ടാറ്റ ഗ്രൂപ്പിന്റെ തനതായ പ്രവർത്തന ശൈലിയുടെയും നേതൃത്വ വളർച്ചയുടെയും പ്രതീകമാണ് എൻ. ചന്ദ്രശേഖരൻ. സാധാരണ ഉദ്യോഗസ്ഥനിൽനിന്ന് ആഗോള കോർപ്പറേറ്റ് ഭീമന്റെ അത്യുന്നത പദവിയിലേക്കുള്ള അദ്ദേഹത്തിന്റെ ഉയർച്ച, സ്ഥാപനത്തിന്റെ തന്ത്രപ്രധാനമായ വളർച്ചയിൽ ഉദ്യോഗസ്ഥർക്ക് നൽകുന്ന പ്രാധാന്യം അടിവരയിടുന്നു. തന്റെ പടിയിറക്കവുമായി ബന്ധപ്പെട്ട പ്രസ്താവനയിൽ, ഗ്രൂപ്പിലെ 40 വർഷത്തെ സേവനത്തെയും 10 വർഷത്തെ ചെയർമാൻ പദവിയെയും അതീവ കൃതജ്ഞതയോടെ സ്മരിക്കുന്നുണ്ട്.

To advertise here,

അദ്ദേഹം ഇപ്രകാരം രേഖപ്പെടുത്തി:

'ടാറ്റ ഗ്രൂപ്പിലെ 40 വർഷത്തെ പ്രൊഫഷണൽ ജീവിതം ഞാൻ പൂർത്തിയാക്കിയിരിക്കുകയാണ്. പൗരാണികവും സൽപേരുള്ളതുമായ ഈ സ്ഥാപനത്തിനുവേണ്ടി പ്രവർത്തിക്കാൻ ലഭിച്ച അവസരത്തിന് ഞാൻ കടപ്പെട്ടിരിക്കുന്നു. കഴിഞ്ഞ ഒരു ദശകക്കാലം ടാറ്റ സൺസിനെ നയിക്കാൻ സാധിച്ചത് വലിയൊരു ബഹുമതിയായും അത്യന്തം ഗൗരവമേറിയ ബാധ്യതയായും ഞാൻ കണക്കാക്കുന്നു'.

ഉത്തരവാദിത്തത്തെ ഒരു പദവിയായല്ല, 'മഹത്തായ ഒരു ബാധ്യത' ആയാണ് അദ്ദേഹം കണ്ടത്. ഈ ധാർമിക ബോധമാണ് പുനർനിയമനവുമായി ബന്ധപ്പെട്ട സങ്കീർണമായ ഭരണപരമായ തടസങ്ങൾക്കിടയിലും ഇത്തരമൊരു നിലപാടെടുക്കാൻ അദ്ദേഹത്തെ പ്രേരിപ്പിച്ചത്.

ബോർഡിൽനിന്നുണ്ടായ നീക്കം

ഉന്നതതല കോർപ്പറേറ്റ് ഭരണനിർവ്വഹണത്തിൽ സ്ഥിരത ഉറപ്പാക്കാൻ ഭരണസമിതിയിലെ ഐകകണ്‌ഠ്യേനയുള്ള തീരുമാനങ്ങൾ ആവശ്യമാണ്. എൻ. ചന്ദ്രശേഖരന്റെ കാലാവധി നീട്ടുന്നതുമായി ബന്ധപ്പെട്ട നടപടിക്രമങ്ങൾ ഇപ്രകാരമായിരുന്നു:

  • സർ ദൊറാബ്ജി ടാറ്റ ട്രസ്റ്റും സർ രത്തൻ ടാറ്റ ട്രസ്റ്റും അദ്ദേഹത്തിന്റെ കാലാവധി അഞ്ച് വർഷത്തേക്കുകൂടി നീട്ടാൻ ഐകകണ്‌ഠ്യേന ശുപാർശ ചെയ്തു.
  • ടാറ്റ സൺസ് നോമിനേഷൻ ആൻഡ് റെമ്യൂണറേഷൻ കമ്മിറ്റിയും ബോർഡും ഈ നിർദേശത്തെ പിന്തുണച്ച് ശുപാർശ നൽകി.
  • 2026 ഫെബ്രുവരി 24-ന് നടന്ന ടാറ്റ സൺസ് ബോർഡ് യോഗത്തിൽ ഈ പ്രമേയം അവതരിപ്പിച്ചെങ്കിലും, ഒരു അംഗത്തിന്റെ വിയോജിപ്പിനെത്തുടർന്ന് തീരുമാനം സ്തംഭിച്ചു.

