ഇളയമകളെ പരിചയപ്പെടുത്തി ദീപികയും രൺവീറും ; കുടുംബത്തിനാകെ വസ്ത്രമൊരുക്കി മസാബ ഗുപ്ത

വിജയദശമി ദിനത്തിലാണ് ദീപിക പദുക്കോണും രൺവീർ സിങ്ങും ഇളയമകളുടെ പേര് വെളിപ്പെടുത്തിയത്. ഇൻസ്റ്റഗ്രാമിൽ പങ്കുവച്ച കുടുംബചിത്രത്തിലൂടെയാണ് കുഞ്ഞിനെ ആരാധകർക്ക് പരിചയപ്പെടുത്തിയത്. ദേവി പദുക്കോൺ സിങ് എന്നാണ് മകൾക്ക് പേരിട്ടിരിക്കുന്നത്. മൂത്തമകൾ ദുവയും ചിത്രത്തിലുണ്ട്. ഇളം നിറങ്ങളിലുള്ള പരമ്പരാഗത വസ്ത്രങ്ങളാണ് നാലുപേരും ധരിച്ചിരിക്കുന്നത്. കുടുംബചിത്രത്തിലെ വസ്ത്രങ്ങളെല്ലാം ഡിസൈനർ മസാബ ഗുപ്തയാണ് ഒരുക്കിയത്.

കുർത്ത സെറ്റിന് 90,000 രൂപ

ഹൗസ് ഓഫ് മസാബയുടെ 'നൂർ ബൻ ഗയേ' എന്ന കുർത്ത സെറ്റാണ് ദീപിക ധരിച്ചത്. ബീജ്, ഗോൾഡ് നിറങ്ങൾക്കൊപ്പം പീച്ച് നിറത്തിലുള്ള അലങ്കാരപ്പണികളും ചേർന്നതാണ് വസ്ത്രം. സ്‌ട്രെയിറ്റ് കട്ട് കുർത്ത, വീതിയേറിയ പാന്റ്‌സ്, രണ്ട് നിറങ്ങൾ ചേർന്ന ദുപ്പട്ട എന്നിവയാണ് സെറ്റിലുള്ളത്. പീച്ച് നിറത്തിലുള്ള പാച്ച് വർക്കുകളും കൈകൊണ്ട് ചെയ്ത സർദോസി എംബ്രോയ്ഡറിയുമാണ് കുർത്തയുടെ പ്രധാന ആകർഷണം.ലോഹനൂലുകൾ ഉപയോഗിച്ച് തുണിയിൽ അലങ്കാരപ്പണികൾ ചെയ്യുന്ന പരമ്പരാഗത രീതിയാണ് സർദോസി. വസ്ത്രത്തിന് രാജകീയമായ ഭംഗി നൽകുന്ന ഈ എംബ്രോയ്ഡറി ദീപികയുടെ കുർത്തയ്ക്ക് കൂടുതൽ മനോഹാരിത നൽകിയിട്ടുണ്ട്.

ദീപികയുടെ വസ്ത്രത്തിൽ ഏറ്റവും ശ്രദ്ധേയമായ ഭാഗങ്ങളിലൊന്ന് ദുപ്പട്ടയാണ്. പീച്ച് നിറത്തിലുള്ള ക്രഷ്ഡ് ടിഷ്യൂ ഫാബ്രിക്കിലാണ് ഇത് ഒരുക്കിയിരിക്കുന്നത്. രണ്ട് നിറങ്ങൾ ചേർന്ന ദുപ്പട്ടയ്ക്ക് അലങ്കാരപ്പണികളുള്ള ബോർഡറുമുണ്ട്.

ദുപ്പട്ടയുടെ അറ്റങ്ങൾ സാധാരണ നേർരേഖയിലല്ല. മനോഹരമായ വളവുകളും സ്‌കാലപ്പ് ആകൃതിയിലുള്ള അരികുകളുമാണ് ഉപയോഗിച്ചിരിക്കുന്നത്. അസമമായ വളവുകളോടുകൂടിയ ഈ ഡിസൈൻ കുർത്ത സെറ്റിന് വ്യത്യസ്തമായ ഭംഗി നൽകുന്നു.വസ്ത്രത്തിലെ എംബ്രോയ്ഡറിയും ടിഷ്യൂ ഫാബ്രിക്കിന്റെ തിളക്കവും പരമ്പരാഗത ശൈലിയിലുള്ള ലുക്കിന് അനുയോജ്യമായി.

