തമിഴ്നാട് പൊതുമരാമത്ത്, കായിക വികസന വകുപ്പ് മന്ത്രി ആധവ് അർജുനയും ഭാര്യ ഡെയ്സി മാർട്ടിനും 14 വർഷം നീണ്ട ദാമ്പത്യ ജീവിതം അവസാനിപ്പിക്കുന്നു. ഔദ്യോഗിക ഇൻസ്റ്റഗ്രാം പേജിലൂടെ ഡെയ്സി മാർട്ടിനാണ് ഇക്കാര്യം ഔദ്യോഗികമായി അറിയിച്ചത്. പ്രമുഖ വ്യവസായിയും ലോട്ടറി രാജാവ് എന്നറിയപ്പെടുന്ന സാന്റിയാഗോ മാർട്ടിന്റെ മകളുമാണ് ഡെയ്സി മാർട്ടിൻ. പരസ്പര സമ്മതത്തോടെയാണ് വേർപിരിയാനുള്ള തീരുമാനമെടുത്തതെന്നും, എന്നാൽ തങ്ങളുടെ കുഞ്ഞിന്റെ ഭാവിക്കും സന്തോഷത്തിനും വേണ്ടി മാതാപിതാക്കൾ എന്ന നിലയിലുള്ള ഉത്തരവാദിത്തങ്ങൾ ഒരുമിച്ച് നിർവഹിക്കുമെന്നും ഡെയ്സി കുറിപ്പിൽ വ്യക്തമാക്കി.

To advertise here,

'കഴിഞ്ഞ 14 വർഷമായി ഞങ്ങൾ പരസ്പരം ജീവിതത്തിന്റെ ഭാഗമായിരുന്നു. സ്‌നേഹവും പരസ്പര ധാരണയും മാറ്റങ്ങളും നിറഞ്ഞ ഒരു യാത്രയായിരുന്നു അത്. സുഹൃത്തുക്കളായും ജീവിതപങ്കാളികളായും മാതാപിതാക്കളായും ജീവിതത്തിന്റെ വിവിധ ഘട്ടങ്ങളിലൂടെ ഞങ്ങൾ ഒരുമിച്ച് സഞ്ചരിച്ചു. എന്നാൽ ഇന്ന്, ആധവ് അർജുനയും ഞാനും ദമ്പതികൾ എന്ന നിലയിൽ വേർപിരിയാനും വ്യത്യസ്ത പാതകളിലൂടെ സഞ്ചരിക്കാനും പരസ്പര സമ്മതത്തോടെ തീരുമാനിച്ചിരിക്കുകയാണ്,' ഡെയ്സി തന്റെ കുറിപ്പിൽ വ്യക്തമാക്കി.

ബന്ധം വേർപെടുത്തുമ്പോഴും തങ്ങൾക്കിടയിലുള്ള സൗഹൃദവും ബഹുമാനവും നിലനിൽക്കുമെന്ന് ഡെയ്സി അടിവരയിടുന്നു. 'ഇത് ഞങ്ങളുടെ ഇരുവരുടെയും ജീവിതത്തിലെ പുതിയൊരു അധ്യായത്തിന് തുടക്കം കുറിക്കുമ്പോഴും, ഞങ്ങളുടെ കുഞ്ഞിന്റെ സന്തോഷവും ക്ഷേമവും ഉറപ്പാക്കുന്നതിനും ഒരുമിച്ച് വളർത്തുന്നതിനുമുള്ള ഞങ്ങളുടെ പ്രതിബദ്ധതയ്ക്ക് എപ്പോഴും പ്രഥമ പരിഗണന ഉണ്ടായിരിക്കും. ആധവ് അർജുനയോട് എനിക്ക് എന്നും ബഹുമാനമുണ്ടായിരിക്കും. അദ്ദേഹം തിരഞ്ഞെടുക്കുന്ന എല്ലാ മേഖലകളിലും സന്തോഷവും സമാധാനവും വിജയവും ഉണ്ടാകട്ടെ എന്ന് ഞാൻ ആത്മാർത്ഥമായി ആശംസിക്കുന്നു. ജീവിതത്തിലെ ഈ മാറ്റത്തിലൂടെ ഞങ്ങൾ കടന്നുപോകുമ്പോൾ നിങ്ങളുടെ എല്ലാവരുടെയും സഹകരണവും ദയയും സ്വകാര്യതയും ഞങ്ങൾ ആത്മാർത്ഥമായി അഭ്യർത്ഥിക്കുന്നു,' എന്നും അവർ കൂട്ടിച്ചേർത്തു.

