ഇത്തവണയും പലിശ നിരക്കുകളിൽ മാറ്റം വരുത്താതെ ആർബിഐ റിപ്പോ നിരക്ക് 5.25 ശതമാനത്തിൽ നിലനിർത്തി. പശ്ചിമേഷ്യയിലെ സംഘർഷ സാഹചര്യം കണക്കിലെടുത്ത് 'നിഷ്പക്ഷ' നയം തുടരാൻ പണനയ സമിതി തീരുമാനിച്ചു.
അസംസ്കൃത എണ്ണവില വർധന, രൂപയുടെ മൂല്യമിടിവ് എന്നിവയോടൊപ്പം എൽ നിനോ മൂലമുണ്ടാകാവുന്ന പ്രതിസന്ധികൾ പണപ്പെരുപ്പത്തിന് ഭീഷണിയാണെങ്കിലും നിലവിലെ സാമ്പത്തിക സാഹചര്യം കണക്കിലെടുത്ത് നിരക്കുകളിൽ സ്ഥിരത നിലനിർത്താനാണ് സമിതി തീരുമാനിച്ചതെന്ന് ആർബിഐ ഗവർണർ സഞ്ജയ് മൽഹോത്ര പറഞ്ഞു.
പശ്ചിമേഷ്യൻ പ്രതിസന്ധി പരിഹരിക്കപ്പെടാത്തത് രാജ്യത്തിന്റെ സാമ്പത്തിക വളർച്ചയ്ക്ക് തടസ്സമാണെന്ന് സമിതി വിലയിരുത്തി. ഇതിന്റെ അടിസ്ഥാനത്തിൽ 2026-27 സാമ്പത്തിക വർഷത്തെ ജിഡിപി വളർച്ചാ അനുമാനം 6.6 ശതമാനമായി കുറച്ചിട്ടുണ്ട്. നടപ്പുവർഷത്തെ വിവിധ പാദങ്ങളിലെ വളർച്ചാ അനുമാനം ഇപ്രകാരമാണ്: ഒന്നാം പാദത്തിൽ 6.6 ശതമാനം, രണ്ടാം പാദത്തിൽ 6.3 ശതമാനം, മൂന്നാം പാദത്തിൽ 6.5 ശതമാനം, നാലാം പാദത്തിൽ 6.8 ശതമാനം.
പണപ്പെരുപ്പ അനുമാനം
നിലവിൽ ഉപഭോക്തൃ വില സൂചിക (CPI) അടിസ്ഥാനമാക്കിയുള്ള പണപ്പെരുപ്പം ലക്ഷ്യത്തിന് താഴെയാണെങ്കിലും ഭാവിയിൽ ഇത് വർധിക്കാനുള്ള സാധ്യതയുണ്ട്. അതിനാൽ 2026-27 സാമ്പത്തിക വർഷത്തിലെ പണപ്പെരുപ്പ അനുമാനം 5.1 ശതമാനമായി ഉയർത്തി. വിവിധ പാദങ്ങളിലെ പണപ്പെരുപ്പ നിരക്ക് താഴെ പറയുന്ന രീതിയിലായിരിക്കുമെന്നാണ് അനുമാനം: ഒന്നാം പാദം 4.2 ശതമാനം, രണ്ടാം പാദം 5.1 ശതമാനം, മൂന്നാം പാദം 5.9 ശതമാനം, നാലാം പാദം 5.4 ശതമാനം.
ഉഷ്ണതരംഗം, എൽ നിനോ സാഹചര്യങ്ങൾ, ശരാശരിയിൽ താഴെയുള്ള കാലവർഷം എന്നിവ ഭക്ഷ്യവില വർധനയ്ക്കും അതുവഴി പണപ്പെരുപ്പത്തിനും കാരണമായേക്കാമെന്നും സമിതി ചൂണ്ടിക്കാട്ടുന്നു.
| റിപ്പോ നിരക്ക് (Repo Rate) | 5.25% |
| സ്റ്റാൻഡിംഗ് ഡിപ്പോസിറ്റ് ഫെസിലിറ്റി (SDF) | 5.00% |
| മാർജിനൽ സ്റ്റാൻഡിംഗ് ഫെസിലിറ്റി (MSF) | 5.50% |
| ബാങ്ക് നിരക്ക് (Bank Rate) | 5.50% |
| നയ നിലപാട് (Policy Stance) | ന്യൂട്രൽ |
പ്രതിസന്ധികൾ
പശ്ചിമേഷ്യയിലെ യുഎസ്-ഇറാൻ യുദ്ധം ആഭ്യന്തര വളർച്ചയെയും പണപ്പെരുപ്പത്തെയും പ്രതികൂലമായി ബാധിക്കുന്നുണ്ടെന്ന് ആർബിഐ ഗവർണർ വ്യക്തമാക്കി. സംഘർഷം മൂലം ക്രൂഡ് ഓയിൽ വില വലിയ തോതിൽ വർധിക്കുന്നത് ഇന്ത്യയുടെ പണപ്പെരുപ്പത്തിന് ആക്കം കൂട്ടുന്നു. കൂടാതെ, ആഗോള വിതരണ ശൃംഖലയിലുണ്ടായ തടസ്സങ്ങൾ സാമ്പത്തിക പ്രവർത്തനങ്ങളെ ബാധിച്ചതിനൊപ്പം ഭൗമരാഷ്ട്രീയ പിരിമുറുക്കങ്ങൾ രൂപയുടെ മൂല്യത്തകർച്ചയ്ക്കും കാരണമായിട്ടുണ്ട്.
Content Highlights: Repo rate maintained at 5.25% to ensure stability., 2026-27 GDP growth projection revised downward to 6.6%., Inflation forecast for 2026-27 increased to 5.1%., Geopolitical tensions and El Nino identified as primary economic risks.
Published: 05 Jun 2026, 10:41 am IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented