തിളക്കമില്ല, തുകലിൽ വേറിട്ട ഭംഗി; ശ്രദ്ധ നേടി കിം കർദാഷിയാന്റെ പുതിയ ലുക്ക്

റെഡ് കാർപെറ്റിൽ പതിവ് തിളക്കവും നിറപ്പകിട്ടും ഒഴിവാക്കി വ്യത്യസ്തമായൊരു വേഷത്തിൽ പ്രത്യക്ഷപ്പെട്ടിരിക്കുകയാണ് അമേരിക്കൻ റിയാലിറ്റി താരം കിം കർദാഷിയാൻ. ലേസ്, തുകൽ, വ്യത്യസ്തമായ രൂപകൽപ്പന എന്നിവ ഒത്തുചേർന്ന വസ്ത്രമാണ് ഇത്തവണ കിം തിരഞ്ഞെടുത്തത്. ഓൾസ് ഫെയർ രണ്ടാം സീസണിന്റെ പ്രീമിയറിനെത്തിയ താരത്തിന്റെ വേഷമാണ് ഫാഷൻ ലോകത്ത് ശ്രദ്ധ പിടിച്ചുപറ്റിയത്. ന്യൂയോർക്കിൽ നടന്ന പ്രീമിയറിലാണ് കിം ആഷി സ്റ്റുഡിയോ ഒരുക്കിയ പ്രത്യേക വസ്ത്രത്തിലെത്തിയത്. ഇളം ചാരനിറത്തിലുള്ള നിലത്തുതട്ടുന്ന നീളമുള്ള ഗൗണായിരുന്നു വേഷം. പതിവ് റെഡ് കാർപെറ്റ് വസ്ത്രങ്ങളിൽ കാണുന്ന അമിതമായ തിളക്കത്തിനും അലങ്കാരങ്ങൾക്കും പകരം തുണിത്തരങ്ങളുടെ വ്യത്യസ്തമായ ഘടനകൾക്കാണ് ഈ വസ്ത്രത്തിൽ പ്രാധാന്യം നൽകിയത്.

മുതലത്തോലിന്റെ രൂപം

നേർത്ത ചാന്റിലി ലേസ്, സുതാര്യമായ ഭാഗങ്ങൾ, മുതലയുടെ തൊലിയുടെ രൂപം തോന്നിക്കുന്ന തരത്തിൽ പണിതെടുത്ത തുകൽ എന്നിവയാണ് ഗൗണിന്റെ പ്രധാന പ്രത്യേകതകൾ. ശരീരത്തോട് ചേർന്നുനിൽക്കുന്ന രൂപകൽപ്പനയ്‌ക്കൊപ്പം അരക്കെട്ടിനും ശരീരത്തിന്റെ ആകൃതിക്കും വ്യക്തത നൽകുന്ന കോർസെറ്റ് മാതൃകയിലുള്ള മുകൾഭാഗവും വസ്ത്രത്തിന് വേറിട്ട ഭംഗി നൽകി. കഴുത്തിൽനിന്ന് താഴേക്ക് നീളുന്ന തുകൽ അലങ്കാരവും ശ്രദ്ധേയമായിരുന്നു. കോർസെറ്റ് മാതൃകയിലുള്ള മുകൾഭാഗത്തോട് ചേർന്ന ഈ അലങ്കാരത്തിൽനിന്ന് നീളുന്ന തുകൽ ചരടുകൾ ഭാഗത്തേക്ക് വീണുകിടന്നു. കീറിയ തുണിത്തരങ്ങൾ അടുക്കിവെച്ചതുപോലെയുള്ള ഈ രൂപകൽപ്പന വസ്ത്രത്തിന് കൂടുതൽ സവിശേഷത നൽകി. പിന്നിലേക്ക് ഒഴുകിനീളുന്ന വസ്ത്രത്തിന്റെ അറ്റവും ഗൗണിന്റെ ഭംഗി കൂട്ടി.

വസ്ത്രത്തിനൊത്ത ആഭരണങ്ങളും മേക്കപ്പും

വസ്ത്രത്തിന്റെ ഇരുണ്ട നിറഭാവത്തോട് ചേർന്നുനിൽക്കുന്ന തുകൽ ചോക്കറും കിം അണിഞ്ഞിരുന്നു. അതേസമയം, വലുപ്പമേറിയ വജ്രക്കമ്മലുകൾ വേഷത്തിന് ചെറിയൊരു തിളക്കം നൽകി. ആഭരണങ്ങൾ അധികമില്ലാതെയാണ് താരം തന്റെ ലുക്ക് പൂർത്തിയാക്കിയത്. മുടി പോണിടെയിലായി കെട്ടിയൊതുക്കി. മുഖത്തിന്റെ ഇരുവശത്തുമായി ഏതാനും മുടിയിഴകൾ അലസമായി വീണുകിടക്കുന്നരീതിയിലാണ് സ്റ്റൈൽ ചെയ്തത്. കറുത്ത ഐലൈനർ, മിനിമൽ ഐ മേക്കപ്പ്, ഇളം പിങ്ക് നിറത്തിലുള്ള ബ്ലഷ്, സ്വാഭാവിക നിറത്തിലുള്ള ലിപ്സ്റ്റിക് എന്നിവയായിരുന്നു മേക്കപ്പിലെ മറ്റുപ്രത്യേകതകൾ. ന്യൂയോർക്ക് നഗരത്തിലെ ഹൈലൈൻ സ്റ്റുഡിയോസിലായിരുന്നു പ്രീമിയർ. ചിത്രത്തിലെ സഹതാരങ്ങളായ സാറ പോൾസൺ, ഗ്ലെൻ ക്ലോസ്, നീസി നാഷ്-ബെറ്റ്‌സ്, നവോമി വാട്ട്‌സ് എന്നിവർക്കൊപ്പവും കിം ചിത്രങ്ങൾക്കായി പോസ് ചെയ്തു.