത്രം 'ഡ്യൂഡി'ന്റെ പ്രൊമോഷനുമായി ബന്ധപ്പെട്ട് കഴിഞ്ഞദിവസം മാധ്യമപ്രവര്ത്തകരോട് സംസാരിച്ചപ്പോഴാണ് നിര്മാതാക്കള് ഇക്കാര്യം തുറന്നുപറഞ്ഞത്.
'സിനിമയില് ഞങ്ങള് സന്തുഷ്ടരാണ്. അജിത് കുമാറിന്റെ ഏറ്റവും കൂടുതല് കളക്ഷന് നേടിയ ചിത്രമായി അത് മാറി. ഞങ്ങള് വലിയ ലാഭം കിട്ടിയില്ലെങ്കിലും നഷ്ടമൊന്നുമില്ല. തമിഴിലേക്ക് ഞങ്ങള്ക്ക് ശക്തമായ എന്ട്രി ലഭിച്ചു. ഭാവിയില് അജിത്തുമായി വീണ്ടും സഹകരിക്കാന് ഞങ്ങള് പദ്ധതിയിടുന്നുണ്ട്', എന്നായിരുന്നു നിര്മാതാക്കളുടെ പ്രതികരണം.
'ഗുഡ് ബാഡ് അഗ്ലി'യില് ഇളയരാജയുടെ പാട്ടുകള് ചേര്ത്തതുമായി ബന്ധപ്പെട്ട പകര്പ്പവകാശ തര്ക്കങ്ങളിലും നിര്മാതാക്കള് പ്രതികരിച്ചു. 'ഒരു പാട്ടിന് ഏകദേശം 15 മുതല് 20 ലക്ഷംവരെ രൂപ നല്കി സോണി മ്യൂസിക്കില്നിന്നാണ് ഞങ്ങള് പാട്ടുകളുടെ അവകാശം വാങ്ങിയത്. തര്ക്കം ഇളയരാജയും സോണി മ്യൂസിക്കും തമ്മിലാണ്. ഗാനങ്ങള് താത്കാലികമായി മാറ്റിയിട്ടുണ്ട്. അന്തിമവിധി ഉടന് വരുമെന്നാണ് പ്രതീക്ഷിക്കുന്നത്. ഞങ്ങളുടെ കൈയില് നിയമപരമായ എല്ലാ രേഖകളുമുണ്ട്. കൃത്യമായ നടപടിക്രമങ്ങള് പാലിച്ചിട്ടുണ്ട്. കേസ് നിലവിലിരിക്കെ കൂടുതല് പ്രതികരിക്കാന് കഴിയില്ല', അവര് വ്യക്തമാക്കി.
തെലുങ്കില്നിന്ന് തുടങ്ങി പാന് ഇന്ത്യന് ചിത്രങ്ങളിലൂടെ അറിയപ്പെട്ട നിര്മാണക്കമ്പനിയാണ് മൈത്രി മൂവി മേക്കേഴ്സ്. 'ജനതാഗ്യാരേജ്', 'രംഗസ്ഥലം', 'ഡിയര് കോമ്രേഡ്', 'വീരസിംഹറെഡ്ഡി', 'പുഷ്പ: ദി റൈസ്', 'പുഷ്പ: ദി റൂള്' തുടങ്ങിയ ചിത്രങ്ങളുടെ നിര്മാതാക്കളാണ്. തമിഴില് 'ഗുഡ് ബാഡ് അഗ്ലി'യാണ് ആദ്യചിത്രം. മലയാളത്തില് ഡോ. ബിജുവിന്റെ 'അദൃശ്യജാലകങ്ങള്', ടൊവിനോ നായകനായ ജീന്പോള് ലാല് ചിത്രം 'നടികര്' എന്നിവയും നിര്മിച്ചു. തമിഴിലെ രണ്ടാമത്തെ ചിത്രമാണ് 'ഡ്യൂഡ്'. സണ്ണി ഡിയോള് പ്രധാനവേഷത്തിലെത്തിയ 'ജാട്ടി'ലൂടെ ബോളിവുഡിലും അരങ്ങേറി.
Content Highlights: Mythri Movie Makers discuss `Good Bad Ugly`, Ajith`s highest-grossing film. They confirm no losses despite modest profits, and their strong Tamil entry. Copyright issues with Ilaiyaraaja`s songs are also addressed
Published: 17 Oct 2025, 08:55 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented