വിപണിയിൽ റാലി: സെൻസെക്സിൽ 1,300 പോയിന്റ് കുതിപ്പ്; നിക്ഷേപകർക്ക് നേട്ടം ആറു ലക്ഷം കോടി, കുതിപ്പ് തുടരുമോ?

വിപണിയിൽ കാളകളുടെ തിരിച്ചുവരവ്. ബുധനാഴ്ച വ്യാപാരം ആരംഭിച്ചയുടൻ സൂചികകൾ മികച്ച നേട്ടത്തിലെത്തി. സെൻസെക്സ് 1,300-ലധികം പോയിന്റ് ഉയർന്ന് 82,486-ലും നിഫ്റ്റി 350-ലധികം പോയിന്റ് കുതിച്ച് 25,362-ലുമെത്തി. ഇതോടെ ആറു ലക്ഷം കോടി രൂപയുടെ നേട്ടമാണ് നിക്ഷേപകർക്ക് ലഭിച്ചത്.

നിഫ്റ്റി സ്മോൾ ക്യാപ്, മിഡ് ക്യാപ് സൂചികകൾ ഒരു ശതമാനം നേട്ടത്തിലാണ് വ്യാപാരം നടത്തുന്നത്. സെക്ടറൽ സൂചികകളിൽ പൊതുമേഖലാ ബാങ്കുകൾ രണ്ടു ശതമാനം നേട്ടത്തോടെ മുൻനിരയിലെത്തി. അതേസമയം, ഫാർമ നഷ്ടം നേരിട്ടു.

നേട്ടത്തിനു പിന്നിൽ:

വിദേശ നിക്ഷേപകരുടെ തിരിച്ചുവരവ്

ഏറെക്കാലം ഓഹരികൾ വിറ്റൊഴിഞ്ഞശേഷം വിദേശ പോർട്ട്‌ഫോളിയോ നിക്ഷേപകർ ശക്തമായി തിരിച്ചെത്തിയിരിക്കുന്നു. നവംബറിൽ തുടർച്ചയായ ഏഴു വ്യാപാര ദിനങ്ങളിലും അവർ അറ്റ വാങ്ങലുകാരായിരുന്നു. ചൊവ്വാഴ്ച വിപണിക്ക് അവധിയായിരുന്നു. തിങ്കളാഴ്ചമാത്രം എൻ.എസ്.ഇ.യിലെ താൽക്കാലിക കണക്കുകൾ പ്രകാരം 7,212 കോടി രൂപയുടെ ഓഹരികളാണ് വിദേശ നിക്ഷേപകർ വാങ്ങിക്കൂട്ടിയത്.

2026-ലെ ആദ്യ 10 മാസത്തിൽ 31 ബില്യൺ ഡോളർ മൂല്യമുള്ള ഓഹരികളാണ് വിദേശികൾ വിറ്റൊഴിഞ്ഞത്. എന്നാൽ ഒക്ടോബർ പകുതിക്കുശേഷം 8.2 ബില്യൺ ഡോളറിന്റെ നിക്ഷേപം തിരികെയെത്തി. ഇതിൽ 5.8 ബില്യൺ ഡോളറും നവംബറിലെ ആറു വ്യാപാര ദിനങ്ങളിലാണ് ലഭിച്ചത് എന്നത് വൻ തിരിച്ചുവരവിനെ സൂചിപ്പിക്കുന്നു.

മികച്ച കോർപറേറ്റ് വരുമാനം

രണ്ടാം പാദത്തിൽ കമ്പനികൾ പ്രതീക്ഷിച്ചതിലും മികച്ച വരുമാനം നേടി. ജൂലൈ-സെപ്റ്റംബർ പാദത്തിൽ 181 കമ്പനികളാണ് മുൻവർഷത്തെ അപേക്ഷിച്ച് ഇരട്ടിയിലധികം അറ്റാദായം നേടിയത്. ബാങ്കിങ്, മെറ്റൽസ്, ഫാർമ, ഊർജം, ഉപഭോക്തൃ ഉത്പന്നങ്ങൾ തുടങ്ങിയ മേഖലകളിലെ കമ്പനികളാണ് നേട്ടത്തിൽ മുന്നിൽ.

രൂപയുടെ മൂല്യം

യു.എസ്. ഡോളറിനെതിരെ രൂപയുടെ മൂല്യത്തിൽ ഉണർവ് പ്രകടമായി. നടപ്പ് സാമ്പത്തിക വർഷത്തിൽ ഏറ്റവും മികച്ച പ്രകടനം കാഴ്ചവെച്ച ഏഷ്യൻ കറൻസികളിലൊന്നായി രൂപ മാറി. ആദ്യ രണ്ട് പാദങ്ങളിൽ മന്ദഗതിയിലായിരുന്ന രൂപയ്ക്ക് എണ്ണവിലയിടിവും നേട്ടമായി.

