ട്രെയിനിലെ സ്ലീപ്പർ ക്ലാസ് യാത്രകൾ പലപ്പോഴും അപ്രതീക്ഷിതമായ അനുഭവങ്ങൾ സമ്മാനിക്കുന്ന ഒന്നാണ്. സമാധാനമായി ഉറങ്ങി യാത്ര ചെയ്യാമെന്ന് കരുതി ടിക്കറ്റ് ബുക്ക് ചെയ്ത കനേഡിയൻ സഞ്ചാരികൾക്ക് ലഭിച്ചതാകട്ടെ ഒരിക്കലും മറക്കാനാവാത്ത ഒരനുഭവവും. കിം ഗ്രീൻവുഡ് എന്ന കനേഡിയൻ വനിത ഇൻസ്റ്റാഗ്രാമിൽ പങ്കുവെച്ച വീഡിയോ ഇപ്പോൾ സോഷ്യൽ മീഡിയയിൽ വൈറലായിരിക്കുകയാണ്.

To advertise here,

ജൽഗാവുൻ ജംഗ്ഷനിൽ നിന്ന് ചന്ദ്രാപുരിലേക്കുള്ള ഏഴ് മണിക്കൂർ യാത്രയ്ക്ക് ഉറങ്ങാൻ സൗകര്യമുണ്ടാകും എന്ന് കരുതിയാണ് കിം സ്ലീപ്പർ ക്ലാസ് തിരഞ്ഞെടുത്തത്. എന്നാൽ ഇന്ത്യൻ ട്രെയിനുകളിലെ സ്ലീപ്പർ ക്ലാസിൽ ടിക്കറ്റ് എടുക്കുന്നത് ഒരു ബെർത്തിന് വേണ്ടിയാണെങ്കിലും, ആ സ്ഥലം യഥാർത്ഥത്തിൽ ഒരു വലിയ 'കമ്മ്യൂണിറ്റി ഏരിയ' ആയി മാറുമെന്ന് കിം വൈകാതെ മനസ്സിലാക്കി.

യാത്ര ആരംഭിച്ചതോടെ ഇവരുടെ ക്യാബിനിലേക്ക് നിരവധി കുട്ടികളും കുടുംബങ്ങളും എത്തിത്തുടങ്ങി. ഉറക്കം നഷ്ടപ്പെടുമെന്ന് മനസ്സിലായെങ്കിലും ദേഷ്യപ്പെടുന്നതിന് പകരം ബഹളങ്ങളെ സ്വീകരിക്കാനാണ് ദമ്പതികൾ തീരുമാനിച്ചത്. വൈകാതെ തന്നെ കിമ്മിന്റെ പങ്കാളി കുട്ടികൾക്കൊപ്പം കളികളിൽ ഏർപ്പെടുകയും ചെറിയ ക്യാബിൻ വലിയ സൗഹൃദ വേദിയായി മാറുകയും ചെയ്തു.

യാത്രയിലുടനീളം സഹയാത്രികർ തങ്ങളുടെ കൈവശമുള്ള നാടൻ വിഭവങ്ങൾ ഇവർക്ക് നൽകി. ചിലർ ട്രെയിൻ നിൽക്കുന്ന സ്റ്റേഷനുകളിൽ നിന്ന് ഭക്ഷണം വാങ്ങി നൽകിയപ്പോൾ മറ്റു ചിലർ തങ്ങളുടെ വീട്ടിൽ നിന്ന് കൊണ്ടുവന്ന വിഭവങ്ങൾ വിദേശ സഞ്ചാരികൾക്ക് രുചിക്കാൻ കൊടുത്തു. അപരിചിതരായ ആളുകൾ തമ്മിലുള്ള  വലിയ സഹകരണവും സ്നേഹവുമാണ് തങ്ങളെ ഏറ്റവും കൂടുതൽ അത്ഭുതപ്പെടുത്തിയതെന്ന് കിം പറയുന്നു.

‘ഏഴ് മണിക്കൂർ നീണ്ട ഉറക്കമില്ലാത്ത യാത്രയായിരുന്നു അത്, എങ്കിലും അതിൽ എനിക്ക് യാതൊരു പരാതിയുമില്ല. ആ അനുഭവത്തിന് പകരം മറ്റൊന്നും ഞാൻ ആഗ്രഹിക്കുന്നില്ല’ എന്ന് കിം ഗ്രീൻവുഡ് തന്റെ പോസ്റ്റിൽ കുറിച്ചു. ഇതിനോടകം ആറ് ലക്ഷത്തിലധികം ആളുകൾ കണ്ട വീഡിയോയ്ക്ക് താഴെ നിരവധി ഇന്ത്യക്കാരാണ് കമന്റുകളുമായി എത്തുന്നത്. ഉറക്കം നഷ്ടപ്പെട്ടതിന് ദേഷ്യപ്പെടുന്നതിന് പകരം ഇന്ത്യൻ റെയിൽവേയിലെ 'കൂട്ടുസംസ്കാരം' ആസ്വദിക്കാൻ കാണിച്ച മനസ്സിനെ അഭിനന്ദിച്ചും ചിലരെത്തി.