നമ്മുടെ നാട്ടിലെ കുഞ്ഞണ്ണാനോട് സാദൃശ്യം തോന്നിക്കുന്ന ഒരു ജീവിയാണ് ഷുഗർ ഗ്ലൈഡർ! മാർസൂപ്പിയൽ എന്ന ജീവിവർഗത്തിൽപ്പെടുന്ന ഇവയെ ഓസ്‌ട്രേലിയ, ന്യൂഗിനിയ എന്നീ രാജ്യങ്ങളിൽ കണ്ടുവരുന്നു.

To advertise here,

താമസം- മരങ്ങൾ തിങ്ങിനിറഞ്ഞ വനപ്രദേശങ്ങളാണ് ഇവയ്ക്ക് താമസിക്കാൻ ഏറ്റവും ഇഷ്ടം. മരങ്ങളിൽ താമസിക്കുന്ന ഇവർ തങ്ങളുടെ പ്രദേശം മൂത്രമൊഴിച്ചും മറ്റ് ഫിറോമോണുകളാലും അടയാളപ്പെടുത്തിവെയ്ക്കാറുണ്ട്.

പേരിനുപിന്നിൽ- ഈ ഇത്തിരിക്കുഞ്ഞന് മധുരം പെരുത്തിഷ്ടമാണ് കേട്ടോ. പോരാത്തതിന് നല്ല ഉഗ്രൻ ചാട്ടക്കാരുമാണ് കക്ഷികൾ. മരങ്ങൾക്കിടയിലൂടെ 45 മീറ്റർ വരെ ദൂരം ഇവ ഗ്ലൈഡുചെയ്യും.

സഞ്ചാരം- രാത്രിസഞ്ചാരികളാണിവർ. മരങ്ങളിൽനിന്നു മരങ്ങളിലേക്കുള്ള പറക്കലിനിടെ ഇരകളെ അകത്താക്കാനും ഷുഗർ ഗ്ലൈഡറിനു സാധിക്കും. പഴച്ചാറുകൾ, തേൻ തുടങ്ങിയ മധുരമേറിയ ഭക്ഷണങ്ങളാണ് ഈ പഞ്ചാരക്കുട്ടന് ഏറ്റവും ഇഷ്ടം. എങ്കിലും ചെറുകിളികളെയും പല്ലികളെയുമെല്ലാം ഇവൻ അകത്താക്കാറുണ്ട്.

ശരീരം- തൂവലിനോളം ഭാരമേ ഈ ഇത്തിരിക്കുഞ്ഞൻമാർക്കുള്ളൂ. ഏതാണ്ട് 85-140 ഗ്രാം! വയറിന്റെ ഭാഗം ക്രീം നിറത്തിലാണ്. കണ്ണിനുചുറ്റും വലയങ്ങളുണ്ട്. കൈയിൽനിന്ന് കാലിലേക്ക് നീളുന്ന ചെറിയ ചിറകുപോലെയുള്ള ഭാഗം (Patagium) അതിനെ വായുവിലൂടെ അതിവേഗം തെന്നിനീങ്ങാൻ സഹായിക്കുന്നു. നീളമേറിയ വാലും നീളൻ കൈ-കാൽ നഖങ്ങളും ഷുഗർ ഗ്ലൈഡറിനെ മരങ്ങളിൽ അള്ളിപ്പിടിച്ചിരിക്കാൻ സഹായിക്കും.