ക്രൂഡ് വിലയിടിവ്

ഈ വർഷം ഏറെ സമയവും ബാരലിന് 100 ഡോളറിനു മുകളിലായിരുന്നു ക്രൂഡ് വില. ഇറാനുമായുള്ള യുദ്ധം പ്രായോഗികമായി അവസാനിച്ചുവെന്ന ട്രംപിന്റെ പ്രഖ്യാപനം എണ്ണ വിപണിക്ക് ആശ്വാസമായി. നിലവിൽ ബാരലിന് 92 ഡോളർ നിലവാരത്തിലാണ് വ്യാപാരം നടക്കുന്നത്.

 

കമ്പനി / സൂചിക	പ്രകടനം	നിലവിലെ അവസ്ഥ
ഇൻഡിഗോ	5% വർധന	പ്രധാന നേട്ടമുണ്ടാക്കിയ ഓഹരി
എം & എം, എച്ച്.ഡി.എഫ്.സി ബാങ്ക്, എസ്.ബി.ഐ, ഭാരതി എയർടെൽ, പവർ ഗ്രിഡ്, എറ്റേണൽ, ഏഷ്യൻ പെയിന്റ്സ്, ആക്സിസ് ബാങ്ക്, ഐ.സി.ഐ.സി.ഐ ബാങ്ക്, എച്ച്.സി.എൽ ടെക്	3% വരെ വർധന	റാലിക്ക് നേതൃത്വം നൽകി
ടൈറ്റൻ	നേരിയ നഷ്ടം	സെൻസെക്‌സിൽ നഷ്ടം നേരിട്ട ഒരേയൊരു ഓഹരി
നിഫ്റ്റി പി.എസ്.യു ബാങ്ക്	2% വർധന	സെക്ടറൽ സൂചികകളിൽ കൂടുതൽ നേട്ടമുണ്ടാക്കി
നിഫ്റ്റി ഫാർമ	നഷ്ടത്തിൽ	റെഡ് സോണിൽ

വിപണി ഇനിയും കുതിക്കുമോ?

നവംബറിൽമാത്രം

ആറു വ്യാപാര ദിനങ്ങൾ കൊണ്ട് നിഫ്റ്റി ഒൻപതു ശതമാനം ഉയർന്നു. വിദേശ നിക്ഷേപകർ 53,170 കോടി രൂപയുടെ നിക്ഷേപം നടത്തി. ആഗോളതലത്തിൽ എ.ഐ. ഓഹരികളിലുണ്ടായ വിൽപന സമ്മർദം ഇന്ത്യ നേട്ടമാക്കുകയും ചെയ്തു.

എന്നാൽ ആഗോള സമ്മർദങ്ങൾ തുടരുന്നതിനാൽ ജാഗ്രതയോടെ വേണം മുന്നോട്ടുപോകാൻ. യു.എസിലെ പണപ്പെരുപ്പം ഉയർന്ന നിലയിൽ തുടരുകയാണ്. അതുകൊണ്ടുതന്നെ ഫെഡറൽ റിസർവ് നിരക്ക് കൂട്ടാനുള്ള സാധ്യത നിലനിൽക്കുന്നുണ്ട്. അതോടൊപ്പം യു.എസിലെ 10 വർഷത്തെ കടപ്പത്ര ആദായം അഞ്ചു ശതമാനത്തിലെത്തുകയും ചെയ്തു. നിക്ഷേപകർ അങ്ങോട്ട് തിരിയാനുള്ള സാധ്യതയുമുണ്ട്. അതോടൊപ്പം വൻനേട്ടത്തിൽനിന്നുള്ള ലാഭമെടുപ്പും വിപണിയിലെ നേട്ടത്തെ ബാധിച്ചേക്കാം.

വിദേശ നിക്ഷേപകരുടെ തിരിച്ചുവരവും കോർപറേറ്റ് വരുമാന വർധനവും വിപണിക്ക് പുതുഊർജം പകരും. അതോടൊപ്പം പണപ്പെരുപ്പവും ഫെഡറൽ റിസർവിന്റെ വരാനിരിക്കുന്ന നിരക്ക് തീരുമാനങ്ങളും വരും ദിവസങ്ങളിൽ നിർണായകമാകും.