ദിവസങ്ങള്‍ക്ക് മുമ്പാണ് ബോളിവുഡ് താരം ആലിയ ഭട്ടിനെ ലോകത്തെ ഏറ്റവും മികച്ച ആഡംബര ബ്രാന്‍ഡുകളില്‍ ഒന്നായ ഗുച്ചിയുടെ ഗ്ലോബല്‍ അംബാസിഡറായി തിരഞ്ഞെടുത്തത്.  ഇറ്റാലിയന്‍ ബ്രാന്‍ഡ് കൂടിയായ ഗുച്ചിയുടെ അംബാസിഡറാകുന്ന ആദ്യ ഇന്ത്യന്‍ താരം എന്ന ചരിത്ര നേട്ടവും ആലിയ സ്വന്തമാക്കിയിരുന്നു. ഇതിന് പിന്നാലെ ദക്ഷിണ കൊറിയയിലെ സിയോളില്‍ നടന്ന ഗുച്ചി ക്രൂയിസ് ഷോയിലും താരം പങ്കെടുത്തു.

To advertise here,

ഈ ചടങ്ങില്‍ ആലിയ ഔട്ട്ഫിറ്റിനൊപ്പം ഉപയോഗിച്ച ബാഗാണ് ഇപ്പോള്‍ ഫാഷന്‍ ലോകത്തെ ചര്‍ച്ചാവിഷയം. ഗുച്ചിയുടെതന്നെ ജാക്കി 1961 ട്രാന്‍സ്പാരന്റ് ബാഗാണ് ആലിയ സ്റ്റൈല്‍ ചെയ്തത്. ബാഗ് ട്രാന്‍സ്പാരന്റ് ആയതിനാല്‍ അതിനുള്ളിലുള്ളതെല്ലാം കാണും. എന്നാല്‍ ചടങ്ങില്‍ നിന്നുള്ള ചിത്രങ്ങളില്‍ ആലിയയുടെ ബാഗ് കാലിയായിട്ടാണ് കാണുന്നത്. ഇതോടെ ആളുകള്‍ താരത്തിനെതിരെ വിമര്‍ശനവുമായി രംഗത്തെത്തുകയായിരുന്നു.

ബാഗില്‍ ഒന്നുമില്ലെങ്കില്‍ പിന്നെ എന്തിനാണ് അത് ചുമയ്ക്കുന്നത്, എന്തെങ്കിലും ഒരു സാധനമെങ്കിലും ആ ബാഗില്‍ വെയ്ക്കാമായിരുന്നു എന്നെല്ലാമാണ് ആളുകള്‍ പറയുന്നത്. എന്നാല്‍ ഇതിനെല്ലാം മറുപടിയുമായി താരം തന്നെ രംഗത്തെത്തി.

ചടങ്ങില്‍ നിന്നുള്ള ചിത്രങ്ങള്‍ പങ്കുവെച്ച് അതിനൊപ്പം ആലിയ കുറിച്ചത് ഇങ്ങനെയാണ്. 'അതെ, ബാഗ് കാലിയായിരുന്നു'. ഗുച്ചിയുടെ മറ്റു ഗ്ലോബല്‍ അംബാസിഡര്‍മാരായ ഹോളിവുഡ് താരം ഡക്കോട്ട ജോണ്‍സണ്‍, കെ പോപ്പ് ഗ്രൂപ്പായ ന്യൂ ജീന്‍സിലെ ഹാനി, ഇംഗ്ലീഷ് ഗായകനും നടനുമായ ഹാരി സ്‌റ്റൈല്‍സ് എന്നിവരേയും ചിത്രങ്ങളില്‍ കാണാം.

കറുപ്പ് നിറത്തിലുള്ള ഷോര്‍ട്ട് ബോഡികോണ്‍ ഔട്ട്ഫിറ്റിലാണ്‌ ആലിയ ഷോയ്ക്ക് എത്തിയത്. ഈ ഔട്ട്ഫിറ്റില്‍ മുഴുവന്‍ വൃത്താകൃതിയില്‍ സില്‍വര്‍ ത്രെഡ് വര്‍ക്ക് ചെയ്തിട്ടുണ്ട്. സ്ലീവ് ലെസ് നെക്കില്‍ ക്ലോസ്ഡ് നെക്ക് ലൈനാണ് പരീക്ഷിച്ചത്. 

നേരത്തെ ലോകത്തെ ഏറ്റവും വലിയ ഫാഷന്‍ മാമാങ്കമായ മെറ്റ് ഗാലയില്‍ ആലിയ ആദ്യമായി ചുവടുവെച്ചിരുന്നു. നേപ്പാള്‍ വംശജനായ അമേരിക്കന്‍ ഡിസൈനര്‍ പ്രബല്‍ ഗുരുങ്ങ് ഡിസൈന്‍ ചെയ്ത ഗൗണിലായിരുന്നു ആലിയയുടെ അരങ്ങേറ്റം. മുംബൈയില്‍ നിന്നുള്ള അനെയ്ത ഷറഫ് അദാജാനിയായിരുന്നു സ്റ്റൈലിസ്റ്റ്.