ടാറ്റ ട്രസ്റ്റ് ചെയർമാൻ നോയൽ ടാറ്റ ചന്ദ്രശേഖരന്റെ കാലാവധി നീട്ടുന്നതിനോട് യോജിച്ചിരുന്നില്ല. പുതിയ ബിസിനസുകളുടെ പ്രവർത്തനക്ഷമതയെക്കുറിച്ചും അവയ്ക്കുവേണ്ടി ചെലവാക്കുന്ന വലിയ തുകയെക്കുറിച്ചും അദ്ദേഹത്തിന് വിയോജിപ്പുണ്ടായിരുന്നു. ചന്ദ്രശേഖരന് 65 തികയുന്നതുവരെ അതായത് രണ്ട് വർഷത്തേക്കുകൂടി കാലാവധി നീട്ടി നൽകിയാൽ മതിയെന്ന നിലപാടിലായിരുന്നു അദ്ദേഹം.

ടാറ്റ ഗ്രൂപ്പിന്റെ പാരമ്പര്യമനുസരിച്ച്, നിർണായക തീരുമാനങ്ങളെടുക്കാറുള്ളത് കേവല ഭൂരിപക്ഷത്തിലല്ല, പൂർണമായ യോജിപ്പിലൂടെയാണ്. ഭൂരിഭാഗം പേരും പിന്തുണച്ചിട്ടും ഒരൊറ്റ അംഗം വിയോജിപ്പ് പ്രകടിപ്പിച്ചത് ഗ്രൂപ്പിന്റെ ഭരണപരമായ സുതാര്യതയ്ക്ക് വെല്ലുവിളിയായി. ആറ് മാസത്തോളം നീണ്ട ഈ സ്തംഭനാവസ്ഥ ഭരണപരമായ അനിശ്ചിതത്വത്തിന് കാരണമാകുമെന്ന് തിരിച്ചറിഞ്ഞ ചന്ദ്രശേഖരൻ, വ്യക്തിപരമായ താത്പര്യങ്ങളേക്കാൾ സ്ഥാപനത്തിന്റെ സ്ഥിരതയ്ക്ക് മുൻഗണന നൽകിക്കൊണ്ട് പടിയിറങ്ങാൻ തീരുമാനിക്കുകയായിരുന്നു. 

ആരാകും പിൻഗാമി?

ജാഗ്വാർ ലാൻഡ് റോവർ, ടാറ്റ സ്റ്റീൽ യൂറോപ്പ് തുടങ്ങിയ അന്താരാഷ്ട്ര സംരംഭങ്ങളുള്ള വമ്പൻ ഗ്രൂപ്പിനെ സംബന്ധിച്ച് നേതൃത്വത്തിലുള്ള വ്യക്തത നിക്ഷേപകരുടെ ആത്മവിശ്വാസത്തിന് അനിവാര്യമാണ്. ഈ അനിശ്ചിതത്വം ആഗോള ക്രെഡിറ്റ് റേറ്റിംഗിനെയും ദീർഘകാല പങ്കാളിത്തത്തെയും ബാധിച്ചേക്കാം എന്ന തിരിച്ചറിവിലാണ് അദ്ദേഹം പിന്മാറ്റം പ്രഖ്യാപിച്ചത്. തുടരാൻ താത്പര്യമില്ലെന്ന് വ്യക്തമാക്കി അദ്ദേഹം നൽകിയ പ്രധാന കാരണങ്ങൾ ഇവയാണ്:

സ്ഥാപനത്തിന്റെ താത്പര്യം: ജീവനക്കാർക്കും നിക്ഷേപകർക്കും നേതൃത്വത്തെക്കുറിച്ച് കൃത്യമായ ധാരണ നൽകി അനിശ്ചിതത്വം ഒഴിവാക്കുക.

തന്ത്രപ്രധാനമായ പദ്ധതികൾ: ഗ്രൂപ്പിന്റെ നിർണായക ഘട്ടത്തിലുള്ള പദ്ധതികൾക്ക് തടസ്സമില്ലാതെ മികച്ച നേതൃത്വം ഉറപ്പാക്കുക.

സുഗമമായ കൈമാറ്റം: 2027 ഫെബ്രുവരിക്ക് മുൻപായി പുതിയൊരു ചെയർമാനെ കണ്ടെത്താൻ ബോർഡിന് മതിയായ സമയം നൽകുക.

