2024-ലെ ദാദാസാഹേബ് ഫാൽക്കേ പുരസ്കാരം ഏറ്റുവാങ്ങി മുതിർന്ന കന്നഡ നടൻ അനന്ത് നാഗ്. ഗുജറാത്തിലെ ഏകതാ നഗറിൽ നടന്ന 72-ാമത് ദേശീയ ചലച്ചിത്ര പുരസ്കാര ചടങ്ങിൽ രാഷ്ട്രപതി ദ്രൗപതി മുർമുവിൽ നിന്ന് അദ്ദേഹം പുരസ്കാരം സ്വീകരിച്ചു. ഏഴ് പതിറ്റാണ്ടിലേറെ നീണ്ട കരിയറിൽ ഇന്ത്യൻ സിനിമയ്ക്ക് നൽകിയ സംഭാവനകൾ മുൻനിർത്തിയാണ് ഈ ആദരം. 1995-ൽ ഡോ. രാജ്കുമാറിന് പുരസ്കാരം ലഭിച്ചതിന് ശേഷം ദാദാസാഹേബ് ഫാൽക്കെ പുരസ്കാരം ലഭിക്കുന്ന രണ്ടാമത്തെ കന്നഡ നടനാണ് അദ്ദേഹം.

To advertise here,

പുരസ്കാരം സ്വീകരിച്ചുകൊണ്ട് സംസാരിക്കവേ, ഈ അംഗീകാരം നിർമാതാക്കൾക്കും സംവിധായകർക്കും ഒപ്പം പതിറ്റാണ്ടുകളായി തന്റെ കഥാപാത്രങ്ങളെ സ്വീകരിച്ച കോടിക്കണക്കിന് പ്രേക്ഷകർക്കുമായി സമർപ്പിക്കുന്നതായി അദ്ദേഹം പറഞ്ഞു. വിവിധ ഭാഷകളിൽ അഭിനയിച്ചിട്ടുണ്ടെങ്കിലും ഏറ്റവും കൂടുതൽ സ്നേഹവും ബഹുമാനവും ലഭിച്ചതായി തോന്നിയത് കർണാടകയിലാണെന്നും അദ്ദേഹം പറഞ്ഞു.

Also Read: അനന്ത് നാഗ്: സ്വാതിതിരുനാളിനെ പകർന്നാടിയ അഭിനയ പ്രതിഭ

"ഈ ചടങ്ങിന്റെ ഗാംഭീര്യം ഉൾക്കൊള്ളാൻ ഞാൻ ശ്രമിക്കുകയാണ്. ഇന്ന് നിങ്ങളോടൊപ്പം ഇവിടെ ഉണ്ടായിരിക്കുന്നതിൽ ഞാൻ വളരെ സന്തോഷവാനാണ്. ഒരു നടൻ എന്ന നിലയിൽ നിങ്ങൾ എന്നെ അഭിനയിക്കുന്നത് കണ്ടിട്ടുണ്ട്. ചില ഭാഗങ്ങൾ നിങ്ങൾ കണ്ടിട്ടുണ്ടാകാം. ഞാൻ ഒരു ആശ്രമത്തിലാണ് വളർന്നത് - എന്റെ ബാല്യകാലം 12 വയസ്സു വരെ അവിടെയായിരുന്നു. മുംബൈയിൽ വെച്ചാണ് എനിക്ക് ഒരു നാടകത്തിൽ അഭിനയിക്കാൻ അവസരം ലഭിച്ചത്. ശ്രീ ആദിശങ്കരാചാര്യരുടെ വരികൾ ഉദ്ധരിക്കാൻ ഞാൻ ആഗ്രഹിക്കുന്നു - 'വന്ദേമാതരം'. ഈ മഹത്തായ രാജ്യം എന്റെ ജന്മഭൂമിയാണ്, കർണാടക എന്റെ കർമഭൂമിയാണ്. ഭാരതം എന്റെ ധർമഭൂമി കൂടിയാണ്" എന്നു പറഞ്ഞുകൊണ്ടാണ് അദ്ദേഹം തന്റെ പ്രസംഗം അവസാനിപ്പിച്ചത്.