തമിഴ്നാട് രാഷ്ട്രീയത്തിലും വ്യവസായ മേഖലയിലും ഏറെ സ്വാധീനമുള്ള വ്യക്തിത്വങ്ങളാണ് ആധവ് അർജുനയും ഡെയ്സി മാർട്ടിനും. സി. ജോസഫ് വിജയ് നേതൃത്വം നൽകുന്ന തമിഴക വെട്രി കഴകം (ടി.വി.കെ) സർക്കാരിലെ ഏറ്റവും പ്രധാനപ്പെട്ട മന്ത്രിമാരിൽ ഒരാളാണ് ആധവ് അർജുന. നിലവിൽ പൊതുമരാമത്ത്, കായിക വികസന വകുപ്പുകളുടെ ചുമതലയാണ് അദ്ദേഹം വഹിക്കുന്നത്.

കായിക ഭരണരംഗത്തും രാഷ്ട്രീയത്തിലും തന്റേതായ വ്യക്തിമുദ്ര പതിപ്പിച്ച നേതാവാണ് ആധവ് അർജുന. ബാസ്‌കറ്റ്‌ബോൾ ഫെഡറേഷൻ ഓഫ് ഇന്ത്യയുടെ പ്രസിഡന്റ് എന്ന നിലയിലും അദ്ദേഹം പ്രവർത്തിച്ചിട്ടുണ്ട്. കായിക താരമായിരുന്ന കാലം മുതൽ തന്നെ കായിക മേഖലയുടെ വികസനത്തിനായി നിരവധി പദ്ധതികൾക്ക് അദ്ദേഹം നേതൃത്വം നൽകി. പിന്നീട് രാഷ്ട്രീയത്തിലേക്ക് പ്രവേശിച്ച അദ്ദേഹം വിടുതലൈ ചിരുതൈകൾ കക്ഷിയിലൂടെയാണ് സജീവ രാഷ്ട്രീയത്തിൽ ശ്രദ്ധിക്കപ്പെട്ടത്. തുടർന്ന് സി. ജോസഫ് വിജയ് രൂപീകരിച്ച തമിഴക വെട്രി കഴകത്തിൽ ചേരുകയും പാർട്ടിയുടെ തിരഞ്ഞെടുപ്പ് തന്ത്രങ്ങൾ മെനയുന്നതിൽ നിർണ്ണായക പങ്കുവഹിക്കുകയും ചെയ്തു. ടി.വി.കെ അധികാരത്തിൽ എത്തിയപ്പോൾ സുപ്രധാന വകുപ്പുകൾ തന്നെ അദ്ദേഹത്തെ തേടിയെത്തി.

വ്യവസായ ലോകത്ത് തന്റേതായ ഇടം കണ്ടെത്തിയ സംരംഭകയാണ് ഡെയ്സി മാർട്ടിൻ. ഇന്ത്യയിലെ പ്രമുഖ വ്യവസായിയും ഫ്യൂച്ചർ ഗെയിമിംഗ് ആൻഡ് ഹോട്ടൽ സർവീസസ് ഉടമയുമായ സാന്റിയാഗോ മാർട്ടിന്റെ മകളാണിവർ. പിതാവിന്റെ വ്യവസായ സാമ്രാജ്യത്തിന്റെ തണലിൽ നിൽക്കാതെ സ്വന്തമായി സംരംഭങ്ങൾ കെട്ടിപ്പടുക്കുന്നതിലാണ് ഡെയ്സി ശ്രദ്ധ കേന്ദ്രീകരിച്ചത്.

ഡെയ്സി മാർട്ടിന്റെ ലിങ്ക്ഡ്ഇൻ പ്രൊഫൈൽ പ്രകാരം, അറൈസ് ഇൻവെസ്റ്റ്മെന്റ്സ് ആൻഡ് ക്യാപിറ്റൽ പ്രൈവറ്റ് ലിമിറ്റഡ് എന്ന സ്ഥാപനത്തിന്റെ മാനേജിംഗ് ഡയറക്ടറാണ് അവർ. സമൂഹത്തിലെ താഴെത്തട്ടിലുള്ളവർക്കും പാർശ്വവൽക്കരിക്കപ്പെട്ടവർക്കും സുരക്ഷിതമായ സാമ്പത്തിക പിന്തുണ നൽകുക എന്നതാണ് ഈ സ്ഥാപനത്തിന്റെ പ്രധാന ലക്ഷ്യം. പ്രത്യേകിച്ചും സ്ത്രീ ശാക്തീകരണത്തിന് ഊന്നൽ നൽകിക്കൊണ്ടുള്ള സാമ്പത്തിക പദ്ധതികൾക്കാണ് അവർ നേതൃത്വം നൽകുന്നത്.