ടാറ്റ സൺസ് പോലുള്ള ആഗോള കോർപ്പറേറ്റ് സാമ്രാജ്യത്തിൽ 'നേതൃത്വത്തിലെ വ്യക്തത' ചർച്ചകൾക്ക് അതീതമായ ആവശ്യകതയാണ്. പ്രത്യേകിച്ചും വൻകിട വിദേശ നിക്ഷേപങ്ങളും തന്ത്രപ്രധാനമായ സംയുക്ത സംരംഭങ്ങളും നടന്നുകൊണ്ടിരിക്കുന്ന സാഹചര്യത്തിൽ.

മുന്നേറ്റം ഇങ്ങനെ

ചന്ദ്രശേഖരന്റെ കാലയളവിൽ ടാറ്റ ഗ്രൂപ്പ് വൻവളർച്ചയാണ് നേടിയത്.

 

2020(FY)

 2026(FY)

മൊത്തം

വരുമാനം

₹7.89 ലക്ഷം

കോടി

₹16.24 ലക്ഷം

കോടി

നികുതിക്ക്

ശേഷമുള്ള ലാഭം

(PAT)

₹32,000

കോടി

₹1.71

ലക്ഷം

കോടി

വിപണി മൂല്യം

₹9.31

ലക്ഷം

കോടി

₹24.39

ലക്ഷം

കോടി*

*FY25-ൽ ഇത് ₹27.85 ലക്ഷം കോടി വരെ എത്തിയിരുന്നു.

തന്ത്രപരമായ മാറ്റങ്ങൾ

ടാറ്റാ ഗ്രൂപ്പിനെ ആധുനിക വ്യവസായ ശൃംഖലയായി മാറ്റുന്നതിൽ നിർണായക പങ്ക് വഹിച്ചു.

വ്യോമയാന മേഖല: എയർ ഇന്ത്യയുടെ ഏറ്റെടുക്കലിലൂടെ ഗ്രൂപ്പ് വീണ്ടും വ്യോമയാന മേഖലയിലേക്ക് കരുത്തോടെ തിരിച്ചെത്തി.

പുതിയ സാങ്കേതികവിദ്യകൾ: സെമികണ്ടക്ടർ, ഇലക്ട്രോണിക്‌സ് നിർമാണം, ബാറ്ററി എന്നീ അത്യാധുനിക മേഖലകളിലേക്ക് ഗ്രൂപ്പ് പ്രവർത്തനം വ്യാപിപ്പിച്ചു.

ഡിജിറ്റൽ, ഇ.വി: ഡിജിറ്റൽ ബിസിനസ്സുകളിലും ഇലക്ട്രിക് വാഹന നിർമ്മാണത്തിലും വൻതോതിൽ നിക്ഷേപം നടത്തി.

ഉപഭോക്തൃ ഉത്പന്നം: ടാറ്റാ കൺസ്യൂമർ പ്രോഡക്ട്‌സ് പോലുള്ള കമ്പനികളെ ശക്തിപ്പെടുത്തി.

Also Read | എന്തുകൊണ്ട് ടാറ്റ സൺസിൽനിന്ന് എൻ. ചന്ദ്രശേഖരൻ രാജിവെച്ചു; പ്രസ്താവനയുടെ പൂർണരൂപം

എൻ. ചന്ദ്രശേഖരന്റെ വിടവാങ്ങൽ പ്രഖ്യാപനം മാത്രമായി ഇതിനെ കാണാൻ കഴിയില്ല. കോർപ്പറേറ്റ് മൂല്യങ്ങളുടെയും പ്രൊഫഷണൽ മാന്യതയുടെയും പ്രതിഫലനം കൂടിയാണിത്. 2027 ഫെബ്രുവരിവരെ കാലാവധിയുള്ളപ്പോൾ പുതിയ നേതൃത്വത്തെ കണ്ടെത്താനുള്ള സമയം നൽകിയാണ് അദ്ദേഹം പടിയിറങ്ങുന്നത്. മേധാവിയെന്ന കണ്ടെത്തുകയെന്ന ദൗത്യമാണ് ഇനി ടാറ്റ ഗ്രൂപ്പിന് മുന്നിലുള്ളത്. വരാനിരിക്കുന്ന വാർഷിക പൊതുയോഗം കൂടുതൽ വ്യക്തത നൽകിയേക്കാം.