മേക്കപ്പിലും ലാളിത്യം

വലിയ ജുംകി കമ്മലുകളാണ് ദീപിക വസ്ത്രത്തിനൊപ്പം ധരിച്ചത്. മുടി നടുവിൽ വകഞ്ഞ് ഇരുവശത്തേക്കും അഴിച്ചിട്ടിരുന്നു. സോഫ്റ്റ് ബ്ലോഔട്ട് സ്‌റ്റൈലാണ് മുടിക്ക് നൽകിയത്.മേക്കപ്പിലും മൃദുവായ നിറങ്ങൾക്കാണ് പ്രാധാന്യം നൽകിയത്. പിങ്ക് ലിപ്സ്റ്റിക്, ചെറിയ പൊട്ട്, സ്വാഭാവിക ഭംഗിയുള്ള പുരികങ്ങൾ, നേരിയ സ്‌മോക്കി ഐഷാഡോ എന്നിവയായിരുന്നു പ്രത്യേകതകൾ. തിളക്കമുള്ള ഡ്യൂയി ഫിനിഷും ലുക്കിന് നൽകി.

ആഭരണങ്ങളുടെയും മേക്കപ്പിന്റെയും തിരഞ്ഞെടുപ്പിൽ അമിതമായ അലങ്കാരങ്ങൾ ഒഴിവാക്കിയതിനാൽ കുർത്തയിലെ എംബ്രോയ്ഡറി കൂടുതൽ ശ്രദ്ധേയമായി.

രൺവീറിനും മക്കൾക്കും മസാബയുടെ വസ്ത്രങ്ങൾ

ദീപികയ്ക്കു മാത്രമല്ല, രൺവീറിനും മക്കൾക്കും ഹൗസ് ഓഫ് മസാബ തന്നെയാണ് വസ്ത്രമൊരുക്കിയത്.ഐവറി നിറത്തിലുള്ള സിൽക്ക് കുർത്ത സെറ്റാണ് രൺവീർ ധരിച്ചത്. ദീപികയുടെ ബീജ്, ഗോൾഡ് നിറങ്ങളിലുള്ള വസ്ത്രവുമായി ചേർന്നുനിൽക്കുന്ന രീതിയിലായിരുന്നു രൺവീറിന്റെ ലുക്ക്. മൂത്തമകൾ ദുവയ്ക്കായി പീച്ച് നിറത്തിലുള്ള ടിഷ്യൂ, സിൽക്ക് തുണികൾ ഉപയോഗിച്ച കുർത്ത സെറ്റാണ് തിരഞ്ഞെടുത്തത്. നവജാതശിശുവായ ദേവിയെ പൊതിഞ്ഞിരുന്നത് മൃദുവായ മൽ തുണിയുടെ ലൈനിങ്ങുള്ള ടിഷ്യൂ സ്വാഡിലിലാണ്. ഹൃദയത്തിന്റെ ആകൃതിയിലുള്ള എംബ്രോയ്ഡറി ടാസലുകളായിരുന്നു ഇതിന്റെ പ്രത്യേകത. ഇതോടെ നാലുപേരുടെയും വസ്ത്രങ്ങളിൽ ഐവറി, പീച്ച്, ഗോൾഡ് നിറങ്ങൾ ആവർത്തിക്കുന്ന മനോഹരമായൊരു ഫാമിലി ലുക്ക് ഒരുക്കാൻ മസാബയ്ക്ക് കഴിഞ്ഞു.

ദുവയ്ക്ക് പിന്നാലെ ദേവി

2018 നവംബർ 14, 15 തീയതികളിലായിരുന്നു ദീപികയുടെയും രൺവീറിന്റെയും വിവാഹം. ഇറ്റലിയിലെ ലേക്ക് കോമോയിൽ അടുത്ത ബന്ധുക്കളുടെയും സുഹൃത്തുക്കളുടെയും സാന്നിധ്യത്തിലായിരുന്നു ചടങ്ങുകൾ. കൊങ്കണി, സിന്ധി ആചാരപ്രകാരമായിരുന്നു വിവാഹം. 2024 സെപ്റ്റംബർ എട്ടിനാണ് ഇവരുടെ ആദ്യമകൾ ദുവ പദുക്കോൺ സിങ് ജനിച്ചത്. 2026 സെപ്റ്റംബർ 19-ന് രണ്ടാമത്തെ മകൾ ദേവിയും ജനിച്ചു.ഇളയമകളുടെ പേര് വെളിപ്പെടുത്തിക്കൊണ്ടുള്ള ചിത്രത്തിന് സ്‌നേഹവും സമൃദ്ധിയും എന്ന അർഥം വരുന്ന സന്ദേശമാണ് ദമ്പതികൾ നൽകിയത്.പുതിയ കുടുംബാംഗത്തെ ആരാധകർക്ക് പരിചയപ്പെടുത്തിയ ചിത്രത്തിൽ താരങ്ങളുടെ സന്തോഷത്തിനൊപ്പം മസാബ ഗുപ്ത ഒരുക്കിയ പരമ്പരാഗത വസ്ത്രങ്ങളും ശ്രദ്ധ നേടി. ആഡംബര എംബ്രോയ്ഡറിയും ഇളം നിറങ്ങളുടെ മനോഹരമായ ചേർച്ചയും കൊണ്ട് ദീപികയുടെ 90,000 രൂപയുടെ കുർത്ത സെറ്റ് ഫാഷൻ പ്രേമികൾക്കിടയിലും ചർച്ചയാകുകയാണ്.