തമിഴ്നാട്ടിലെ സാമൂഹിക-സാംസ്‌കാരിക മേഖലകളിലും ജീവകാരുണ്യ പ്രവർത്തനങ്ങളിലും ഡെയ്സി സജീവമാണ്. മാർട്ടിൻ ചാരിറ്റബിൾ ട്രസ്റ്റിന്റെ പ്രവർത്തനങ്ങളിലും അവർ നിർണ്ണായക പങ്കുവഹിക്കുന്നുണ്ട്. വിദ്യാഭ്യാസം, ആരോഗ്യം, സ്ത്രീകളുടെ സ്വയംതൊഴിൽ സംരംഭങ്ങൾ എന്നിവയ്ക്ക് പിന്തുണ നൽകുന്ന നിരവധി പദ്ധതികൾക്ക് അവർ ചുക്കാൻ പിടിച്ചിട്ടുണ്ട്.

പ്രണയവും വിവാഹവും രാഷ്ട്രീയ ചലനങ്ങളും

14 വർഷം മുമ്പായിരുന്നു ആധവ് അർജുനയുടെയും ഡെയ്സി മാർട്ടിന്റെയും വിവാഹം. തമിഴ്നാട്ടിലെ രാഷ്ട്രീയ-വ്യവസായ പ്രമുഖർ പങ്കെടുത്ത ആഡംബരപൂർണ്ണമായ ചടങ്ങിലായിരുന്നു ഇവരുടെ വിവാഹം നടന്നത്. വിവാഹശേഷം ആധവ് അർജുനയുടെ ബിസിനസ്, കായിക, രാഷ്ട്രീയ വളർച്ചയിൽ ഡെയ്സി വലിയ പിന്തുണ നൽകിയിരുന്നു.

കഴിഞ്ഞ കുറച്ചു വർഷങ്ങളായി തമിഴ്നാട് രാഷ്ട്രീയത്തിൽ ആധവ് അർജുനയുടെ പേര് വലിയ രീതിയിൽ ചർച്ച ചെയ്യപ്പെട്ടിരുന്നു. പ്രത്യേകിച്ച് ഇലക്ടറൽ ബോണ്ടുകളുമായി ബന്ധപ്പെട്ട വിവാദങ്ങൾ ഉയർന്നുവന്ന സമയത്ത്, സാന്റിയാഗോ മാർട്ടിന്റെ കമ്പനിയായ ഫ്യൂച്ചർ ഗെയിമിംഗ് ഏറ്റവും കൂടുതൽ ബോണ്ടുകൾ വാങ്ങിയത് വലിയ രാഷ്ട്രീയ കോളിളക്കങ്ങൾക്ക് വഴിവെച്ചിരുന്നു. അക്കാലത്ത് ആധവ് അർജുനയുടെ രാഷ്ട്രീയ നീക്കങ്ങളും മാർട്ടിൻ കുടുംബവുമായുള്ള ബന്ധവും പ്രതിപക്ഷ പാർട്ടികൾ ആയുധമാക്കിയിരുന്നു.

എന്നാൽ എല്ലാ പ്രതിസന്ധികളെയും അതിജീവിച്ച് ആധവ് അർജുന തമിഴ്നാട് രാഷ്ട്രീയത്തിൽ തന്റെ സ്ഥാനം ഉറപ്പിച്ചു. വി.സി.കെ വിട്ട് ടി.വി.കെയിൽ എത്തിയതും, വിജയ്യുടെ വിശ്വസ്തനായി മാറിയതും തമിഴ്നാട് രാഷ്ട്രീയത്തിലെ നിർണ്ണായക വഴിത്തിരിവുകളായിരുന്നു. മന്ത്രിപദവിയിൽ എത്തിയതിന് പിന്നാലെ പൊതുമരാമത്ത് മേഖലയിലും കായിക രംഗത്തും വലിയ മാറ്റങ്ങൾക്ക് അദ്ദേഹം തുടക്കം കുറിച്ചിരുന്നു.

ആധവ് അർജുനയുടെ ഭാഗത്തുനിന്നും ഇതുവരെ ഔദ്യോഗിക പ്രതികരണങ്ങളൊന്നും വന്നിട്ടില്ല. എങ്കിലും ഇരുവരും ചേർന്നെടുത്ത തീരുമാനമാണ് ഇതെന്ന് ഡെയ്സി വ്യക്തമാക്കിയ സാഹചര്യത്തിൽ, മന്ത്രിയുടെ ഭാഗത്തുനിന്നും സമാനമായ നിലപാട് തന്നെയാകും ഉണ്ടാവുക എന്നാണ് സൂചന.