അനന്ത് നാഗിന്റെ അഭിനയവഴി

1948 സെപ്റ്റംബർ 4-ന് ജനിച്ച അനന്ത് നാഗ്, മുംബൈയിൽ വെച്ചാണ് നാടകത്തോടുള്ള താല്പര്യം വളർത്തിയെടുത്തത്. 1970-കളുടെ തുടക്കത്തിലാണ് അദ്ദേഹം അഭിനയരംഗത്തേക്ക് കടന്നുവരുന്നത്. 1973-ൽ 'സങ്കൽപ്പ' എന്ന കന്നഡ ചിത്രത്തിലൂടെയാണ് സിനിമയിൽ അരങ്ങേറ്റം കുറിച്ചു. തുടർന്ന് ശ്യാം ബെനഗലിന്റെ അങ്കുർ എന്ന ചിത്രത്തിലും അഭിനയിച്ചു. ഇന്ത്യയിലെ സമാന്തര സിനിമ പ്രസ്ഥാനത്തിലെ ഒരു പ്രധാന ചിത്രമായി മാറിയ ഒന്നായിരുന്നു ഇത്. ബെനഗലിന്റെ തന്നെ 'മന്തൻ', 'ഭൂമിക' തുടങ്ങിയ ചിത്രങ്ങളിലും അദ്ദേഹം അഭിനയിച്ചു.

തുടർന്ന് അനന്ത് നാഗിന്റെ കരിയർ ഇന്ത്യൻ സിനിമയുടെ വിവിധ ശാഖകളിലൂടെ സഞ്ചരിച്ചു. അദ്ദേഹത്തിന്റെ ആദ്യകാല സിനിമകളിൽ സമാന്തര സിനിമ പ്രസ്ഥാനവുമായി ബന്ധപ്പെട്ട ചിത്രങ്ങൾ ഉൾപ്പെട്ടിരുന്നുവെങ്കിലും, കന്നഡ വാണിജ്യ സിനിമകളിലെ പരിചിത മുഖങ്ങളിൽ ഒരാളായും അദ്ദേഹം മാറി. 'ബയലു ദാരി', 'കന്നേശ്വര രാമ', 'നാ നിന്ന ബിടലാരെ', 'ചന്ദനത ഗൊമ്പെ', 'ബെങ്കിയ ബാളെ' തുടങ്ങിയ ചിത്രങ്ങൾ അദ്ദേഹത്തെ സിനിമാരംഗത്തെ ഒരു പ്രമുഖ സാന്നിധ്യമാക്കി മാറ്റി. കന്നഡ, ഹിന്ദി, തെലുങ്ക്, തമിഴ്, മലയാളം, മറാത്തി, ഇംഗ്ലീഷ് എന്നീ ഭാഷകളിലായി 300-ലധികം ചിത്രങ്ങളിൽ അദ്ദേഹം അഭിനയിച്ചിട്ടുണ്ട്.

കന്നഡ സിനിമയ്ക്ക് പുറമെ മറ്റ് ഭാഷകളിലെ പ്രേക്ഷകരിലേക്കും അനന്ത് നാഗിന്റെ സാന്നിധ്യം വ്യാപിപ്പിക്കുന്നതിൽ ടെലിവിഷൻ വലിയൊരു പങ്ക് വഹിച്ചു. അദ്ദേഹത്തിന്റെ ഇളയ സഹോദരൻ ശങ്കർ നാഗ് സംവിധാനം ചെയ്ത ആർ.കെ. നാരായണന്റെ കഥകളെ അടിസ്ഥാനമാക്കിയുള്ള ദൂരദർശൻ പരമ്പരയായ 'മാൽഗുഡി ഡേയ്സി'ൽ അദ്ദേഹം അഭിനയിച്ചു. പല ഇന്ത്യൻ ഭാഷകളിലും സംപ്രേക്ഷണം ചെയ്യപ്പെട്ട ഈ പരമ്പരയിലൂടെ കന്നഡ സിനിമകൾ കാണാത്ത പ്രേക്ഷകരിലേക്കും അദ്ദേഹത്തിന്റെ അഭിനയമികവ് എത്തിച്ചേർന്നു.

