ഇന്ത്യൻ ഫാഷൻ ഡിസൈനർ ഗൗരവ് ഗുപ്തയുടെ ഡിസൈനിൽ പാരീസിലെ റെഡ് കാർപെറ്റിൽ തിളങ്ങി ഹോളിവുഡ് താരം ഇവ ലോംഗോറിയ. ചുവപ്പ് നിറത്തിലുള്ള അതിമനോഹരമായ ഗൗണും വജ്രാഭരണങ്ങളുമണിഞ്ഞ് ഗ്ലോബൽ ഗിഫ്റ്റ് ഗാലയിൽ എത്തിയ താരത്തിന്റെ ലുക്ക് ഫാഷൻ ലോകത്ത് ശ്രദ്ധ നേടി. ഗൗരവ് ഗുപ്ത തന്റെ ഇൻസ്റ്റഗ്രാം അക്കൗണ്ടിലൂടെ താരത്തിന്റെ ചിത്രങ്ങളും വിഡിയോകളും പങ്കുവെച്ചിട്ടുണ്ട്. പാരീസിൽ നടന്ന ഗ്ലോബൽ ഗിഫ്റ്റ് ഗാലയ്ക്കായി പ്രത്യേകം തിരഞ്ഞെടുത്തതാണ് ഈ വസ്ത്രം. 'സോളാർ സീക്വിൻ ഗൗൺ' എന്നാണ് ഗൗരവ് ഗുപ്ത ഈ ഡിസൈനിന് നൽകിയിരിക്കുന്ന പേര്. ശിൽപസമാനമായ രൂപകൽപ്പനയും തിളങ്ങുന്ന ചുവപ്പ് നിറത്തിലുള്ള സീക്വിനുകളും ഗൗണിന് വേറിട്ട ഭംഗി നൽകുന്നു.

To advertise here,

ശിൽപം പോലെ ചുവപ്പഴക്

ഹൃദയാകൃതിയിലുള്ള നെക്ലൈനും സ്ട്രാപ്ലെസ് ബോഡീസുമാണ് ഗൗണിന്റെ പ്രധാന പ്രത്യേകത. നെഞ്ചിന്റെ ഭാഗത്ത് കുറുകെ ഇഴചേർന്ന രീതിയിലുള്ള പാനലുകൾ ഡിസൈനിന് മനോഹരമായ ഘടന നൽകുന്നു. ശരീരത്തിന്റെ ആകൃതിക്കനുസരിച്ച് ചേർന്നുനിൽക്കുന്ന ഗൗണിൽ നിറയെ ചുവന്ന സീക്വിനുകളാണ് ഉപയോഗിച്ചിരിക്കുന്നത്. താഴേക്ക് അസമമായ രീതിയിൽ ഒഴുകുന്ന ഡ്രേപ്പിങ്ങും സ്ലിറ്റും വസ്ത്രത്തിന് കൂടുതൽ ആകർഷകത്വം നൽകുന്നു. നടക്കുമ്പോൾ ദൃശ്യമാകുന്ന മെറ്റാലിക് സ്ട്രാപ്പി ഹീൽസും ലുക്കിനെ പൂർണമാക്കി. ഗൗരവ് ഗുപ്തയുടെ സിഗ്‌നേച്ചർ ശൈലിയിലുള്ള ശിൽപസമാനമായ ഡ്രേപ്പിങ്ങാണ് ഗൗണിനെ ശ്രദ്ധേയമാക്കുന്നത്.

ചുവപ്പിനൊപ്പം വജ്രങ്ങളുടെ തിളക്കവും

ഗൗണിന്റെ തിളക്കത്തിന് മാറ്റുകൂട്ടിയത് ഇവ അണിഞ്ഞ വജ്രാഭരണങ്ങളാണ്. കഴുത്തിനോട് ചേർന്നുനിൽക്കുന്ന ജ്യാമിതീയ ഡിസൈനിലുള്ള വലിയ ഡയമണ്ട് ചോക്കറാണ് ആഭരണങ്ങളിൽ പ്രധാന ആകർഷണം. ഇതിനൊപ്പം സ്റ്റേറ്റ്മെന്റ് ഡയമണ്ട് കമ്മലുകളും അണിഞ്ഞിട്ടുണ്ട്. കൈത്തണ്ടകളിൽ ഒന്നിലധികം ഡയമണ്ട് വളങ്ങളും വിരലുകളിൽ വലിയ വജ്രമോതിരങ്ങളും അണിഞ്ഞതോടെ ലുക്കിന് കൂടുതൽ രാജകീയത കൈവന്നു. കടുംചുവപ്പ് നിറത്തിലുള്ള സീക്വിൻ ഗൗണും വജ്രാഭരണങ്ങളും തമ്മിലുള്ള കോൺട്രാസ്റ്റും ശ്രദ്ധേയമാണ്. ആഭരണങ്ങളിലും വസ്ത്രത്തിലും തിളക്കം നിലനിർത്തിയപ്പോൾ മേക്കപ്പിൽ ലാളിത്യമാണ് താരം തിരഞ്ഞെടുത്തത്. പകുതി മുടി മുകളിലേക്ക് ഒതുക്കിക്കെട്ടി ബാക്കി പിന്നിലേക്ക് അഴിച്ചിട്ട ഹെയർസ്‌റ്റൈലാണ് ഒരുക്കിയത്. വിങ്ഡ് ഐലൈനർ, ബ്രോൺസ് ഐഷാഡോ, ന്യൂഡ് പിങ്ക് ഗ്ലോസി ലിപ്സ്റ്റിക് എന്നിവയാണ് മേക്കപ്പിലെ പ്രത്യേകതകൾ. കവിളുകളിൽ നേരിയ ബ്ലഷ് മുഖത്ത് സ്വാഭാവിക തിളക്കവും നൽകിയിട്ടുണ്ട്.

എന്താണ് ഗ്ലോബൽ ഗിഫ്റ്റ് ഗാല?

കുട്ടികൾ, സ്ത്രീകൾ, കുടുംബങ്ങൾ എന്നിവരുടെ ക്ഷേമത്തിനായി പ്രവർത്തിക്കുന്ന ഗ്ലോബൽ ഗിഫ്റ്റ് ഗാല, സാമൂഹികമായും ആരോഗ്യപരമായും വെല്ലുവിളികൾ നേരിടുന്നവർക്ക് സഹായം എത്തിക്കുന്നതിനായി ഫണ്ട് സമാഹരിക്കുകയും അവബോധം സൃഷ്ടിക്കുകയും ചെയ്യുന്ന പരിപാടിയാണ്. അന്താരാഷ്ട്ര റെഡ് കാർപെറ്റുകളിൽ ഇന്ത്യൻ ഡിസൈനർമാരുടെ സാന്നിധ്യം വർധിച്ചുവരുന്നതിന്റെ മറ്റൊരു ഉദാഹരണം കൂടിയാണ് ഇവ ലോംഗോറിയയുടെ ഈ ലുക്ക്. പരമ്പരാഗത ഇന്ത്യൻ വസ്ത്രങ്ങൾക്കപ്പുറം ആധുനികവും പരീക്ഷണാത്മകവുമായ ഡിസൈനുകളിലും ഇന്ത്യൻ ഫാഷൻ ലോകശ്രദ്ധ നേടുന്നുവെന്ന് ഒരിക്കൽ കൂടി തെളിയിക്കുകയാണ് ഗൗരവ് ഗുപ്ത.