സ്വീഡിഷ് നിർമിത ഗ്രിപെൻ യുദ്ധവിമാനം തനിച്ച് പറത്തി അപൂർവ നേട്ടം സ്വന്തമാക്കി തായ്‌ലാൻഡ് രാജ്ഞി സുതിദ രാജ്യത്തിന്റെ ഔദ്യോഗിക വിമാനം സ്വന്തമായി പറത്തി വീണ്ടും വാർത്തയിലെ താരമായിരിക്കുകയാണ്. ജപ്പാനിലേക്കായിരുന്നു യാത്ര.

To advertise here,

ഒക്ടോബർ 14-ന് ബാങ്കോക്കിലെ ഡോൺ മുവാങ് സൈനിക വിമാനത്താവളത്തിൽ നിന്ന് പുറപ്പെട്ട വിമാനം ജപ്പാനിലെ ഹൊക്കൈഡോയിലുള്ള ന്യൂ ചിറ്റോസ് വിമാനത്താവളത്തിലാണ് രാജ്ഞി വിജയകരമായി ലാൻഡ് ചെയ്തത്.

ഒക്ടോബർ 14 മുതൽ 22 വരെ നീളുന്ന ഒമ്പത് ദിവസത്തെ സന്ദർശനത്തിനായാണ് 48-കാരിയായ രാജ്ഞി ജപ്പാനിലെത്തിയത്. വിമാനത്താവളത്തിൽ ഇറങ്ങിയ ശേഷം സപ്പോറോയിലെ ഹോട്ടലിലേക്ക് രാജ്ഞി തന്നെ കാറോടിച്ചു പോയതായും റിപ്പോർട്ടുകളുണ്ട്. ഇന്റർനാഷണൽ ഐസ് ഹോക്കി ഫെഡറേഷൻ പ്രസിഡന്റിന്റെ പ്രത്യേക ക്ഷണപ്രകാരമാണ് ഈ യാത്ര. 2027 ഐഐഎച്ച്എഫ് ഐസ് ഹോക്കി വുമൺസ് ഏഷ്യ ചാമ്പ്യൻഷിപ്പിൽ പങ്കെടുക്കുന്ന കായികതാരങ്ങൾക്ക് മെഡലുകളും ട്രോഫികളും രാജ്ഞി സമ്മാനിക്കും. സംഘടനയുടെ ആദ്യത്തെ വുമൺസ് ഗ്ലോബൽ അംബാസഡർ കൂടിയാണ് സുതിദ രാജ്ഞി.

ഒക്ടോബർ 8-ന് സൂരത് താനി പ്രവിശ്യയിലെ വിങ് 7 എയർഫോഴ്സ് ബേസിൽ വെച്ച് JAS 39ഇ ഗ്രിപെൻ(Gripen) ഫൈറ്റർ ജെറ്റിൽ രാജ്ഞി ഒറ്റയ്ക്ക് പറക്കൽ പൂർത്തിയാക്കിയത്. മഹാ വജിറാലോങ്കോൺ രാജാവിനെ സാക്ഷിയാക്കിയായിരുന്നു ഈ നേട്ടം. ലോകത്ത് ഒരു യുദ്ധവിമാനം തനിച്ച് പറത്തുന്ന ആദ്യത്തെ ഭരണാധികാരിയായ രാജ്ഞി എന്ന അപൂർവ്വ ബഹുമതിയും ഇതോടെ സുതിദ രാജ്ഞിക്ക് സ്വന്തമായി.

വിമാന പൈലറ്റ് രംഗത്ത് ദീർഘകാലത്തെ പരിചയസമ്പത്തുള്ള വ്യക്തിയാണ് സുതിദ രാജ്ഞി. 2019-ൽ രാജാവുമായുള്ള വിവാഹത്തിന് മുൻപ് തായ് എയർവേസിൽ ഫ്‌ലൈറ്റ് അറ്റൻഡന്റായി ജോലി ചെയ്തിരുന്ന ഇവർ 2010-ലാണ് പൈലറ്റ് പരിശീലനം ആരംഭിച്ചത്. ഇതുവരെ 1,190 മണിക്കൂറിലധികം വിമാനം പറത്തിയ പരിചയം രാജ്ഞിക്കുണ്ട്. ലാൻഡിങ് അതീവ ദുഷ്‌കരമായ ഭൂട്ടാനിലെ പാരോ അന്താരാഷ്ട്ര വിമാനത്താവളം ഉൾപ്പെടെയുള്ള രാജകീയ യാത്രകളിൽ രാജാവിനൊപ്പം കോ-പൈലറ്റായും രാജ്ഞി സേവനമനുഷ്ഠിച്ചിട്ടുണ്ട്.