തന്റെ കരിയറിന്റെ അവസാന ദശകങ്ങളിൽ മുഖ്യധാരാ സിനിമകളിലും കഥാപാത്രങ്ങൾക്ക് പ്രാധാന്യമുള്ള ചിത്രങ്ങളിലും അദ്ദേഹം വേഷമിട്ടു. 'മുങ്കരു മാലേ', 'ഗോധി ബന്ന സാധാരണ മൈകട്ടു', 'രാജ്കുമാര', 'കെ.ജി.എഫ്' എന്നിവയിൽ അദ്ദേഹം അഭിനയിച്ചു. 'കെ.ജി.എഫ്: ചാപ്റ്റർ 1'-ലെ ആനന്ദ് എന്ന കഥാപാത്രം പുതിയ തലമുറയിലെ പ്രേക്ഷകരിലേക്കും അദ്ദേഹത്തെ എത്തിച്ചു.

കരിയറിൽ നിരവധി പുരസ്കാരങ്ങളും അനന്ത് നാഗിനെ തേടിയെത്തിയിട്ടുണ്ട്. മികച്ച നടനുള്ള ഫിലിംഫെയർ അവാർഡ് സൗത്ത്, കർണാടക സംസ്ഥാന ചലച്ചിത്ര പുരസ്കാരം എന്നിവയ്ക്ക് പുറമെ കർണാടക രാജ്യോത്സവ പുരസ്കാരവും കർണാടക സംസ്ഥാന ലൈഫ് ടൈം അച്ചീവ്മെന്റ് പുരസ്കാരവും അദ്ദേഹം നേടിയിട്ടുണ്ട്. 2025-ൽ അദ്ദേഹത്തിന് പദ്മഭൂഷൺ ലഭിച്ചു. സിനിമ, ടെലിവിഷൻ, നാടകം എന്നീ മേഖലകളിൽ നീണ്ട കരിയറിനൊടുവിലാണ് ദാദാസാഹേബ് ഫാൽക്കെ പുരസ്കാരം അദ്ദേഹത്തെ തേടിയെത്തുന്നത്.
72-ാമത് ദേശീയ ചലച്ചിത്ര പുരസ്കാരങ്ങൾ

'അമരൻ' സിനിമയുടെ സംവിധായകൻ രാജ്കുമാർ പെരിയസാമി മികച്ച സംവിധായകനുള്ള പുരസ്കാരം നേടിയപ്പോൾ, 'ഭ്രമയുഗം', 'ചന്തു ചാംപ്യൻ' എന്നീ ചിത്രങ്ങളിലെ അഭിനയത്തിന് മമ്മൂട്ടിയും കാർത്തിക് ആര്യനും മികച്ച നടനുള്ള പുരസ്കാരം പങ്കിട്ടു. 'ആർട്ടിക്കിൾ 370' മികച്ച ഫീച്ചർ ചിത്രമായി തിരഞ്ഞെടുക്കപ്പെട്ടു, ഈ ചിത്രത്തിലെ അഭിനയത്തിന് യാമി ഗൗതം മികച്ച നടിക്കുള്ള പുരസ്കാരം നേടി. മികച്ച വിനോദാത്മക ജനപ്രിയ ചിത്രത്തിനുള്ള പുരസ്കാരം 'കൽക്കി 2898 എഡി' നേടി. വൈക്കം വിജയലക്ഷ്മിയാണ് മികച്ച ഗായിക.

72-ാമത് ദേശീയ ചലച്ചിത്ര പുരസ്കാര ചടങ്ങ് പരമ്പരാഗത ഡൽഹി വേദിയിൽ നിന്നുള്ള മാറ്റം കൂടിയാണ് അടയാളപ്പെടുത്തുന്നത്. ന്യൂഡൽഹിക്ക് പുറത്ത് ആദ്യമായി ഗുജറാത്തിലെ ഏകതാ നഗറിലാണ് ഈ ചടങ്ങ് നടന്നത്. ഫീച്ചർ ഫിലിമുകൾ, നോൺ-ഫീച്ചർ ഫിലിമുകൾ, സിനിമയെക്കുറിച്ചുള്ള എഴുത്തുകൾ എന്നിവയിലായി മൊത്തം 92 വിജയികളെയാണ് ആദരിക്കുന്നത്.