കഥാകൃത്തിനെ കഥാവശേഷനാക്കുമോ സിനിമ എന്ന ചര്‍ച്ചയില്‍ ടി. പത്മനാഭന്‍ തന്റെ കാഴ്ചപ്പാട് വിശദമാക്കുന്നു. 

To advertise here,

സിനിമയുമായി എനിക്ക് ബന്ധമില്ല, താല്‍പര്യവുമില്ല. കെ.ജി ജോര്‍ജിന് ഹ്രസ്വചിത്രങ്ങള്‍ നിര്‍മിക്കാനായി നാലോ അഞ്ചോ കഥകള്‍ ഞാന്‍ കൊടുത്തു. കെ.ജി ജോര്‍ജ് മലയാള സിനിമയില്‍ കത്തിനില്‍ക്കുന്ന കാലത്ത് അക്കാലത്തെ ഏറ്റവും മികച്ച നടീനടന്മാരെ ഉപയോഗിച്ചുകൊണ്ട് അദ്ദേഹം എന്നോട് റൈറ്റ് വാങ്ങിയ കഥകള്‍ സിനിമയാക്കി. അവയെല്ലാം കാണാന്‍ ഞാന്‍ ശ്രമിച്ചിട്ടില്ല. കാണേണ്ടതില്ല എന്നെനിക്കു തോന്നി. കാരണം സിനിമ തികച്ചും വേറിട്ടൊരു കലയാണ്. എന്റെ കഥകള്‍ വാങ്ങിക്കൊണ്ടുപോയ ആള്‍ ആ കലയില്‍ നൈപുണ്യമുള്ളയളാണ്. എന്റെ കഥ അന്വേഷിച്ചുവരുമ്പോള്‍ വരുന്നയാളുടെ യോഗ്യതകൂടി ഞാന്‍ കണക്കിലെടുക്കാറുണ്ടെന്നത് വേറെ കാര്യം.  

Also Read

placeholder

എഴുത്തുകാരനെ കഥാവശേഷനാക്കുമോ സംവിധായകൻ? കടവും ഓപ്പോളും അപ്പുണ്ണിയുമൊക്കെ പറയുന്നത്

'പ്രകാശം പരത്തുന്ന ഒരു പെണ്‍കുട്ടി' എന്ന കഥയ്ക്ക് സംവിധായകന്‍ ജയരാജ് തിരക്കഥയൊരുക്കിയപ്പോള്‍ അതുമായി കാണാന്‍ വന്നു. ഞാന്‍ വായിക്കേണ്ടതില്ല എന്നാണ് ജയരാജിനോട് പറഞ്ഞത്. പ്രകാശം പരത്തുന്ന ഒരു പെണ്‍കുട്ടിയില്‍ നിന്നും ജയരാജ് സാംശീകരിച്ചതെന്താണോ അത് സിനിമയായി വരും. ജയരാജ് കഴിവ് തെളിയിച്ചയാളാണ്. അദ്ദേഹത്തിന്റെ കയ്യിലാണ് എന്റെ കഥയിരിക്കുന്നത്. തിരക്കഥ വായിക്കുന്നില്ല എന്ന് പറയാന്‍ കാരണം എന്റെ കഥയുടെ അളവുകോല്‍ വെച്ചാണ് ഞാന്‍ തിരക്കഥയെ സമീപിക്കുക. അത് ശരിയല്ല. ഞാന്‍ ഇങ്ങനെയല്ല എഴുതിയത് എന്ന് തിരക്കഥയെ നോക്കി പറയാന്‍ പാടില്ല. എന്റെ കഥയ്ക്ക് സിനിമയില്‍ എന്തുസംഭവിക്കുന്നു എന്ന് ആകുലപ്പെടേണ്ടതില്ല. കഥയും സിനിമയും രണ്ട് മാധ്യമമാണെന്ന ബോധ്യം എനിക്കുണ്ട്. സിനിമ എന്ന മാധ്യമത്തിന്റെ പിറകേ ഞാന്‍ പോകുന്നില്ല. 

ഒരു കൃതിയുടെ ഏതെങ്കിലും ഒരു അംശമായിരിക്കും സിനിമാക്കാരന്‍ ഡെവലപ് ചെയ്യുന്നത്. അത് അയാളുടെ സ്വാതന്ത്ര്യമാണ്. അയാളുടെ മേഖലയാണത്. അതില്‍ക്കയറി മേയാന്‍ എനിക്കധികാരമില്ല. ഞാനിതെല്ലാം പറയുന്നത് കഴിവുള്ള സംവിധായകരുടെ കാര്യമാണ്. മലയാളത്തില്‍ പതിനായിരക്കണക്കിന്, ലക്ഷക്കണക്കിന് എന്നുതന്നെ പറയാം, കഥാകൃത്തുക്കളുണ്ട്. ടി.പത്മനാഭന്മാര്‍ അധികമൊന്നുമില്ല. ആയിരക്കണക്കിന് സംവിധായകരുമുണ്ട്. ഇന്നേവരെ ഒരു സിനിമാക്കാരനോടും എന്റെ കഥ സിനിമയാക്കൂ എന്നുപറഞ്ഞ് ഞാന്‍ സമീപിച്ചിട്ടില്ല. എന്റെ കഥയൊന്നു സിനിമയാക്കൂ എന്ന് മുറവിളികൂട്ടുന്ന ചില കഥാകൃത്തുക്കളെ പേടിച്ച് സംവിധായകന്‍ സത്യന്‍ അന്തിക്കാട് കോഴിക്കോട് റെയില്‍വേ സ്‌റ്റേഷനില്‍ ഇറങ്ങുന്നതിനുപകരം ഫറോക്ക് സ്‌റ്റേഷനില്‍ ഇറങ്ങി ടാക്‌സി പിടിച്ച് കോഴിക്കോട് വന്നിരുന്ന കഥ കേട്ടിട്ടുണ്ട്. 

കഥ എന്ന ശക്തമായ മാധ്യമത്തിലൂടെ എനിക്ക് പറയാനുള്ളത് പറയാം, അതുകൊണ്ട് ഞാന്‍ സിനിമയെ അത്രയേ പരിഗണിക്കുന്നുള്ളൂ എന്നൊന്നും വളച്ചൊടിക്കരുത്. സിനിമ വലിയ മാധ്യമമാണ്. പുതിയ കാലത്തിന്റെ ഏറ്റവും ശക്തവും ഫലപ്രദവുമായ കലാരൂപമാണ് സിനിമ. അതില്‍ താല്‍പര്യമുള്ളവര്‍ ചെയ്യട്ടെ. കഴിവുള്ളവര്‍ സിനിമ ചെയ്യട്ടെ. ആയിരക്കണക്കിന് സിനിമാക്കാര്‍ ഉണ്ട്. നമ്മള്‍ എത്രപേരെ ഓര്‍ക്കുന്നു? പതിനായിരക്കണക്കിന് കഥാകൃത്തുക്കളുണ്ട് എത്രപേര്‍ ഓര്‍മിക്കപ്പെടുന്നു?