കരിവെള്ളൂർ : വകുപ്പ് മന്ത്രിയോ കെ.എസ്ഇ.ബി. യോ അറിയാതെയാണ് ജി.എൻ.എ. യുമായി മുഖ്യമന്ത്രി വൈദ്യുത കരാറിൽ ഒപ്പിട്ടതെന്ന് പ്രതിപക്ഷ നേതാവ് പിണറായി വിജയൻ ആരോപിച്ചു. സി.പി.എം. കരിവെളളൂർ നോർത്ത് ലോക്കൽ കമ്മിറ്റിയുടെ നവീകരിച്ച ഓഫീസ് കെട്ടിടം ഉദ്ഘാടനം ചെയ്യുകയായിരുന്നു അദ്ദേഹം.

To advertise here,

വൈദ്യുതി മേഖലയുമായി ബന്ധമില്ലാത്ത സ്ഥാപനമാണ് ജി.എൻ.എ. കൃത്രിമമായ ക്ഷാമമുണ്ടാക്കി സ്വകാര്യ കുത്തകകളെ സഹായിക്കാനുള്ള ശ്രമമാണ് മുഖ്യമന്ത്രി നടത്തിയത്. എന്തുകൊണ്ട് ഇത്തരം വഴിവിട്ട നീക്കങ്ങളുടെ കേന്ദ്രമായി മുഖ്യമന്ത്രി മാറിയെന്ന് അന്വേഷിക്കണം. മുഖ്യമന്ത്രിയെക്കൂടി അന്വേഷണ പരിധിയിൽ ഉൾപ്പെടുത്തി ജുഡീഷ്യൽ അന്വേഷണം പ്രഖ്യാപിക്കണം -പിണറായി പറ‍ഞ്ഞു.

കിഫ്ബിക്കായി ഏറ്റെടുക്കുന്ന സ്ഥലത്തിന്റെ വില വിപണി വിലയേക്കാൾ കൂടുന്നതിൽ അസ്വാഭാവികത ഒന്നുമില്ല. കേന്ദ്രസർക്കാർ പാസാക്കിയ നിയമമനുസരിച്ച് റവന്യു വകുപ്പാണ് സ്ഥലം ഏറ്റെടുത്തത്. സർക്കാർ ഏറ്റെടുക്കുന്ന സ്ഥലത്തിന് മാർക്കറ്റ് വില ബാധകമല്ല. ഉടമയ്ക്ക് സ്ഥലം കൈയിൽ നിന്ന് പോകുമ്പോൾ ഉണ്ടാകുന്ന നഷ്‌ടം കൂടി വകയിരുത്തി കൊടുക്കും.

കണ്ണൂരിൽ സ്ഥലം ഏറ്റെടുത്തത് വിമാനത്താവളത്തിന് അടുത്തായത് കൊണ്ടാണ്. മറ്റ് വിമാനത്താവളങ്ങൾക്ക് സമീപം സ്ഥലം കിട്ടാനില്ലായിരുന്നു - പിണറായി പറഞ്ഞു.

കെ. കൃഷ്ണൻ മാസ്റ്റർ സ്മാരക മിനിഹാൾ ജില്ലാ സെക്രട്ടറി കെ.കെ. രാഗേഷ് ഉദ്ഘാടനം ചെയ്തു. ജില്ലാ സെക്രട്ടേറിയറ്റംഗം ടി.ഐ. മധുസൂദനൻ കെ. കൃഷ്ണൻ മാസ്റ്റരുടെ ഫോട്ടോ അനാച്ഛാദനം ചെയ്തു.ഏരിയാ സെക്രട്ടറി പി. സന്തോഷ് പതാക ഉയർത്തി.

സംഘാടക സമിതി ചെയർമാൻ പി. രമേശൻ അധ്യക്ഷത വഹിച്ചു. പയ്യന്നൂർ നഗരസഭാ ചെയർപേഴ്സൺ സരിൻ ശശി, ഡോ. വി.പി.പി. മുസ്തഫ, ഡോ. എം.വി. വിജയകുമാർ, സി. കൃഷ്ണൻ, പി കരുണാകരൻ എന്നിവർ സംസാരിച്ചു.